HABAKKUK 1
1
1Kemeu’mpeu Habakkukbe ne ngaube Hera gu keliâbe.
Samram ’Nzeimakbe Deu ge Habakkukbe Pe Lungneube
2Hei Tingwang gau,
’ngngâ gai ra hangge ’ndaitie ge I kû bei ze nang ’ngking gai mak ze bam ra lau?
Makchai, “’Nggî-hegei la de lei!”
ze ningchu pau gai bei ze nang tew’nring gai mak bam ra lau?
3’Ndaitew ze tâ-kesiabe tewbe achu teilia,
zai kakeleube ramme ngau bam ra pei lau?
Tewka’nsiabe benai tewkakeleube a masuage bam bam lei;
’nggî-kahegeibe benai desiesiabe zuachu la de lei.
4Chipauziegene hingde ze peran-ga di,
zai samramka’nzeibe zuapat ta di de lei.
Ziemmena kesiame ne pelingtewme je ’nzuichim lei,
chipauziegene samrambe ka’ngkuibe zuapat lei.
Tingwang ne Kakbe Sam
5Heramzatme ramme je pie gai ni lau,
zai ngau gai ni lau;
ningdaulakluisui ze bam lau.
Ningnui suage ranglia gai bei sede ningnui ’nnumtewmakrabe tâ ningnui ting ge I ne tâ kat tew gai gu lei.
6Pie le lau, Kaldiame lumpumsiabe,
zai ka’nchapbe kau zat,
kedeirei dit luî gechimpedakdatat ze miramme dei ramme sutruabe kau zat je I ne tei’nsapchu gai gu lei.
7Penui ze â mi kiâkumakbe zai mi kehingbe kau lei;
penui samrambe benai penui ngeudibe â penui gene zuapat lei.
8Penui gu hekun ramme â keriakkau suadu ’nzet lei,
hegî ting gu henei ramme suadu peraksia lei;
eu lei, penui gu hekun ramme ne herei guagut lei.
Penui gu hekunchingchuame kedeu ’mbene wang lei;
kelie ne teu ra pa hetak luî ge liamzuai keube gum ze penui du liamwang lei.
9Penui ’nteumena ’nggî-hegeirabe hangge wang lei;
tewrabe ma ze penui sua ’mbe gipedakda gut lei.
Deseî je gum ze penui bang hangge ruika’ndui lei.
10Penui â heguangme je keraichai ze bam,
zai samramme rezieteime je teihenuitew lei.
Keriengdi ramme je penui ka’nnui lei;
chize sut le ra hangge kedeitum kebau’ngnguchu lu ze bam lei.
11Chidadege tingkai gum ze penui â guipelarittat ti de lei,
penui hedie’ngka zai kahemui lei,
penui ranchibe ze penui rapeu chang lei!
Habakkukbe Pelungneube Paugaikadaibe
12Hei Tingwang a Rapeu, Ka’nchibe Hera gau,
nang ze betunmakbe Hera mak semei?
Anui chai ra mak lei.
Hei Tingwang gau,
samram gai ra hangge nang ne penui je ’nchet kai ’ndi de lei;
Hei tingchutum kedibe gau,
tewsâ ra hangge nang ne penui ze beichu gai bei de lei.
13Kesiabe ngaurabe mik hangge ning mik â ’nchi’nteu’ndibe kau de lei;
zai tâ-kesiabetewbe nang â piechi lak lei;
’ndaitew ze pejaîsiame je nang pie bam,
zai helungriaksiame ne penui suane ka’nchime je deî’nggakam’ndibe luage nang ning kuâneu mak bam lau?
14Ziemmena je nang ne sungkling gu hekâ benai mâkâupui ramme,
penui peireige kanguapeu gabe gum ze bam ra tew gai bei de lei.
15Hereime ne kakuai ne penui je hekâ je gum ze zupat kam ’ndi de lei;
pe gu chîakrak ne penui je ’nrakpat kam ’ndi lei;
zai penui gu chîakrak ge penui je kai’ndui gai lei;
chidadege pa pe suiyi zai ’ntakediâu bam lei.
16Chipauziegene penui chiâkrak je kellum ze herâtewbe pei gai de lei;
zai pe gu chîakrak hangge mâ-perîmyibe rû gai lei.
Chigene penui dam hang misongga ngau,
zai teu kam lak bam ra pei bei daseu.
17Chidaze penui gu chîakrak tew’nrua’nsui ze,
zai ngauka’nggiabe ga ze heram zat ramme je tew’ngga’nsuî bam ra de semei?
Currently Selected:
HABAKKUK 1: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
