EKSODAS 9

Kaurui ramme Chaibe

1Chidadege Tingwang ne Mosabe je, “Pharaobe dage gutchu lau, zai pechu, ‘Hebraime Rapeu, Tingwang ne aigum ze rang lei, “A gu ziemmename je peize tatchu lau, dezai penui ne a guâ ’nggua le ra hangge zeu. 2Nang ne penui je tat ra peimeu, zai penui je teigim ze bam di rei zai â, 3pie le lau, ’nduloa ge ning gu kaurui ramme, hekun ramme, hekunmerângne ramme, put-hu ramme, kebuidung ramme, zai melidung ramme peireige herarît keteube wangbe gene Tingwang ba huakeu gai gu lei. 4Kane Israelme gu kaurui benai Ijipme gu kaurui kakge gechâmbe Tingwang ne tew gai gu lei, chidezai Israelme gu kaurui ramme leine ze â mâ de chai mak ra hangge zeu,” ze acheu zeu’ ze acheu salia be lau” ze kacheu de lei. 5Zai Tingwang ne pehî riâ gai de lei, acheu sa ze, “’Nchumai ge Tingwang ne aipau tâ ze heram lungge tew gai gu lei,” kacheu de lei. 6Zai bechaibe mai ge Tingwang ne aipau tâ ze tew gai de lei; Ijipme gu kaurui leine chai kam di de lei, kane Israelme gu kaurui ze â katte chai mak lei. 7Dadege Pharaobe ne ziemmena lang gai de lei, zai pie le lau, Israelme gu kaurui gene â katte chai mak lei, kane Pharaobe lung ze chibi-bi di de lei, zai pa ne ziemmename je tat ra pei mak lei.

Teuteriêne Ka’ndetbe

8Zai Tingwang ne Mosabe benai Aaronbe je, “Timbun bakuî puiting ze ’mmang gene bua lu ze Pharaobe mikngau gene Mosabe ne peize tinggîm ’mbe ’nruk kai be lau. 9Zai chize ne Ijipram dei luî ge kemût chang gai ra zai Ijipram dei luî ge ziemmename benai hekaune peireige teuteriêne sungpat ra hangge zeu,” ze kacheu de lei. 10Chidadege penai ne ’mmang gene timbun lu lu, Pharaobe suage sap kai de lei, zai Mosabe ne chize tinggîm ’mbe ’nruk kai bei de lei, dadege chize ne ziemmename benai hekaune peireige teuteriêne sungpatbe chang di de lei. 11Zai heduaîtewchime ze teuteriêne sungpatbe zene Mosabe suage sapchi ta di de lei, heduaîtewchime benai Ijipme leine peireige teuteriêne pattibe ziegeneu. 12Kane Tingwang ne Pharaobe lung ze tew’nchi gai bei de lei, zai pa ne penui kuâ ’ngking mak tai de lei; Tingwang ne Mosabe je ranggai’ndibe luigum zeu.

Desak Keube

13Chidadege Tingwang ne Mosabe je, “Hechuasûn chu lu ze Pharaobe suage sap lu ze, pechu, ‘Hebraime Rapeu Tingwang ne aigum ze rang lei, “A gu ziemmena je peize tatchu lau, dezai penui ne a guâ ’nggua le ra hangge zeu. 14Chunage â a gu herarît ramme leine ning lung ge zai ning guâ ka’ngguame benai ning gu ziemmename dage I lang gai gu de lei, dezai kedeirei ge I gumbe kau mî de ga lei be nang chî le ra hangge zeu. 15Chuna gene I a ba getuapat ze herarît ne nang benai ning gu ziemmename je tewsâ le duî de lei; zai kedeirei gene ningchu â tew’ngga gai bu de lei; 16kane aipau deu hanggene ningchu ring ra hangge I pei gai de lei, ningchu a gu reziechibe teilia ra dezai kedeirei leine tâluî a ji tew’ndi gai le ra hangge zeu. 17Nang â a gu ziemmena peireige ning runne ningchu tei’ngngu gai lu, zai penui je tat ra pei mak lamui rei lei. 18Pie le lau, ’nchuamai chuna gumbe hî ge desak kêu’nchi-kadesangbe ze beichube gene seu ze chuna riâ changbe ge Ijipram ge mâdau de wangchanggaimakbe ruikeu ra tew gai gu lei. 19Chidaze chunage ning gu kaurui benai ’nduloa ge ning gu bamdibe leine teiwang kam lu ze ka’nseube bâm yibe ge kai zu lau; ziemmena benai hekaune nguawang mak ze ’nduloa ge bamdibe leine peireige desak ruikeu gai bei ze penui chai gu daseu,” ze acheu zeu’ ze acheu rang gai be lau,” ze kacheu de lei. 20Chidadege Pharaobe guâ ka’ngguame ruage Tingwang sam je hingbe kau zene penui gu kebang ramme benai kaurui ramme je heki ramme ge ’nseu de ra tew gai bei de lei; 21kane Tingwang sam ze mâ-hangge du riamgaimakme â penui gu kebang ramme benai kaurui je ’nduloa ge sâu gai ’ndi de lei.

