2 KORINTIANGKVDVNG 6
6
1Bvkkokki lckopc agercm gerbosula, odokkc, ngolu nolum kumna:sola: ludung Ru:ncpvnckc ayangabodcm cmmumpc torvgsuyoka. 2Kapila:nc Bv ludag,
“Torvgsudv ayirdo ngo nolum tadto,
odokkc mopvdo longcdo ngo nolum modumsuto.”
Ka:toka, su:pakna torvgsula:nam ayirdc; ka:toka, su:pakna mopvnam longcdc:nc.
3Ngolu sck lambclo:sin mokomnammcm lc:mang, odomvlojen oko imurkosin ngoluk ager gernamdo pa:ma:ycpc. 4Ckvdaggom Ru:ncpvnckc ager gerncpc ngolu avyc avycm appvng lambclo aidopc lusudo: kvnggv:pc mcnga:sula. 5Ipusire: pa:namlo, torpc ager gernam kvdv:lo, dungko-ycko kama:pc ipusire: pa:dom, dcmdokvdv:dcm, makana:lo tumla lc:dom, uru:sare:dowcm, kvnggv:pc mcnggapla ager gerdom, toya:la darra du:dom, doma:pc menna du:dom. 6Napv-narcngkokki, kinnamkokki, menya:sula du:namkokki, asin aya:pc mc:namkokki, Angunnc Yalodc, narc:pc:sc:nc ayangc, aropaknc agom lunamc, odokkc Ru:ncpvnckc tornamdc; 7dormokanamdok yoktung-katokki lagbvk alakdok lcgangc odokkc lakkedok lcgangc; 8mcnggcnamlo odokkc mcnggcma:namlo, ainc cmna lunamlo odokkc lume: cmna lunamlo. Ngolum yadgo:ncpc ludag-gvdag, odokkc ckvdaggom arro; 9kinma:nampc innc odokkc ckvdaggom aiyo:pc kinnamc; sinncmpc innc, odokkc ka:tok ngolu turdung; mogvtmomatnammcmpc innc, odokkc ckvdaggom mokemang; mc:dvrc bi:ncmpc innc, ckvdaggom lo:dvscm mc:pola dung; 10opanncmpc innc, ckvdaggom bojcrungcm mircmmonnc; okkosin kama:ncmpc innc, odokkc ckvdaggom appvngc dung.
11Ngoluk nappangc nolukkcpc kokala dung, Korintiangkvdvnga; ngoluk asinc bottadag. 12Nolu ngolukkokki motum-morummang, cmpige:la nolu av-avkvdv:dc avkc aipc mc:namkvdv:do motum-morumsudag. 13Lulatsukolo ngo ko:kangkvdv:do:pc lukamdcmpc agomcm ludo–noluk asin kvdv:dcmsin pontamotoka.
Ui Inc kvdv:do Birudi:pc Lutad Lula Lc:nam
14Mc:jvgma:nckvdv:dokki ajoncm jonsula midangcm moyoka. Kapila:nc dormokancdokkclang aima:nc ager gerncdokkc jonsupcnamc okko du:n? Cdcmanggom pva:dokki kcmodokkc oko ajon jonsunammc du:n? 15Kristokc Belialkokki asin tolvgmvnsunammc du:n? Cdcmanggom mc:jvgnc akolokkc mc:jvgma:nc akolokki okoko lckolakkonamko du:n? 16Ru:ncpvncmc kumko okumdokki monam moimangdokki lckopc oko asin mc:namc du:n? Kapila:nc ngolu turra du:nc Ru:ncpvncmc kumko okumc; Ru:ncpvncbv kapc lutoji,
“Ngo buluk lcdulo du:mvnyc odokkc buluk ara:lo gvgo:yc,
ngo buluk Ru:ncpvncpc iyc,
odokkc bulu ngok tani:pc iyc.
17Cdcmpidag buluk ara:dokkc gvlentoka odokkc bulukkolokkc angutoka,
Ru:tumbv ludag,
odokkc narc:ma:nc okkomsin gakkvyoka;
odo ngo nolum gogrvgsuyc.
18Odokkc ngo nolukkcpc abupc iyc,
odokkc nolu ngok awopclang omcpc ingapyc,
appv:pc ilang-gvla:nc Ru:tumbv ludag.”
Currently Selected:
2 KORINTIANGKVDVNG 6: MISIBSI
Highlight
Share
Copy
Want to have your highlights saved across all your devices? Sign up or sign in
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
