EKSODAS 12
12
Kapatbe-ngi
1Ijipram dei lungge Mosabe benai Aaronbe je Tingwang ne rang gai ze, 2“Aipau kêu ze ningnui hangge hekêu riamchuraibe kêu chang ra de lei; aize ne ningnui hangge tingkum gu raîlangbe kêu chang ra de lei. 3Israelme bau leine je aize ranglia be lau: Chipau kêu gu hezie kereu mai ge penui peunaria chai sui ze kibau kat ge meli’nsei kat-kat teiwang ra lei; 4zai meli’nsei teiwangrabe hangge kelak chei’ntêu dizai â pe kining’mpeu benai herua lu ze, ziemmena riak pie ze hangkat-kat ne tewduibe riâ gene meli’nsei ze teiwang ra lei. 5Ningnui gu meli’nsei ze â heziâkgabe kau beseipoine kum kat kau ne ra lei; meli ruagene mei nune kemei ruagene mei ze beseipoine kat ningnui teiwang ra lei; 6zai aipau kêu gu hezie kereu ze medai mai ge Israelme bau leine wang’ndui ze hegî ge penui gu meli’nsei ramme je tewchatkairabe mai riâ ningnui reîkua ra lei. 7Chidezai penui ne hejai gêsa â tei lu, chize penui mâ-teubeki ramme ge kemuikung kena ge benai kemuikung ’nreibe ge kai ra lei. 8Chipau mai tingmuî ge chipau hemei ze ’ngga lu ze penui teu ra lei; ’nduihîkaimakbe tingku benai gekabebuâ penui teu’mpam ra lei. 9Chize ’nggei mei nune hedui ne sua lu ze mei ze ningnui teu se lau, kane pe peî ramme benai pe pî ramme, zai pelunglet ramme ze pelane ’ngga lu ze teu kam ra lei. 10Zai chize hechua riâ hangge mâ de ningnui ’nsak kai mak ra lei, hechua riâ chang ze ’nsakpatbe ze â ningnui rû ne ra lei. 11Aigumbe tak gene ningnui chize teu ra lei: ningnui kia ’ngkang lu, ningnui pî ge kêrum ramme kai lu, zai ningnui ba ge hetui ’ntui lu, zai kelua ze chize ningnui teu ra lei. Aize â Tingwang gu kapatbe-ngi lei. 12Chipau mai muî ge Ijipram dei ge I tatpelapat ku lei, zai Ijipram lungge ziemmena benai hekaune nakeuraibe leine je I ne tewchat kû daseu; zai Ijipram gu hera ramme leine peireige I ne samram gai gu lei: I â Tingwang lei. 13Ningnui bambeki ramme peireige hejai zene ka’nchetbe chang ra de lei; zai hejai ze I ngau dezai ningnui je I tat’ngkatat tu lei, zai Ijipram je I tewhereu dezai ningnui je tew’nsiarabe herarît ningnui peireige wangchang ra mak lei.
14“Nemai ze â ningnui hangge chibamrabe naimikpui chang ra de lei, zai aipau mai ge ningnui Tingwang dage hengî ze reibam ra lei; ningnui gu rehei leine ge aize riagai’ndibe hingde chang ze reibam ra lei.
’Nduihîkaimakbe Tingku-ngi
15“Hezie senane ningnui ’nduihîkaimakbe tingku teu ra lei; raîlangbe mai ge ningnui ki ramme gene ’nduihî ramme tei’mbia kam gai ra lei, raîlangbe mai gene chu ze pasenabe mai riâ changbe lungge mige ne ’nduihîkaibe tingku teu zai â chipau peu je â Israelme ruagene tuâpat ku daseu. 16Railangbe mai ge benai pasenabe mai ge ningnui ka’nchibe ’ndui reibam ra lei; chipau mai ramme ge â tâtew mak ra lei; kane ’nteumena teu ra ka’nnangbe hetak runne ningnui teleuteu dui lei. 17Zai ’nduihîkaimakbe tingku-ngi ze ningnui reibam ra lei, aipau mai gîmsingbe ge ningnui bau ramme leine je Ijipram gene I ne nguapat kai daseu, chidaze ningnui gu rehei piakeu tâne aipau mai ze â betingbeta hangge riagai’ndibe hingde chang ze ningnui rei ra lei. 18Railangbe kêu gu hezie kereu ze medai mai hegî ge ’nduihîkaimakbe tingku ningnui teu ra lei, zai chigum ze hezie ’ngkai ze kat mai hegî chang mak tâne ningnui reibam ra lei. 19Hezie sena lungge â ningnui ki ramme ge ’nduihî peize bam mak ra lei; ’nduihîkaibe mige ne teu dizai â pa ze hesang’mpeu mei nune heram deina’mpeu mei lêuzaidu chipaupeu je â Israelme bau ruagene tuâpat ku daseu. 20’Nduihîkaibe leine â ningnui teu mak ra lei; ningnui kelungbe bâm leine ge ’nduihîkaimakbe tingku ningnui teu ra lei,” kacheu de lei.
