MATHAI 26
26
Isua je Tewchat ra Kahedeibe
(Mrk 14.1-2; Luk 22.1,2; Jhn 11.45-53)
1Zai Isua ne aipau sam ramme sa kam gai lu dege, pa ne pe gu kenieme je, 2“Hezie kena châng dezai Tat’ntuahengi bam gu de lei be ningnui chî de lei, zai ziemmena Na je gia gai ra hang nîm lu pei gai ’ndu de lei,” ze kacheu de lei.
3Chidadege tingkume gechîngme benai baudime gu gechîngme ze tingkudilangpeu Kaiaphabe gu heguangki gene wangka’ndui de lei, 4Isua je reine ze nîm lu, tewchat ne ra hang penui sam kahedei de lei. 5Kane penui ne “Kahengîbe ting ge â mak te lei, makchai â, baudime ruage kakeleube bam gu daseu,” ze acheu bei de lei.
Bethani ge Isua je ’Nnukkaibe
(Mrk 14.3-9; Jhn 12.1-8)
6Zai Bethani ge Simonbe ka’mpapeu ki ge Isua bambe luage, 7’mpuimi hangkat alabastar taudui pemî hungbe perîmyibe bung tei lu pe dage wang de lei, zai pa mâ teube luage pe peî ge pa ne chize ruî gai bei de lei. 8Kane chize kenieme ne ngau lu dege, penui châkkerâk ti ze, “’Ndaitew ze ’ntakûne aize tewka’ngga lau? 9Aipau taudui ze pemî misongga hang zua lu ze kelaksiame je pei dui zeî lau,” ze penui kacheu de lei. 10Kane Isua ne chize chî lu ze penui je, “’Mpuimi je ’ndaitew ze ningnui tewkakeleu lau? Pa ne a dage tâ peluiyibe tewgaibe kau daseu. 11Kelaksiame ze â pehî’nsangne ningnui dage bam bam la da, kane achu â pehî’nsangne ge ningnui nguabam ra mak lei. 12Ai taudui a pum ge ruîgaibe gene heraw ge bairabe hangge achu teleuzun gai ra pa ne aipau tâ ze tew gai de lei. 13Pelingsing ze ningnui je I rang lei, kedeirei leine ge ai gospel paugaibe leine ge aipaupui tâtewbe rasam sa bam gu lei, pechu chibam ra hangge zeu,” kacheu de lei.
Isua je Nîm ra Judabe Pe suîhezuâgaibe
(Mrk 14.10-11; Luk 22.3-6)
14Chipau châng dege hangkereu-ze-kename ruage hangkat Juda-Iskariotbe ze tingkugechîngme tailam ’mbe tat lu, 15“I ne ningnui je pechu peipat kai bei zai â achu ningnui ne ’ndaikau pei ra lau?” ze kacheu de lei. Dadege penui ne pechu rangkângpum himreu pei bei de lei. 16Chigene seu ze pechu nîm ra gechui gai ra pedâuyibe pa peuchu di de lei.
Isua pe gu Kenieme je Tat’ntuahengi Teseu Nguateube
(Mrk 14.12-21; Luk 22.7-13,21-23; Jhn 13.21-30)
17Chunage ’Nduihîkaimakbe Tingku-ngi gu naimikpui raîlangbe ge kenieme Isua dage wang lu, “Tat’ntuahengi kuak puateu ra ’ndaige ning hang anui teleu gai be ra nang lunei lau?” ze kacheu de lei. 18Dadege pa ne, “Namdi ge hangkat dage tat ze pechu, ‘Geteiliabepeu ne rang ze, a ting â na de lei; a kenieme je ngua lu, Tat’ntuahengi ning ki gene I hengî gu lei, kacheu de lei,’ ze rang gai be lau,” ze acheu bei lei. 19Zai Isua ne penui je ranggaibeibe luigum ze kenieme tew de lei, zai Tat’ntuahengi kuak puateu ra penui ne teleu gai bei de lei.
