EKSODAS 27

Herâtewbe-kaira

(Eks 38.1-7)

1“Akasia ching ne herâtewbe kaira hangge petâ sâu mengeu zai pedit sâu mengeu nang tew gai ra lei; chi herâtewbe-kaira ze pedit-petâ ’nsamrap ra lei, zai pehut ze â sâu chum ra lei. 2Zai pemik medai ge bekie ramme nang tew gai ra lei; chi bekie ramme ze herâtewbe-kaira ge tewhelua gai ra lei, zai chize kangngâgeî ne nang kûm gai ra lei. 3Timbun lu gai ra hangge heli ramme nang tew gai ra zai tuakbe kuak ramme, zai hegeî’ntui ramme, zai hegeîrang ramme, zai hemikuak ramme tew gai ra lei; aipau merua ramme leine ze kangngâgeî ne nang tew ra lei. 4Kangngâgeî ne perak hangge nang tew gai ra lei; zai chi perak ge pemik medai ge kangngâgeî ne tewbe heriagua ramme medai tew gai ra lei. 5Zai chize herâtewbe-kaira tû kangge kai ra lei, chidezai chi perak ze herâtewbe-kaira pa’mpi riâ ge ’nrakhangchang le ra hangge zeu. 6Zai akasia ching ge herâtewbe-kaira puarabe hangge bekang ramme nang tew gai ra lei, zai chiramme ze kangngâgeî ne nang kûm ra lei; 7zai kangngâgeî riagua ramme ge hechingkang ramme zapela gai ra lei, chidezai herâtewbe-kaira puabe luage kena lambia ge puabe kang ramme bam le ra hangge zeu. 8Hechingpakpi ramme ne herâtewbe kaira ze giaguâ lu ze pelung peruahuâng ze nang tew gai ra lei; kedeiloa’ntûm ge ningchu teiliagai’ndibe luigum ze nang tew gai ra lei.

Kakellumbe-paîki Rieguarabe hang

(Eks 38.9-20)

9“Kakellumbe paîki ze nang riegua gai ra lei. Naimik kêu ’mbia ge rieguabe ze katlam ’mbia hangge petâ ze sâu haî kat banut langkie ’nneulube ne dakzunlube paî zene lîm gai ra lei; 10kechia ’ngkai zai bechia dungrabe kuiki ramme ze du ’ngkai kangngâgeî ne tew gai ra lei, kane kechia ramme gu peguak ramme benai bepeirei gu paichiekang ramme ze â gepût ne tew ra lei. 11Chipau luigum ze tingpeî ’mbia hangge du petâ ze sâu haî kat lîm gai ra lei, kechia ramme ’ngkai zai dungrabe kuiki ramme du ’ngkai kangngâgeî ne tew gai ra lei, kane kechia ramme gu peguak ramme benai bepeirei gu paichiekang ramme ze â gepût ne tew ra lei. 12Zai naimik kêu ’mbia ge pedit hang â sâu rengeu lîm gai ra lei, chige kechia kereu benai dungrabe kuiki kereu bam ra lei. 13Kiziê ’mbia naimik pat ’mbia ge pedit ze sâu rengeu ra lei. 14Kemuiki gene katlam ’mbia ge paîlîmrabe ze sâu kereu ze mengeu ra lei, zai chige kechia kechum benai dungrabe kuiki kechum tew gai ra lei. 15Kêdabe lam’mbia ge du paîlîmrabe ze sâu kereu ze mengeu ra lei, chige kechia kechum benai dungrabe kuiki kechum bam ra lei. 16Rieguabe gu kemuiki lîmnambe paî ze petâ sâu ’ngkai ra lei, chize ka’nzaibe zai gieremangbe zai tologie zai banut langkie ’nneuzunlube ne dak lu ze ’ngngim ne heziak tewzunlube ne ra lei; chige gechia medai benai dungrabe kuiki medai bam ra lei. 17Rieguabe gechia ramme leine ze gepût ne tewbe paichiekang ramme ne ’ntukguâ ra lei; peguak ramme ge du gepût ne tewbe ne ra lei, zai gechia dungrabe kuiki ramme ze kangngâgeî ne tew ra lei. 18Rieguabe ze petâ sâu haî kat, pedit sâu rengeu, zai pehut sâu mengeu, banut langkie ’nneu lu dakzunlube ne lîm gai ra zai kangngâgeî ne tewbe gechia dungrabe kuiki ramme tew gai ra lei. 19Ka’nnang-nangbe ge kakellumbe-paîki ge teirabe merua leine, zai kakellumbe-paîki gu heria chakbe ’ntung ramme benai rieguabe ge heria chakbe ’ntung ramme leine ze kangngâgeî ne tew ra lei.

Kachâbung Reîkuabe

(Leb 24.1-4)

20“Zai kachâbung ze tausau mak ze tau bam ra kaichi le ra hangge, ’ntaubarabe hang niaklube olib taudui ka’nchibe teiwangrabe hangge Israelme je nang samdie gai ra lei. 21Samhatkaibe hingdebung suage lîmnambe paî ze hela ’mbe kakellumbe paîki lungge, Aaronbe benai pe name ne chize hegî gene hechua riâ chang ze Tingwang masuage ’nningtinggeu ze bam ra lei. Aize Israelme ne penui gu rehei piakeu tâne rei ze bamrabe betunmakbe hingde chang ra de lei.

Currently Selected:

EKSODAS 27: ZEMEBSI

Highlight

Copy