EKSODAS 24

Samhatkaibe Tew’ntipkaibe

1Zai pa ne Mosabe je, “Nang benai Aaronbe, Nadabbe, zai Abihube, zai Israelme gu gechîngme ruagene ziemmena riaksena je ngua lu, Tingwang dage hang lau, zai kedeu ’mbene achu kellum lau. 2Mosabe runne Tingwang dage wang’nna ra lei; kane kêdame â wang’nna mak ra lei, zai baudime je â pe dage nguahang mak ra lei,” kacheu de lei.

3Mosabe ne wang lu, Tingwang gu sam ramme leine benai pe gu hingde ramme leine baudime je salia bei de lei; zai baudime ne kuâ kat ze sa ze, “Tingwang ne sagaibe sam ramme leine anui tew gu lei,” ze kak te lei. 4Zai Tingwang gu sam ramme leine Mosabe ne raw gai de lei. Zai pa hechuasûn chu lu kedeiloapî ge herâtewbe-kaira tew gai de lei, zai Israelme zat kereu ze kena bambe luigum ze tingchusum kereu ze kena sum gai de lei. 5Zai pa ne Israelme ruage rehangme je lang gai ze, penui ne Tingwang dage rûkambe-râtewbe pei gai ze getumsei ne desieyibe-râtew gai de lei. 6Zai Mosabe ne hejai ze pa’mpi â tei lu hegeî’ntui ramme ge kai de lei, zai pa’mpi ze pa ne herâtewbe-kaira ge kezin gai de lei. 7Zai pa ne samhatkaibe leisikuak ze tei lu, baudime seube ge kiâliâ gai de lei; zai penui ne, “Tingwang ne sagaibe leine anui tew gu lei, zai anui hekuâpheuchime chang gu lei,” ze kacheu de lei. 8Zai Mosabe ne hejai ze tei lu baudime peireige kezin gai de lei, zai acheu sa ze “Pie le lau, aipau sam ramme leine gu luigum ze chi Tingwang ne ningnui dage tewgai’ndibe, samhatkaibe gu hejai zeu,” kacheu de lei.

9Chidadege, Mosabe benai Aaronbe Nadabbe, Abihube zai Israelme gu gechîngme ruage riaksename hang di de lei, 10zai Israelme Rapeu je penui ngau de lei; zai chige pe pî kangge Sapphir chu ne tew’nsamraplube luigum, zai tinggîm gum ze ’nchichiak ze bam de lei. 11Zai Hera ne Israelme ruage besuitewme peireige pe bahuâ kai mak te lei; Hera je penui ngau lu de lei, zai teu ze sak te lei.

Sinai Loa ge Mosabe Bambe

12Tingwang ne Mosabe je, “Kedeiloa’ntûm ’mbe a dage hang lau, zai chige bamkuâ lau; zai penui je geteilia ra hingde benai samdiegaibe I ne rawlube tingchudepei kena ningchu I pei gu lei,” kacheu de lei. 13Chidadege Mosabe ne pe guâ ka’ngguapeu Joshuabe je ngua lu hang de lei, zai Mosabe â Hera deiloa ’mbe hang di de lei. 14Zai pa ne gechîngme je, “Ningnui dage anai wang dai mak tâne aige anai je bamkuâ lau; zai pie le lau, Aaronbe benai Hurbe â ningnui dage la lei; mige hetû-hera bambe kau â penai dage peize tat lau,” kacheu de lei.

15Chidadege kedeiloa peirei ’mbe Mosabe hang di de lei, zai kemua ne kedeiloa ze chûm kam ’ndi de lei. 16Tingwang ngeudibe Sinai Loa ge ’nnai ze bam de lei, zai kemua ne chize hezie seruk chûmgit bam de lei; zai pasenabe mai dege â kemâu zuilung gene Tingwang ne Mosabe je ku de lei. 17Chunage Tingwang ngeudibe ze Israelme mikngau ge â kedeiloa ’ntûm peireige hemi chube gum bam di de lei. 18Zai kemâu lung ’mbe Mosabe gut ti de lei, zai peloa’ntûm ’mbe chu di de lei. Zai kedeiloa peireige Mosabe hezie hedai tingmuî hedai bam di de lei.

Currently Selected:

EKSODAS 24: ZEMEBSI

Highlight

Copy