2 Makkabeyon 15
15
Balghder Nikanor
1Pan glewas Nikanor bos Yudas ha'y luyow yn ranndir Samaria, ev a dewlis towlow dhe omsettya er aga fynn gans oll sawder y'n dydh a bowes. 2Pan leveris an Yedhewon, neb o konstrynys dh'y holya, ‘Na'gan distru mar fell ha barbarus, mes diskwedh revrons dhe'n jydh may hwrug ev, neb a wel pup-tra, y enora ha sanshe a-ugh dydhyow erell,’ 3an kanjon teyrgweyth milliges a wovynnas mars esa Sovran yn nev re worhemmynnsa gwitha an sabot. 4Pan lavarsons, ‘An Arloedh bew y honan yth yw, an Sovran yn nev, a worhemmynnis dhyn may hwitthen an seythves dydh,’ 5ev a worthybis, ‘Mes my yw sovran ynwedh, war an nor, ha my a worhemmynn dhywgh may kemmerowgh arvow ha kowlwul negys an myghtern.’ Byttegyns, ny sewenis ow kowlwul y dowl kasadow.
Yudas a Gennerth y Dus
6Ytho Nikanor yn y vostyans pur ha balghder re ervirsa sevel men-kov poblek a vudhogoleth war Yudas ha'y luyow. 7Mes ny astelas Makkabeus trestya gans pub fydhyans ev dhe gavoes gweres gans an Arloedh. 8Ev a ynnias war y dus ma na ve own dhedha a omsettyans an Jentilys, mes gwitha yn aga brys an prysyow kyns pan dhothya dhedha gweres a'n nev, hag ytho gwaytyas an trygh a vedha res dhedha gans an Ollgalloesek. 9Orth aga hennertha dhiworth an lagha ha'n brofoesi, hag orth aga hovhe a'n batelyow re waynsens, ev a's gwrug moy diwysyk. 10Ha wosa movya aga spyrys, ev a dhellos y worhemmynnow, dhe'n keth termyn ow tiskwedhes falsuri an Jentilys ha torrow aga thiow. 11Ev a arvas peub anedha, a-der gans fydhyans yn skoesow ha guwow mes orth aga hennertha gans geryow brav, hag ev a's cheryas oll ow
12An pyth a welas o hemma: Onias, re bia arghoferyas, gour da ha nobyl, klor y fordh ha hweg y gnas, onan a gewsi yn hwiw ha dyskys a'y flogholeth yn pup-tra yw bryntin, esa ow pysi ystynnys y dhiwleuv rag oll kemmynieth an Yedhewon. 13Ena y'n keth vaner onan arall a omdhiskwedhas notys der y wols loes ha'y dhinita, hag a veuredh marthys hag awtorita. 14Hag Onias a gewsis, ow leverel, ‘Hemm yw den a gar y vreder hag a bys yn feur rag an bobel ha'n sita sans – Yeremia, profoes Duw.’ 15Yeremia a ystynnas y leuv dhyghow ha ri dhe Yudas kledha owrek, ha dell y'n ros ev a gewsis dhodho yndellma: 16‘Kemmer an kledha sans ma, ro a Dhuw, ganso may tistruydh dha eskerens.’
17Kennerthys gans geryow Yudas, mar nobyl hag gans an galloes dh'aga biga dhe vravder hag ow kul dhe golonnekter difuna, hag ow ri bravder gourel dhe mebyon, i a erviras na wrellens kaskyrgh mes omsettya yn hardh, hag ervira an mater der omladh leuv orth leuv gans pub kolonnekter, drefenn bos an sita ha'n sentri ha'n tempel yn peryll. 18Aga bern rag gwragedh ha fleghes, breder ha neskerens o le poes warnedha; aga brassa ha kynsa own o rag an sentri sakrys. 19Ny veu byttele ankres an dus deges y'n sita, rag prederus vons a-dro dhe siwyans batel y'n pow igor.