20Zai hegî dege kenieme hangkereu ze kena je ngua lu, mâ-teu ra pa ’ntaukeu de lei; 21zai penui mâ-teube luage pa ne, “Pelingsing ze ningnui je I rang lei, ningnui ruage hangkat ne achu nîm ra gechui gai gu lei,” kacheu de lei. 22Dadege penui lung hereu-desang di de lei, dadege hangkat-katne ze pechu, “Heguang gau, chize I mei?” ze penui kacheu kam lei. 23Pa ne kak ze, “Mige hekuak ge achu pe ba kerikeuka’nsampeu zene achu nîm gu lei. 24Ziemmena Na â pe rasam rawgai’ndibe luigum ze chang gu lei, kane ziemmena Na je zuapeu ze â pe duângga gu lei! Chipaupeu je â lungkeu mak laîzai pe hang yi’nteu gu lei,” ze acheu bei de lei. 25Dadege pechu nîm ra gechuigaipeu Judabe ne pechu, “Geteiliapeu gau, chize I mei?” kacheu de lei. Zai pa ne pechu, “Nang ne rangbe ze de lei,” acheu bei de lei.
Heguang Muîteseu
(Mrk 14.22-26; Luk 22.14-20; 1 Ko 1.23-25)
26Zai penui mâ-teube luage, Isua ne tingku lu lu, ’nnam gai lu, tiapâng lu, kenieme je pei lei, “Lu lu teu lau, aize a pum lei,” kacheu de lei. 27Zai pa ne hepiak lu lu, pe suiyibe sam pau gai lu, penui je pei lei, “Ningnui ’nteumena aize sak lau; 28aize samhatkaibe gu a jai, misonggame gu hemui kelunbe hang ruîpatkaibe de lei. 29Ningnui je I rang lei, a Peu gu heguangram ge I ningnui je nguasakrechikadaibe mai riâ chang mak tâne aipau grepchî gu ze I sak dai ra mak lei,” ze kacheu de lei.
30Zai penui leu kat tew gai lu dege Olib Loa ’mbe tat ti de lei.
Peterbe ne Isua je ’Ngkimrabe Rangka’ntuabe
(Mrk 14.27-31; Luk 22.31-34; Jhn 13.36-38)
31Dadege Isua ne penui je, “Nemai tingmuî ge a ziegene ningnui ’nteumena kâutat kam gu lei; ‘Melireîpeu je I ne lak ku, dezai meli ramme â rariptat kam du lei,’ ze raw gai gum zeu. 32Kane I chukadaibe chângge Galili ’mbe ningnui suage I ne tat’ntua gu lei,” ze kacheu de lei. 33Peterbe ne pechu salia ze, “Nang ziegene penui kâutat kam di sede I â mâtew-tewsede kâutat ra mak lei,” ze kacheu de lei. 34Isua ne pechu, “Pelingsing ze ningchu I rang lei, nemai tingmuî sing ge ’nruirie kua makge nang luachum achu ’ngkim gu lei,” ze acheu bei lei. 35Peterbe ne pechu, “Nang chaibe ge nguachai ra chang sedu I â ningchu ’ngkim ra mak lei,” kacheu de lei. Zai chigum ze kenieme leine kacheu kam de lei.
