Eksodus 1
1
Mebyon Ysrael yw Dyghtys Fell yn Ejyp
1An re ma yw henwyn mebyon Ysrael neb a dheuth a-ji dhe Ejyp gans Yakob; pubonan a dheuth gans y vayni. 2Rewben, Simeon, Levi ha Yuda, 3Yssakar, Zebulun ha Benyamin, 4Dan ha Naftali, Gad hag Asher. 5Oll an enevow ow tos a vordhos Yakob a veu deg den ha tri-ugens; ha Yosep, yth esa ev yn Ejyp. 6Ena Yosep a verwis, ha'y vreder oll, hag oll an henedh na, 7ha mebyon Ysrael a dhug frut, hesya a wrussons ha palshe; galloesek dres eghenn ens, ha'n tiredh o lenwys gansa.
8Lemmyn y sevis war Ejyp myghtern nowydh na aswonnsa Yosep, 9hag ev a leveris dh'y bobel, ‘Mirewgh, pobel mebyon Ysrael yw niverussa ha galloesekka ageson. 10Dewgh, gwren yn fur gansa ma na lieshahons, hag y hyll hwarvos, bresel mar teffo, i ynwedh dhe junya gans an re a'gan kas, hag omladh er agan pynn, ha diank a'n tir.’ 11Ytho warnedha i a ordenas mestrysi hwel rag aga arwaska gans beghyow poes, hag i a dhrehevis sitys-gwithva rag Faro, Pithom ha Rameses; 12ha dhe voy y's arwasksons, dhe voy i a balshas, hag i a omlesas, ha skruth a's tevedha drefenn mebyon Ysrael. 13Ytho Ejyp a wrug dhe vebyon Ysrael servya yn harow, 14ha gul aga bewnans hwerow yn lavur kales, yn pri, hag yn brykkys, hag yn pub eghenn a wonis y'n gwel; oll aga gonis ynno may hwrussons dhedha servya o garow.
15Ena myghtern Ejyp a gewsis orth an gwelivedhesow ebrow (anedha onan o henwys Shifra ha'y ben Pua), 16ha leverel, ‘Pan wryllowgh an Ebrowesow dhe dhineythi, ha mires war an dhew ven#1:16 an dhew ven: Henn yw an skavell-dhineythyans., mar pydh mab – gwrewgh dhodho bos gorrys dhe'n mernans; ha mar pydh myrgh, gesewgh hi dhe vewa.’ 17Mes an gwelivedhesow a borthas own a Duw, ha ny wrussons par dell gewssa dhedha myghtern Ejyp, mes gwitha an vebyon yn few. 18Ytho myghtern Ejyp a elwis war an gwelivedhesow, ha leverel dhedha, ‘Prag y hwrussowgh an dra ma, ha gwitha an vebyon yn few?’ 19Ha'n gwelivedhesow a leveris dhe Faro, ‘Rag nyns yw an Ebrowesow avel benynes Ejyp, rag i yw buan ha kyns an gwelivedhesow dhe dhos dhedha, i re dhineythis.’ 20Ha Duw a wrug da dhe'n gwelivedhesow, ha'n bobel a gressyas hag o pur alloesek. 21Dell hwarva, drefenn an gwelivedhesow dhe berthi own a Dhuw, ev a wrug dhedha teyluyow, 22ha Faro a worhemmynnis dhe oll y bobel, ow leverel, ‘Pub maw a vydh genys – tewlewgh ev y'n Nil, ha pub myrgh gwithewgh hi yn few.’
Currently Selected:
Eksodus 1: ABK
Highlight
Copy
Compare
Share
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024