Fethans ha Mernans Nikanor
20Pan esa peub ow mires yn-rag orth an vreus a dheffa, ha'n eskar devedhys yn ogas seulabrys ha'ga lu parys rag batel, an olifanses yn aga savla ewn ha'n varghogyon yn aga tyller war an eskelli, 21Makkabeus, ow kweles an luyow a-ragdho ha provians divers an arvow ha gnas wyls an olifanses, a ystynnas y dhiwleuv war-tu ha nev ha gelwel war an Arloedh a wra marthusyon; rag ev a wodhya nag yw der arvow mes par dell ervir an Arloedh may hwront ev an vudhogoleth dhe'n re a's dendil. 22Ev a elwis warnodho gans an geryow ma: ‘Ty, A Arloedh, a dhannvonas dha el yn termyn Hezekia myghtern Yudi, hag ev a ladhas kans ha pymp ha peswar ugens mil yn kamp Sennagherib. 23Ytho lemmyn, A Rewler an nevow, dannvon el da rag lesa own hag euth a-ragon. 24Gans nerth dha vregh bedhens gweskys an vlasfemoryon ma re dheuth erbynn dha bobel sans.’ Gans an geryow ma ev a hedhis.
25Nikanor ha'y dus a dheuth yn-rag gans hirgern ha garmow batel, 26mes Yudas ha'y dus a dheuth erbynn an eskar yn batel gans galow war Dhuw ha pysadow. 27Owth omladh gans aga diwleuv hag ow pysi war Dhuw yn aga holonn, i a ladhas pymthek warn ugens mil dhe'n lyha, ha cherys vons der omdhiskwedhyans Duw.
28Pan veu gorfennys an vatel, ow tehweles yn lowender, i a dhyskas bos Nikanor growedhys marow yn y leun-arvwisk. 29Ena yth esa garmow ha tervans, hag i a vennigas an Arloedh Ollgalloesek yn aga mammyeth. 30Hag ena an gour neb o prest yn korf hag enev penn-defendyer y bobel, hag a besyas yn kerensa war-tu ha'y geswlasoryon oll y vewnans, a worhemmynnis dhedha treghi penn ha bregh Nikanor dhe-ves ha'ga doen dhe Yerusalem. 31Pan dheuth di ha wosa gelwel war-barth y geswlasoryon ha settya an oferysi a-rag an alter, ev a dhannvonas war-lergh an re esa y'n tour. 32Ev a dhiskwedhas dhedha penn Nikanor vil ha bregh an den ansans na, re bia ystynnys yn braslavarow erbynn tempel sans an Ollgalloesek. 33Ev a droghas yn-mes taves Nikanor ansans ha leverel ev dh'y ri tamm ha tamm dhe'n ydhyn ha kregi gobrow y follneth a-dal an sentri. 34Ytho peub, ow mires dhe nev, a vennigas an Arloedh re omdhiskwedhsa, ow leverel, ‘Benniges yw ev neb a withas y dyller y honan andhefolys!’ 35Yudas a grogas penn Nikanor dhiworth an tour, tokyn kler ha hewel dhe bubonan a weres an Arloedh. 36Hag i oll a ordenas der arghadow kemmyn nevra dhe asa an jydh ma dhe vos heb solempnyans, mes dhe solempnya trydhegves dydh an dewdhegves mis – yw gelwys Adar y'n yeth Aramaek – unn jydh kyns Goel Mordekay.
37Yndellma ytho y feu tenkys Nikanor, hag a'n termyn na an sita re beu yn perghennogeth an Ebrowyon. Hag omma my a worfenn an lyver.
Pennlavar
38Mars yw gorrys war-barth yn ta hag yn kewar, henn yw an pyth a dhesiris vy ow honan; mars yw gwrys yn trog hag yn kresek, henn o an gwella a yllis y wul. 39Rag dell yw anhweg eva gwin y honan, po hwath dowr y honan, gwin kemmyskys gans dowr a wra blas hweg ha denteythyel; yndella ynwedh gis-skrifa yn ober lyennek a heudhha diwskovarn an re a lenn an ober. Hag ottomma y fydh an diwedh.
Currently Selected:
2 Makkabeyon 15: ABK
Highlight
Share
Copy
Want to have your highlights saved across all your devices? Sign up or sign in
© Kesva an Taves Kernewek 2004, 2023
© Cornish Language Board 2004, 2023