Gethsemane ge Isua Kakellumbe
(Mrk 14.32-42; Luk 22.39-46)
36Dadege Isua penui je ngua lu, Gethsemane kacheube bâm ’mbe tat ti de lei, zai pa ne pe gu kenieme je, “Wîge I tat ze kellum ze bambe kakge aige ’ntaukua lau,” ze acheu bei de lei. 37Zai Peterbe benai Zebedaibe na hangna je ngua lu pe lunghereu ze pe duângga-desang di ze bam lei. 38Dadege pa ne penui je, “A keringbe hereu-desang ze chai ra gum de lei; aige bam ze a pamtew rakkua lau,” ze kacheu de lei. 39Zai kecheînege pa tatpat lu, kâu’ngkumkeu lu kellum ze, “A peu, changdui zaine â aipau piak ze a dagene peize ’mbiatat te lau, sedu a sui mak lei, kane ning sui lei,” ze kacheu de lei. 40Zai kenieme tailam pa wang dege penui â jeikeu kam laleube pa ngau de lei; zai pa ne Peterbe je, “’Nchetkak kat riâ du ningnui achu rakkua lak mei? 41Keduaibe ge ningnui gut mak ra hang ’ntîng ze kellum bam lau; herui â nei lei, kane hemeipum â peran-ga lei,” ze kacheu de lei. 42Zai pakenabe ge pa tat dai ze acheu ze kellum ze, “A peu, aipau piak ze I sak melulak te lei dizai â, ning sui ne peize chang lau,” kacheu de lei. 43Zai pa wang dai dege, penui jeikeu kam di laleube pa ngau de lei, penui jeineu-desang di dadegeu. 44Zai penui je pa sâu gai nan ze pakechumbe pa tat ze kenû luigum ze kakellum de lei. 45Chipau châng dege â, kenieme tailam pa wang lu, penui je, “Ningnui jeitemichai bam rei mei? Pie le lau, panehî wang mui de lei, zai ziemmena Na je hemuime ba ge peipat kai ’nde lei. 46Chu lu ze tatchu kei lei; pie le lau, achu nîm ra kechuigaipeu wang mui de lei,” kacheu de lei.
Isua je Nimbe
(Mrk 14.43-50; Luk 22.47-53; Jhn 18.3-12)
47Pa acheu sa bambe luage, kenieme hangkereu-ze-kename ruage hangkat, Judabe ne tingkugechîngme benai baudime gu gechîngme ne langgaibeime baudime je ngua lu, hiazutkie benai hetui ramme tei lu wang de lei. 48Chunage pechu nîm ra kechuigaipeu ne ’nchetchirabe hang penui je salia ze, “I ne keputkairapeu ze pa de lei, pechu nîm le lau,” ze acheu bei de lei. 49Dadege Isua tailam pa zunwang lu, “Kellum, geteiliapeu!” ze kacheu de lei. Zai pechu keput kai bei de lei. 50Isua ne pechu, “A kangpeu gau, ’ndaikau tâu hang wang lau?” kacheu lei. Chidadege penui ne hang lu, Isua je herakgap lu, pechu nîm lu de lei. 51Zai pie le lau, Isua dage bamme hangkat ne pe ba huapat ze pe gu hiazutkie tatpat lu, tingkudilangpeu gu kebang je bi bei de lei, zai pe kun bitak ’ndi de lei. 52Chidadege Isua ne pechu, “Pebâm ge ning gu hiazutkie kai dai ne lau; ’nteumena ne hiazutkie teibe kau â, hiazutkie gene pa ga gu daseu. 53Chuna du angelme chang seruk tum kereu ze kena suadu kie ze luakatne a taige lang gai ra a Peu dage I kiechilakbe hangge ningnui ’nning gai mei? 54Kane chigum dizai â Hera gu leisi ge rawdiakkaibe wanghimchangrabe ze ’ndaigum ze tewpui le ra lau?” ze kacheu de lei. 55Chipau luage Isua ne baudime je, “Hiazutkie ramme, zai hetui ramme tei lu ze, mâ-hegasutteube kau je nîm ra gum ze achu nîm ra ningnui pat mei? Patingnai’nsangne kellumki ge ’ntau ze I mâ-geteilia bam bei ze achu ningnui nîm mak zeu? 56Kane kemeume gu leisi sam ramme tewpui gai ra hangge airamme leine wangchang de lei,” kacheu de lei. Chidadege kenieme ’nteumena ne pechu sâu nan ze pak kam di de lei.
