LU:KKC 24
24
Turkunamdc
(Met 28.1-10; Mark 16.1-8; Jo:n 20.1-10)
1Cmpige:la opta:dok dunga:po:do longcdo, rokom-ta:sukpc, bulu agodo:pc gvkang, buluk mosolang mosv:la lc:namdcm bomna. 2Odo bulu vlv:dcm agodokkc kurge:la lc:dopc ka:to, 3Ckvdaggom cdvlo bulu gva:toji bulu sima:dcm pa:tomang. 4Bulu cdcm mcngapla:ma:pc ila du:dodcm, ka:toka, tani: anyikonc buluk kcra:do dagangkang unjvg ungvgnc attar gcge:la; 5odokkc bulu pcsola amo:bo pogbumamkang, tani:dc bulum luto, “Nolu kapila turnc tani:dcm sinc tani: ara:do mago:du:n? 6Kapc Bv nolum lutungaji mc:pa:lang, Galilolo Bv du:dodcmci, 7Tani:kc Awodc:jc pa:p kanc tani:kvdv:dok alaglo tolvgru:yc, odokkc kuruslo pvtkeyc, odokkc lowum longcdo turycku.”
8Odo bulu Bvk agom kvdv:dcm mc:pa:toku, 9odokkc agodokkc gvlatge:kula bulu vyvngkolang akodcm odokkc ake appv:dcm bulu lubitoku. 10Cdcbulu Magdalini Meri:bvai odokkc Joana:bv odokkc Jakobkc anc Meri:bv odokkc ake nc:ngkvdv:dc buluk lcdulo dunggai sc:kobulu ager gerta:ka cmna mclvgnamkvdv:dcm lubikaji. 11Cmpige:la cdc agomkvdv:dcm bulu:kkcpc lume: agomcmpc idagai, odokkc bulu bulum mc:jvgtomang. 12Cmpige:la Pitorbv darobge:la agodo:pc dukkang; tungkungge:la ngenga:la kangge:la, bv riaki sumnam gasorong kvdv:dcm ka:begto; odokkc bv okumpc okko kapc ika:ji mcngapla:ma:la gvkangku.
Immaudo:pc Gvnam
(Mark 16.12-13)
13Odo longgardo bulukkolok anyikonc Immau cmnam do:lungkolo:pc gvdungai, Jerusalemdokkc mail kvnvdkopc idagai, 14odokkc akondcm akondc luka:mvnsula oko okko ika:ji cdc appv:dok agomcm lula gvdungai. 15Bulu lula: lula: agomdcm lckopc luka:mvnsula gvdodcm, Jisubv avdci kcra:do:pc gva:to odokkc buluk lcdulo gvmvnkang. 16Cmpige:la buluk amikkvdv:dcm Bvm kangkinma:dopc lc:to. 17Odokkc Bv bulum luto, “Lambc gvtung gvtu:la okkom nolu luka:mvnsudu:n?” Odo bulu kvg cmna aso:pc, mc:dvrra ka:la dagkang. 18Odokkc buluk akonc, Klepas cmnamkonc, Bvm lubito, “Jerusalemso:pc kangkapc gva:nc nowwoi silomclo oko okko idu:ji cdcm kinma:ncdc?”
19Odo bv bulum tawuto, “Okko kapika:n?” Odo Bv bulum luto, “Najaretolok Jisukc agomcmna, sc:kobv Ru:ncpvnckc kangkolo:lang appvng tani: kangkolo agerlo:la agomlok, lungor lunna:ji 20odokkc kapc ngoluk dormo ager gernckvdv:dok bottarya:nc kvdv:dc:lang migom kvdv:dc mokedopc tolvgtoji, odokkc Kuruslo Bvm moketoji. 21Cmpige:la ngolu mc:tintagai Bv Israeldcm mopvtpcncdcai. C:, odokkc odo appv:dcmyam, silo cdcmpinamc lowumko ika:bong. 22Odokkcsin, ngoluk nc:ng ajonckkonc ngolum mc:la mcngapla:ma:pc imoto. Bulu agodo rokompc dungai odokkc Bvk sima:dcm pa:tomang; 23Odokkc bulu scmpc lula gvlattoku jc bulu taycng among lutad lunckomvnc kangorpc ka:begto, sc:kobv lubitonc jc Bv turra dung. 24Ngoluk akke agodo:pc gvka, odokkc nc:ng tani:kdv:dc lukamdcmpc ka:ot; cmpige:la bulu ka:begtoma.”
25Odo Bv bulum luto, “C:i monba:-ba:nc tani:kvdvnga, lungor lunc appv:dc lunam kvdv:dcm aso-aso:pc mc:jvgnc kvdvnga! 26Kristobv cdc ipusire: kvdv:dcm pa:pcnam mangalang odokkc Bvk ungjvgkolo dungkupcnamai?” 27Odokkc Mose:kolokkclang lungorlunc kvdv:dokkc lurobbomna Bv Ru:nckc agom adgab appv:dcm lukur lule:la lubito Bvk agom lunamdcm.
