ROMANKVDVNG 13

Migom Lcgang Gerpcnam Agerkvdvng

1Appvng tani:yc migom donam ilang gvla:nckvdv:dok kcvgpc dungka:lang. Kapila:nc Ru:ncpvnckolokkcma:mvlo oko migom donamcsinci kamang, odokkc cdc sc:kobulu du:nc kvdv:dc Ru:ncpvnckckokki ru:lvgnammc. 2Cmpige:la sc:kobulu ilang-gvlang kanckvdv:dcm motumsudagnc Ru:ncpvncbv oko agerdcm bitoji cdcmci motumsudag, odokkc cdc sc:kobulu motumsuycji kcba:ba:namcm pa:do. 3Kapila:nc migom donckvdv:dc aipc du:nc dagnc kvdv:dokkcpc pcsopcnammang, cmpige:la aima:nc kvdv:do:pc. No pcsonamko kama:ycnci sc:kobv ilang-gvlang kancpc ila du:ji? Cmpcmvlo okodc aidagji cdcm itoka, odokkc no bvk aidag cmna tolvgnammcm pa:ycpc, 4Kapila:nc bv Ru:ncpvnckc nok lcgangc ager gerya:nc. Cmpige:la no germurko germvlo, pcsotoka, kapila:nc bv madsvgdcm cmmumpc bomla du:mang; Bv Ru:ncpvnckc ager gerya:nc Bvk aglv:dcm aima:nc ager gerncdcm lv:pc. 5Cdcmpidag akonc lulvg lunamcm tadpa:ru:yc, Ru:ncpvnckc aglvng lv:namdcmong lvngkosuge:mang cmnamongmang cmpige:la asin mcngkin-sakkin kokkisin.

6Cdc lcgangv:dokki nolu kajonangcmsin dordo, kapila:nc ilang gvlang kanckvdv:dc Ru:ncpvnckc ager gernc, cdc appvng agerkvdv:dcm gerla. 7Buluk appv:dcm buluk dorpcnam kvdv:dcm dorla, kajonangcm sc:kobulum kajonangcm dorpcnammcji, migomcm dorpcnam murkongcm sc:kobulum migom dorpcnam murkongcm dorpcnammcji, mcnggcnammcm sc:kom mcnggcpcnamcji, itosa:toka sc:kom ipcsa:pcnammcji.

Akonc Akoncm Ipcnam Ager

8Sc:komsin dogcsuyoka, akoncm akonc aya:mvnsunamdcmyam; kapila:nc sc:kobv bvk kumrvdcm aipc mc:doji lujvglurodcm lukamdcmpc gertobong. 9Cdc kvnggv:pc lulvgnam kvdv:dcm, “no amikc nc:ngcm miyc:pc la:biyok, No tani:ycm mokeyok, No dopsoyok, No mc:bo-kaboyok,” odokkc ake atv kvnggv:pc lulvgnamkvdv:dcm, sc agomso lukumluri:tag, “Nok kumrv-ko:rcm nok avyvngkcmpc aipc mc:lang.” 10Aipc mc:namc kumrv-ko:rv akoncm imurko ima:yc; cdcmpidag aipc mc:namdc:na lujvglurodcm lukamdcmpc gernamdc.

11Odokkcsin nolu kindag sc oko ayircji, cddvkojc sc ayirsc pvngka:bo:ji nolukkc yubkolokkc kinsupcnamcbo:nc. Kapila:nc mopvtnamdc ngoluk kcra:pc pvngangka:bong su:pak noluk mcnga:po:la mc:jvgpo:nam dokkcmpcyam; 12yumcdc bojcrungko mo:tc:pc gvpakka:bong, longcdc aninpc pvnga:dandu:bong. Kajc ngolu cmpcmvlo kcmolok agerdcm mcpakla odokkc pva:lok mimagmonanc attarkvdv:dcm gclai 13Kajc ngolu avyc pva:lokkcmpc ilang-gvlai, apo: tv:ladola: tvngvrsunc ajon jongo:ma:pc, amikc mimc langgo:la odokkc ka:bomc:bogo:ma:pc, pamvnsugo:ma:pc odokkc ncka:mvnsuma:pc. 14Cmpige:la Ru:tum Jisumc gctoka, odokkc adin amvrdokkcpc okkomsin lc:yoka, odok mc:namdcm mc:tcsumopc cmna.

Currently Selected:

ROMANKVDVNG 13: MISIBSI

Highlight

Copy