JO:N 2
2
Kanna:dok Midang
1Lowum longcdo Galildok Kanna:do midangko modungai, odokkc Jisukc ancdc odo dungai; 2Jisumcsin mida:do:pc gogtungai, Bvk agom tadjvgla gvmvnnc tani:kvdv:dcm odok lckopc gogtc:la. 3Angur ala:dcm cdvlo bitoji, Jisukc ancdc Bvm luto, “Bulukkc angur alangc kama:bong.”
4Odo Jisubv bvm luto, “C:i Anna, ngom no o:ko gertoka cmna mc:dang? Ngok ayirc pvngangcima:da.”
5Bvk ancdc ager gerya:nc kvdv:dcm luto, “Bv nolum okkomci luycji itok.”
6Cdcmpinamc motki: pvkcngkopc odo tedla lc:tungai, Jiwudi: kv:dv:dok napv narcmonam inam gvnam lcgangc, appv:do yi:nyi koma:m yvngum mu:nkopc a:nc. 7Jisubv bulum luto, “Motki:kvdv:dcm asiko pvlvgtok.” Odo bulu lv:po:do:pc ri:pokla bi:dopc cdcmbulum pvlvgto. 8Bv bulum luto, “Su:pak asudo:ko suglentoka, odokkc donam tv:nam inamsok igurgvgurncdcm cdcm bombikang.” Cdcmpila bulu cdcm bombikang. 9Donam tv:namdok igur-gvgurncdc cdvlo cdcm tvngka:toji asidc odo angur ala:pc ikang, odokkc cdc okolokkc pvnga:doji (ager gernc asi pvlvgya:nc kvdv:dc kindagagom,) donam tv:namdok igur gvgurncdc magbodcm gogge:la bvm luto, 10“Appvng tani:yc ainc angur ala:dcm orpo:dag; odokkc tani:kvdv:dc cdvlo binamdcmci tv:ycnc, odomvn cddvpc tv:poma:ncdcm; cmpige:la no ainc angur ala:dcm su:pakpc lc:tag.”
11Sidc, kanggodkvdv:dok lcngkananarpo:namdcm Jisubv Galildok Kanna:do lcngkanto, odokkc Bvk Ru:tumkvsa ilang-gvlangcm lcngkanto; odokkc Bvk agom tadjvgla gvmvnnc kvdv:dc mc:jvgkang. 12Odok lcdudo Bv Kapernaumpc gvkang, Bvk ancdc:la Bvk bvrrangkvdv:dc odokkc Bvk agom tadjvgla gvmvnnc tani:kvdv:dcm gvbosula; odokkc olo bulu lowum lo:pi:k du:to.
Jisubv Kumko Okumdo:pc Gvnam
(Met 21.12-13; Mark 11.15-17; Lu:k 19.45-46)
13Jiwudi:kvdv:dok gvbo:la gvnamdok donam tv:namdc aninpc pvnga:dagaboi, odo Jisubv Jerusalempc gvkang. 14Kumko okumdo Bv vbo go:rom odokkc me:r sobencm odokkc parongkvdv:dcm kola du:dopc, odokkc murkongcm bulu rcnamkonam agerlo bikup-bilapmvnsunam kvdv:dcm gvbegsuto. 15Odokkc rvbvkokki dcmnancko moge:la, Bv bulu appv:dcm mcnnenamlvgto, kumko okumdokkc moro:pc, me:r sobenclang vbo go:ru kvdv:dcm mcntc:danna; odo Bv murkong bikup bilap-mvsunc kvdv:dok anvr murkong-kvdv:dcm yarrenambito odokkc buluk tcbulkvdv:dcm kurradambito. 16Odokkc Bv cdc parong konc kvdv:dcm lubito, “Sc attarkvdv:scm bomapkangkuk; nolu ngok Ba:bukc okumdcm attar koko-rcko okumpc iyok.” 17Bvk agom tadjvgla gvmvnnc tani:kvdv:dc mc:pa:toku cdcmjc adla lc:tagnc cmna, “Nok okumdok lcganc mc:bomsunamdc ngom mcngkesula simoyc.”
18Jiwudi:kvdv:dc odo Bvm luto, “No oko kanggodko ngoluk lcga:pc lcngkkanna:dang scm gernamlcgangc?” 19Jisubv bulum lubito, “Sc kumko okumscm mopen-moyentoka, odokkc lowumlo, ngo cdcm mopvnycku.”
20Jiwudi:kvdv:dc odo luto, “Sc kumko okumscm mokolo yi:pi:kolang akkcng dv:takko ikang, odokkc no lowum longclo motenyckunc?”
21Bv cmpige:la Bv avkc amvrdok kumko okumdcm lukang. 22Cdcmpila cdvlo Bvm sikolokkcm turmokakuji, Bvk agom tadjvgla gvmvnnc tani:kvdv:dc Bv cdcm luka cmna mc:pa:toku; odokkc bulu Jisubv oko agomdcm lukaji odokkc Ru:nckc agom jvggabdcm mc:jvgto.
Jisukc Tani: Asin-Agercm Kinnam
23Cdcmpidodcm Bv Jerusalemdo Gvbo:la Gvnamdok donam tv:namdcm dododcm, Bvk aminno bojcrungc mc:jvgto cdvlo Bvk kanggod inamkvdv:dcm ka:toji; 24ckvdaggom Jisubv bulum avdc mc:tintomang, 25kapila:na Bv tani: appv:dcm kinapdagai odokkc tani: lcgangc sc lukanbinam kvdv:scm mapcnam kamangai; kapila:nc Bv avdc tani:lo okko du:ji kindagai.
Currently Selected:
JO:N 2: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.