22Chidadege Tingwang ne Mosabe je, “Tinggîm ’mbe ning ba getuachu gai lau, dezai Ijipram dei luî, ziemmena benai hekaune zai helu ge mâ-hîmra bambe leine peireige Ijipram dei leine ge desak ruikeu ra hangge zeu,” kacheu de lei. 23Chidadege Mosabe ne pe gu hetui tinggîm ’mbe getuachu gai de lei; zai Tingwang ne tingcheibe benai desak lang gai bei de lei, zai kedeirei ge hemi ruikeu gai de lei. Zai Ijipram peireige desak ruikeu ra Tingwang ne tew gai bei de lei; 24desak ruikeu chu di de lei, zai desak ruikeube ge tingkakepitbe sau mak ze bam de lei, desak ruikeu’ngkie-kadesangbe Ijipram ze heram zat changdibe chângge heram dei luî ge mâdau de wangchanggaimakbe ruikeu gai de lei. 25Desak ruikeube zene Ijipram dei luî ge heduloa ge bambe leine, ziemmena benai kaurui je du tewkau kam ’ndi de lei; zai desak ruikeube zene helu gu mâ-hîmra ramme tewkau kam ’ndi de lei, zai hingbang keî leine tuâbet kam ’ndi de lei. 26Israelme bambe bâm, Goshenram ge runne desak ruikeu mak lei.

27Chidadege Pharaobe ne lang gai bei ze, Mosabe benai Aaronbe je kûwang de lei, zai Pharaobe ne penai je, “Chuna hî ge I hemui gai ’ndi de lei; Tingwang â ’nzei de lei, zai I benai a gu ziemmena ne ka’ngkui de lei. 28Tingwang dage kie gai lau; aipau hegikeube benai desak ze bui di daseu; ningnui je tat ra I pei gu de lei, zai ningnui bamkeu gai dai ra mak te lei,” ze kacheu de lei. 29Mosabe ne pechu, “Namdi gene hela I zuapat gap kai dezai, Tingwang dage I a ba getuapat kai gu lei; hegikeube sau gai du, zai desak ruikeube ze sau du de lei, dezai kedeirei ze â Tingwang gu lei be nang chî le ra hangge zeu. 30Kane nang benai ning guâ ka’ngguame ze â Tingwang Hera je hing mak kerei lei be I chî lei,” acheu bei de lei. 31(Flaks benai barli â tew’nsia kam ’ndi de lei, barli â pebuî’mbuî di, zai flaks â pengûmne tumpat ze bam di dadegeu. 32Kane dekuîmeu â katte tew’nsia mak te lei, penui â puakpat keluamakbe ziegeneu). 33Chigum ze namdi ge Pharaobe dagene Mosabe zuapat ti de lei, zai Tingwang dage pe ba getuapat kai de lei; chidadege hegikeube benai desak ruikeube sau di, zai kedeirei ge tingrui ta di de lei. 34Kane tingruibe zai desak benai hegikeube saudibe Pharaobe ne ngau lu dege â pa hemui gai dai ’ndi di de lei, zai pa benai pe guâ ka’ngguame penui lung tew’nchi lu bam dai di de lei. 35Chigum ze Pharaobe lung ze tew’nchi gai ’ndi de lei, zai Israel baudime je tat ra pei mak tai de lei, Tingwang ne Mosabe dagene sagai’ndibe luigum zeu.

Currently Selected:

EKSODAS 9: ZEMEBSI

Highlight

Copy