Dewteronomi 16

Goel an Pask

1Gwith mis Abib, ha gwra Pask dhe'n Arloedh dha Dhuw, rag yn mis Abib an Arloedh dha Dhuw a'th tros mes a bow Ejyp d'wor' an nos. 2Sakrifi Pask dhe'n Arloedh dha Dhuw dhiworth an deves po an chatel y'n tyller a wra an Arloedh y dhewis dhe wul dh'y hanow triga ena. 3Na dheber ganso travyth gans goell ynno. Seyth dydh ty a dheber bara heb goell, bara galar, rag ty a dheuth yn-mes a bow Ejyp yn unn fyski, rag may perthi kov a'n jydh may teuthys yn-mes a bow Ejyp, oll dydhyow dha vewnans. 4Na vedhes gwelys genes goell vytholl yn oll dha oryon seyth dydh. Na vedhes gesys dres nos travyth a'n kig a sakrifiydh orth gorthugher an kynsa dydh, bys y'n myttin. 5Ny yllydh sakrifia an Pask a-berth yn onan a'th yetys a wra an Arloedh dha Dhuw aga ri dhis, 6marnas an tyller a wra an Arloedh dha Dhuw y dhewis dhe wul dh'y hanow triga ynno. Ena ty a sakrifi an Pask gorthugherweyth, pan sedh an howl, y'n termyn may teuthys yn-mes a Ejyp. 7Ty a wra y gegina ha'y dhybri y'n tyller a wra an Arloedh dha Dhuw y dhewis; ha ternos vyttin ty a dhehwel dhe'th tyldow. 8Hwegh dydh y tybrydh bara heb goell; hag y'n seythves dydh y fydh kuntelles solem dhe'n Arloedh dha Dhuw. Na wra ober vyth ynno.

Goel an Seythunyow

9Seyth seythun y niverydh dhis; dalleth nivera seyth seythun dhiworth dalleth termyn gorra an gromman war an ys. 10Ena ty a wra goel an seythunyow dhe'n Arloedh dha Dhuw der offrynn bolonjedhek a'th leuv, kepar dell wrug an Arloedh dha Dhuw dha venniga. 11Ty a lowenha a-rag an Arloedh dha Dhuw, ty, ha'th vab, ha'th vyrgh, ha'th was, ha'th vaghteth, ha'n Levyas usi y'th yetys, ha'n alyon, ha'n omdhivas, ha'n wedhwes usi yntredhowgh y'n tyller a wra an Arloedh dha Dhuw y dhewis, dhe wul dh'y hanow triga ena. 12Porth kov y feus keth yn Ejyp, ha gwayt gul an ordenansow ma.

Goel an Skovvaow

13Ty a wra goel an skovvaow seyth dydh wosa kuntell dhiworth dha leur-drushya ha'th winwask. 14Lowenha y'th ty'goel, ty ha'th vab, ha'th vyrgh, ha'th was, ha'th vaghteth, ha'n Levyas, ha'n alyon, ha'n omdhivas, ha'n wedhwes usi y'th yetys. 15Seyth dydh y solempnydh goel dhe'n Arloedh dha Dhuw y'n tyller a wra an Arloedh y dhewis; rag an Arloedh dha Dhuw a wra dha venniga yn oll dha askorr hag yn pub ober a'th leuv, ytho ty a lowenha devri.

16Teyrgweyth y'n vlydhen pub gorreydh ahanowgh a vydh gwelys a-rag an Arloedh dha Dhuw y'n tyller a wra y dhewis: yn goel an bara heb goell, yn dy'goel an seythunyow, hag yn goel an skovvaow; ha ny vydh gwelys a-rag an Arloedh gwag y leuv. 17Pub gour a dhre ro kepar dell yll, war-lergh bennath an Arloedh dha Dhuw a ros dhis.

Breusysi

18Ty a re breusysi ha soedhogyon yn oll dha yetys a wra an Arloedh dha Dhuw aga ri dhis, dre dha loethow; hag i a vreus an bobel gans gwirvreus. 19Na gammdreyl breus, na bleg dhe fas neb den, na gemmer falswober, rag falswober a dhall dewlagas an re fur ha treylya geryow an re wiryon. 20Ewnder – siw ewnder, rag may fewi, hag erita an tir a wra an Arloedh dha Dhuw y ri dhis.

Gordhyans Pagan

21Na blans ragos gwydhenn vyth avel Ashera ryb alter an Arloedh dha Dhuw a wredh ragos. 22Na dhrehav ragos peulven – neppyth a wra an Arloedh dha Dhuw y hasa.

Currently Selected:

Dewteronomi 16: ABK

Highlight

Copy

Compare