28Cdcmpila bulu do:lung kcra:do:pc gva:to bulu okolopc gvdungaji. Bv gvbarpc cmna ikangai, 29ckvdaggom bulu Bvm ke:ke:mo:re:pc, scmpc lula gogtumto, “Ngoluk lcdulo du:tobong, kapila:nc su:pak yumc ayirka:bong odokkc longgc gvngapka:bong.” Cdcmpila Bv buluk lcdulo du:mvnkapc gvkang.
30Bv buluk lcdulo tcbuldo du:mvndodcm, Bv pita:dcm la:sa:to odokkc aipai cmto, odokkc cdcm bulum bito. 31Odo buluk amik kvdv:dc darabkang odokkc bulu Bvm kangkinto; odokkc Bv buluk kangkodokkc yokkang. 32Bulu akoncm akonc luka:mvnsuto, “Ali: lambcdo ngolum agom ludodo ngoluk asin ara:bo gua:manggalang Bv ngolum Ru:nckc agom adgabdcm tamge:la pokurpole:la pobidodo?”
33Odokkc bulu odo ayirv:do darobla Jerusalempc gvlattoku; odokkc bulu vyvngkolang akodcm gvkumsula du:dopc pa:to odokkc buluk lcdulo du:mvnnc kvdv:dc, sc:kobulu ludaganc, 34“Ru:tumbv aroru:pc darobkangku, odokkc Simonmc lcngkansuto!” 35Odo bulu ali:lambcdo kapc ika:ji bulum lubito odokkc pitangcm penpordodcm kapc Bvm kangkintoji bulu lubito.
Jisubv Bvk Agom Tadjvgla Gvmvnnc Tani:kvdv:dcm Lcngkansunam
(Met 28.16-20; Mark 16.14-18; Jo:n 20.19-23; Ager 1.6-8)
36Bulu cdcm lula du:dodcm, Jisubv avdc buluk pongkokdo dagkansuto. 37Cmpige:la bulu pcssamna jintakkang, odokkc bulu yaloko ka:begto cmna mc:paklvgto. 38Odokkc bv bulum luto, “Nolu kapila mc:dvrdang, odokkc kapila noluk asinkvdv:dc tawunam agomc lendang? 39Ka:tok ngok alakkvdv:scmna: alckvdv:scm, ngowyvng sidc; ngom gakkvtoka, odokkc ka:tok;
40“Kapila:nc yalodokkc adinclang alongc kamang ngokkcm nolu ka:begnamdcmpc. 41Odokkc ckvdaggom mc:popc mc:jvgtoma:nc, odokkc mcngapla:ma:pc ika:ji, Bv bulum luto, Nolukkc o:kai sc dopcnamko du:nci?” 42Bulu Bvm a:sannam ongo intungko bito, 43odokkc Bv cdcm la:to odokkc buluk kangkolo doto.
44Odo Bv bulum luto, “Sc-bulu ngok agomkvdv:dc ngo nolum oko okodcm ludu:ji ngo noluk lcdulo du:mvndodo:bong, jc ngok agomcm Mose:kc lujvg lurodo odokkc lungor lunamkvdv:do odokkc ni:tomkvdv:do adkamdcmpc ingapru:pa:yc.”
45Odo Bv Ru:ncpvnckc agom adgabnam kvdv:dcm mcngkindopc buluk asinkvdv:dcm mcngkinmoto, 46odokkc bulum luto, “cdcmpila scmpc attak, jc Kristodc ipusire:ycm pa:pa:do odokkc lowum longcdo sikolokkc darobkupcnammc, 47odokkc tani: rcngam appv:so pa:plokkcm mc:yinsukunammcm lutadam bipcnammc, Jerusalemdokkc lurobbomna. 48Nolu sc appv:sok lukanbiya:nc. 49Odokkc ka:toka, ngo ngok Ba:bukc pesula lunamcm nolukkolo tolvgdung; cmpige:la sc nogorso du:tedpo:toka, nolum tayc:tokkc ilang gvla:nanncm moru:lvgma:sisscm.”
Jisumc Taycng Amo:to:pc Dc:bomkunam
(Mark 16.19-20; Ager 1.9-11)
50Odo Bv bulum mo:tcngkc Betani:pc gvbokang, odokkc Bvk alagcm lagsangge:la Bv bulum aipai bito. 51Bv bulum aipai bila du:dodcm, Bv bulukkolokkc mcpansuto, odokkc taycngamo:pc gvbokangku. 52Odokkc bulu Jerusalempc airu:pc mc:pola gvlattoku, 53odokkc kumko okumdo lo:dvscm Ru:ncpvnckc aipai pa:la du:tvto.
Currently Selected:
LU:KKC 24: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.