Samrambeki suage Isua Bambe
(Mrk 14.53-65; Luk 22.54,55,63-71; Jhn 18.13,14,19-24)
57Zai Isua je nîmlume bau ne leisirawme benai gechîngme wangka’nduime bâm ge tingkudilangpeu Kaiaphabe dage pechu nguatat ti de lei. 58Kane Peterbe â kedeu ’mbene pe chai suitat ze, tingkudilangpeu ki kizesua riâ suichang de lei, zai helung ’mbe pa gut lu, Isua peireige ’ndaikau tew gai gu mei be ngauchang kam ra hangge hekêtkaime ruage ’ntaukua bam de lei. 59Chunage tingkugechîngme benai Sanhedrin ge rezieteime ziemmena leine ne Isua je tewchat ra hangge pe peireige karasa ne sakki tewrame hang peu de lei, 60kane karasa sakkitewrame gekieme wang ze sakkitew da, kane penui gu sakki sam ze mâ de kebuibe ’ngga tai lei; nâlangbe ge hangna wang lu, 61acheu sa ze, “Aipaupeu ne rang ze, ‘I â Hera gu kellumki tew’nsia lu, hezie kechumne lung gene tew dai dui lei,’ ze pa kacheu zeî lau,” ze penai kacheu de lei. 62Dadege tingkudilangpeu saplepchu lu, pechu, “Nang â mâ de kak kai ra ga mei? Aime zene ning peireige ’ndaikau sakkitew gai lau?” kacheu de lei. 63Kane Isua â pe kuaneu mak bam lei. Dadege tingkudilangpeu ne pechu, “Keringbe Rapeu ji gene ningchu I kadeseu lei, nang Krista, Hera Na lei zaine â anui je rang lau?” kacheu de lei. 64Isua ne pechu, “Nang ne aigum ze sa gai ’nde lei. Kane ningnui je I rang lei, aipau châng dezai ziemmena Na je Reziechipeu ba hezat’mbia ge ka’ntaube, zai tinggîm kemâu ramme peirei gene wangkeube ningnui ngau gu lei,” ze kacheu de lei. 65Chidadege tingkudilangpeu pe puâ hit ze “Hera je sakahebâbe sam pa sapat la de zeî lau. ’Ndaitew ra kêdabe sakki anui ’nnang dai ra rei lau, pa ne Hera je sakahebâbe ningnui chuna seu de zeî lau. 66Ningnui ’ndaikau ’nning gai lau?” kacheu de lei. Penui ne, “Pa â chaikezei lei,” ze kak lei. 67Dadege Pe ju ge penui ne ’nchai’ntui gai de lei, zai pechu lak kai de lei; zai hanggesame ne penui ba ne gepei ze, 68“Nang Krista, anui je rang gai ni lau! Châu ne ningchu lak lau?” ze kacheu de lei.
Isua je Peterbe Ka’ngkimbe
(Mrk 14.66-72; Luk 22.56-62; Jhn 18.15-18,25-27)
69Chunage Peterbe â kizesua hela ’mbe ’ntau bam de lei. Zai ka’ngguapui hangkat ne pe dage hang lu, “Nang du Isua Galili’mpeu dage bambe kau mei se lau,” ze kacheu de lei. 70Kane pa ne, “Nang samsabe parimba I â mâ de chî me lei,” ze penui ’nteumena suage pa ka’ngkim lei. 71Zai heki-kegup ’mbe pa tatpat dege, ka’ngguapui kêdapui ne pechu ngau dai di de lei, dadege pa ne chige sapkuame je, “Aipaupeu â Isua Nazareth’mpeu dage bambe kau de lei,” ze acheu bei de lei. 72Dadege pa ne, “I â chipaupeu je chî me lei,” ze deseu ze ’ngkim kadai de lei. 73Mâtiegemakse chige sapme ne Peterbe je, “Pelingsing ze nang du penui ruage hangkat kau lei, ning sam ruak gene ningchu ranglia de lei,” ze acheu bei de lei. 74Chidadege â pa ne pe runne pe peireige deseu ze, “Aipaupeu je I â chî me lei,” ze kacheu de lei, zai luakatne ’nruirie kua di de lei. 75Dadege â Isua ne, “’Nruirie kua makge nang luachum achu ’ngkim gu lei,” ze kacheube sam ze Peterbe ’nningdau dai di de lei. Dadege pa tatpat lu, pe lungsittew ze hap ti de lei.
Currently Selected:
MATHAI 26: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
