MATHAI 15
15
Gechîng Telungsie
(Mrk 7.1-13)
1Chipau chângge Pharisaime benai leisirawme Jerusalem ’mbene Isua dage wang lu ze 2“Ndaitew ze ning kenieme gechîng-telungsie ze ka’ngka lau? Mâ-teurabe suage penui ba ’ntik mak zeu,” ze kacheu de lei. 3Pa ne penui je kak ze, “Ningnui ’ndaitew ze ningnui gu gechîng-telungsie hang ziegene Hera gu sam ze ka’ngka lau? 4Hera ne, ‘Ning peu benai ning pui ngeutew lau,’ zai mi-mige de ‘Pe peu je mei nu pe pui je mei saka’nsiabe kau â, peize chai sing de lau,’ ze die gai ’ndi daseu. 5Kane ningnui ne, ‘Mige ne pe peu je mei nune pe pui je mei ze Nang a dagene ngau ra bambe ze â Hera dagene pei gai ’nde lei, ze acheu rang gai dizai â, pa ne pe peu ngeutew ra ’nnang me lei,’ ze kacheu de lei. 6Chigum ze ningnui gu gechîng-telungsie hang ziegene ningnui ne Hera gu sam tew’ngga ’nde lei. 7Ningnui helunglimpungme gau! Isaiabe ne ningnui deu ge acheu ze rangka’ntuabe ze gesang de lei, pa ne sabe ge:
8‘Aipau baudime ze penui mui ne achu hengêutew lei,
kane penui lung â a dagene deu-sang-deu lei;
9mêruang gene achu penui kellum ze,
ziemmename maning tak zene keneibe geteiliabesie hang chak kai ze mâ-kagetei lei,’ kacheube zeu” ze kacheu de lei.
Ziemmena je Tewkahebâbe Zat ramme
(Mrk 7.14-23)
10Zai baudime je pa ne pe dage kûwang lu, penui je, “Seu lu ze chî le lau: 11mi mui ge gutbe zene ziemmename je tewkahebâbe mak lei, kane mi mui gene patbe zene ziemmename je tewkahebâ lei,” ze kacheu de lei. 12Chipau chângge kenieme wang lu, pechu, “Pharisaime aipau samsabe seu lu dege, penui lunggailaktibe nang chî mei?” ze kacheu de lei. 13Pa ne kak ze, “A Peu tinggîm ge kebampeu ne mâ-kiak taugaimakbe leine ze lutua ’ndu lei. 14Peize penui runne bam de lau; penui â kanguame hemikchitbe kau ramme lei. Hemikchipeu hangkat ne hemikchitpeu hangkat je nguatat tizai â, hûm ge penai hangna keu gai gu lei,” ze kacheu de lei. 15Kane Peterbe ne pechu, “Sam’nda ze anui je ranglia’nchi gai lau,” ze kacheu de lei. 16Dadege Isua ne, “Chuna du ningnui chî mak luisui ze bam ge rei mei? 17Mi mui ge gutbe leine mi bungpui ge gutchang lei, zai chiramme hela ’mbe pat bambe ngau mak mei? 18Kane chi mi mui gene patbe ramme â mi lung gene patbe kau lei, zai chize ne ziemmename je deîkahebâ lei. 19Mi lung gene ’nningka’nsiabe ramme, kegîbe, kahemabe, hangleutewbe, hegasutteube, karasa sakkitewbe, zai sakahebâbe ramme pat daseu. 20Airamme ne ziemmename ze deîkahebâ lei; kane mi ba ’ntik mak ze mâ-teube ne ziemmena ze deîkahebâbe mak lei,” acheu bei de lei.
’Mpuimi Hangkat Keneibe
(Mrk 7.24-30)
21Dadege chigene Isua tat ti ze, Tira benai Sidonram ge wang gai de lei. 22Zai pie le lau, chipauram gene Kanaan’mpui hangkat pat lu ’nrung ze, “Hei Tingwang Dabidbe Na gau, achu ngau’nggia gai lau; a na heleu’mpui je herasiabe ne tewhereu-desang la de lei,” ze kacheu de lei. 23Kane pa ne sam kat te kak mak tai lei. Dadege pa kenieme wang lu, pechu, “Pa ne anui chai sui ze ’nrungkeleu bam daze tat te ra hang lang gai be lau,” ze pechu kiam lei. 24Pa ne kak ze, “Achu â Israel ki gu meli gadibe dage runne lang gai lei,” ze kacheu de lei. 25Kane ’mpuimi wang lu, pe suage kukdungkeu lu ze, “A Wang gau, achu ’ngngâ gai lau,” ze kacheu de lei. 26Zai pa ne, “Mi name gu tingku lu lu ze hetei ramme dage tuâ gai ne ra â yi mak lei,” ze kak lei. 27Dadege pa ne, “Eu lei, a pau gau, acheusedu hetei ramme ’nsang du pa’mpaupeu mâ-tewbe-kaira gene tewterakeube ze kuaiteu lei,” ze kacheu de lei. 28Chidadege Isua ne pechu kak ze, “Hei ’mpuimi gau, nang keneibe di-desang lei! Nang luneibe luigum ze peize chang lau,” ze kacheu de lei. Zai chipau hî tit ge pe na heleu’mpui je tew’mmi gai bei de lei.
Keteukeneume Misonggame je Tewka’mmibe
29Dadege Isua chigene tat’nduâtat ze Galili sungkling luî tatpat ti de lei. Dadege peloa kehube ramme ge hang lu chige pa ’ntau bam lei. 30Zai baudime ne Isua dage bepîsiame, chuakanime, hemikchime, hekuâpatlakme zai kêdadabe misonggame je ngua lu wang ze penui je pe pî hiage kai bei dege pa ne penui je tew’mmi gai bei de lei, 31dadege pekuâpatlakme dampat ti, zai chuakanime yi di, bepîsiame tatchi di, zai mikchitme ngauchidibe baudime ngau lu dege, ’nningdaulak ti de lei; zai Israelme Rapeu je penui suang de lei.
Chang Medaime je Keibe
(Mrk 8.1-10)
32Zai Isua ne pe gu kenieme je kûwang lu, “Baudime a dage bamme chuna â hezie kechum chang di teu ra hang mâ de gabe ziegene penui je I ngau’nggia-desang de lei; penui ’njei-herei ze tat ra lang gai ra I nei me lei, makchaine â ’mpuî ge penui kemei-mei gu daseu,” kacheu de lei. 33Dadege pe gu kenieme ne pechu, “Baudime aikieme je kei’nggeu ra hang tingku misongga ze hênamkang ge ’ndai’nggene anui lu ra lau?” kacheu lei. 34Dadege Isua ne penui je, “Ningnui dage tingku ’ndaikie la lau?” kacheu de lei. Penui ne, “Sena, zai hekâpoine ramme kecheîne lamui lei,” ze acheu bei de lei. 35Dadege baudime je kedei ge ’ntau ra die gai lu dege, 36pa ne tingku sena benai hekâ tei lu ’nnam ze tiapâng gai lu kenieme je pei de lei, dadege kenieme ne chiramme baudime je pei gai de lei. 37Zai penui ’nteumena teu lu ’nggeu kam lu de lei; zai penui teuka’nsakbe pesuine ’ntui sena ruipui lu lei. 38Zai geteume hepui-hena je chak kai mak ze ’mpeumi chang medai lei. 39Zai baudime je tat ra lang gai nan ze, ’nnei ge pa â chu lu, Magadan bak ’mbe tat ti de lei.
Currently Selected:
MATHAI 15: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
