Eksodus 25
25
Rohow dhe'n Tabernakel
1An Arloedh a leveris dhe Moyses, 2Kows orth mebyon Ysrael may trollons offrynn dhymm; a bub den bolonjedhek yn y golonn ty a wra degemmeres an offrynn dhymm. 3Ha hemm yw an offrynn a dhegemmerydh anedha: owr, arghans, ha brons, 4pann glas ha purpur ha kogh, sendal, ha blew gever, 5kreghyn rudhhes a hordhes, kreghyn a liw hyasinth#25:5 kreghyn a liw hyasinth: war-lergh an Septuagint. Ebrow kreghyn morhoghespo kreghyn broghes ha prenn akasya, 6oyl dhe'n lugern, spisyow rag oyl an untyans ha'n ynkys hweg, 7meyn onyks, ha meyn rag desedha y'n efod hag y'n lurik. 8Ha gas i dhe wul dhymm sentri may trikkiv yn aga mysk. 9Herwydh pup-tra a dhiskwedhav dhis a-dro dhe batron an tabernakel, ha'y vebel, yndella ty a'n gwra.
Argh an Dustuni
10I a wra argh a brenn akasya; dew gevelin ha hanter a vydh hy hys, kevelin ha hanter hy les, ha kevelin ha hanter hy ughelder. 11Ha ty a wra hy gorowra gans owr pur, a-ji hag a-ves ty a wra hy gorowra, ha ty a wra gorra kylgh owr a-dro dhedhi. 12Ty a wra teudhi rygdhi peder lagasenn owr ha'ga gorra war hy feswar troes, diw lagasenn a'n eyl tu dhedhi, ha diw lagasenn a'y gila. 13Ty a wra gwelynni a brenn akasya ha'ga gorowra. 14Ty a worr an gwelynni a-ji dhe'n lagasennow war denwennow an argh, dredha dhe dhoen an argh. 15An gwelynni a wra gortos yn lagasennow an argh; ny vydhons kemmerys dhiworti. 16Hag y'n argh ty a wra gorra an dustuni a rov dhis. 17Ena ty a wra tregeredhva a owr pur, dew gevelin ha hanter a vydh hy hys, ha kevelin ha hanter hy les. 18Ty a wra dew jerub a owr; a vortholweyth ty a's gwra, dhe dhew benn an dregeredhva. 19Gwra unn cherub dhe'n eyl penn hag unn cherub dh'y gila; yn unn rann gans an dregeredhva ty a wra an jerubim dh'y dhew benn. 20An jerubim a wra lesa aga eskelli war-vann, ow korskeusi an dregeredhva gans aga eskelli, aga fas an eyl war-tu ha'y gila; war-tu ha'n dregeredhva y fydh fasow an jerubim. 21Ty a wra gorra an dregeredhva war an argh; hag y'n argh, ty a wra gorra an dustuni a rov dhis. 22Ena my a wra metya genes, hag a-ugh an dregeredhva, ynter an dhew jerub usi war argh an dustuni, my a gews genes a-dro dhe bup-tra a worhemmynnav dhis rag mebyon Ysrael.
Moes an Bara
23Ty a wra moes a brenn akasya; dew gevelin a vydh hy hys, kevelin hy les, ha kevelin ha hanter hy ughelder. 24Ty a wra hy gorowra gans owr pur, ha gul kylgh a owr a-dro dhedhi. 25Ha ty a wra a-dro dhedhi fram, dornva y hys, ha gul kylgh a owr a-dro dhe'n fram. 26Ha ty a wra rygdhi peder lagasenn a owr, ha kelmi an lagasennow dhe'n beder kornell orth y beder garr. 27Ogas dhe'n fram y hwra growedha an lagasennow avel dalghennow dhe'n gwelynni rag doen an voes. 28Ty a wra an gwelynni a brenn akasya, ha'ga gorowra gans owr, ha'n voes a vydh degys dredha. 29Ha ty a wra hy flatyow ha'y skudellow ha'y hostrels ha'y bollow dhe dhiveri offrynnow diwes; a owr pur ty a's gwra. 30Ha ty a wra settya bara an wolok war an voes a-ragov pup-prys.
An Kantoler
31Ha ty a wra dhymm kantoler a owr pur. Troes ha gwelenn an kantoler a vydh gwrys a vortholweyth; y hanafow, y dalbennow, ha'y vleujennow a vydh unn rann ganso, 32hag y fydh hwegh skorrenn ow mos yn-mes a'y denwennow, teyr skorrenn an kantoler yn-mes a unn tenewen anodho ha teyr skorrenn an kantoler yn-mes a'n tenewen arall; 33tri hanaf gwrys avel alamandow, peub gans talbenn ha bleujenn, war an unn skorrenn, ha tri hanaf gwrys avel alamandow, peub gans talbenn ha bleujenn, war an skorrenn arall – hag yndella dhe'n hwegh skorrenn ow mos yn-mes a'n kantoler; 34ha war an kantoler y honan peswar hanaf gwrys avel alamandow, ha gansa aga thalbennow ha'ga bleujennow; 35y fydh talbenn a unn rann ganso yn-dann an kynsa par a skorrennow, talbenn a unn rann ganso yn-dann an nessa par a skorrennow ha talbenn a unn rann ganso yn-dann an diwettha par a skorrennow, rag an hwegh skorrenn ow mos yn-mes a'n kantoler. 36Aga thalbennow ha'ga skorrennow a vydh unn rann ganso, an oll anodho unn rann a vortholweyth a owr pur. 37Ha ty a wra an seyth lugarn ragdho; ha'n lugern a vydh settys may rollons golow war an spas a-ragdho. 38Y evelyow ha'y badellow-tan a vydh a owr pur. 39A dalent a owr pur y fydh gwrys, gans oll an daffar ma. 40Ha gwayt aga gul war-lergh an patron ragdha, a veu diskwedhys dhis war an menydh.
Currently Selected:
Eksodus 25: ABK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024