Kapatbe-ngi Railangbe
21Chidadege Mosabe ne Israelme ruage gechîngme leine je ku lu, penui je, “Ningnui kibau-bau hangge meli ramme kelâng le lau, zai kapatbe-ngi gu meli tewchat kai zu lau. 22Hissop-kît tei lu ze, chize hegeî’ntui ge hejai bambe ge sûm gai le lau, zai hegeî’ntui ge hejai bambe ne ’ngkam peî ge benai kemuikung kena ge kenei gai ra lei; zai ningnui ruage mî de hechua riâ chang mak tâne pe ki kemui gene hela zuapat mak ra lei. 23Ijipme je gî ra Tingwang tatpat ku daseu; zai kemuikung peî ge benai kemuikung kena ge hejai bambe pa ngau dezai chipau kemui ze â Tingwang ne tatkatat tu lei, zai tewka’nsiapeu je ningnui ki ramme ge gut ze gî ra pei ra mak lei. 24Aipau tingnasie ze ningnui benai ningnui chaname hangge betingbeta riagai’ndibe hingde chang ze reibam ra lei. 25Zai pa ne hatkai’ndibe luigum ze Tingwang ne ningnui je peigairabe heram ge ningnui wangchang dezai aipau tingnasie bambe ningnui reibam ra lei. 26Zai ningnui name ne ningnui je, ‘Aipau reibambe rimba ze ’ndaikau lau?’ ze acheu dezai, 27ningnui ne, ‘Aize â Tingwang ne kapatbe-ngi gu herâtewbe lei, Ijipram ge pa ne Ijipme je gîchat ze anui ki ramme ze â tatkatattibe ziegene reibam de lei,’ ze acheu ra lei” ze kacheu de lei. Zai baudime penui peî kei’nkumkeu lu kakellum de lei.
28Chidadege Israelme tat ze tew de lei; Tingwang ne Mosabe benai Aaronbe je samdiegai’ndibe luigum zeu.
Meraibe Chaibe
29Muisum ge Tingwang ne Ijipram lungge heguang-bamrâ ge ka’ntaupeu Pharaobe na meraibe gene kebangki ge bambepeu na meraibe riâ chang ze, kaurui nakeuraibe leine ze tewchat kam ’ndi de lei. 30Dadege Pharaobe, pa benai pe guâ ka’ngguame leine, zai Ijipme leine tingmuî ge ’nrakchu kam di de lei; zai katte chaigaimakbe ki-kelak gadibe ziegene Ijipram ge hapka’nrungbe ’nnia bam di de lei. 31Zai pa ne Mosabe benai Aaronbe je tingmuî gene kûwang lu, penai je, “Zuachu de zu lau, ningnai hangna benai Israelme â a gu ziemmename dagene tat te zu lau; zai tat ze ningnai ne rangbe luigum ze Tingwang guâ ’nggua zu lau. 32Ningnai ne rangbe luigum ze ningnui gu melidung ramme benai kebuidung ramme tei lu ze tat te zu lau; zai achu du ’nnam gai lau!” kacheu de lei.
33Zai heram gene hela ’mbe penui je langtua kelua ’nde ra hangge Ijipme ’nchuanua bam di de lei; penui ne, “Anui ’nteumena chai kam gai gu de lei,” ze kacheube ziegeneu. 34Chidadege Israelme penui gu dekuîkâng ramme ’nduihîkaimakbe lua gu tei lu, penui gu dekuî kakeneibe kuak ramme ze penui paî ramme ne kit lu, penui keîtoa ge kai de lei. 35Mosabe ne ranggaibeibe luî Israelme du tew de lei, penui ne Ijipme dagene gepût benai gechâk kerua zai paîheni kie de lei; 36zai Tingwang ne Ijipme mikngau ge penui je hengêutew ra tew gai bei de lei, chipauziegene penui ne penui gekiebe pei bei de lei. Chigum ze penui ne Ijipme je tewgekum gai bei de lei.
Israelme Ijipram Sâugaibe
37Zai Israelme bau ’mpuimi benai napoine ramme je riam gai makse ziemmena chang haî seruk Ramese gene Sukkoth ’mbe tebeîtewtat ti de lei. 38Kêdabe kau ramme du penui je nguatatka’mpam de lei, zai kaurui misongga ze melidung ramme benai kebuidung ramme du penui tei lu tat te lei. 39Zai Ijipram gene penui gu ’nduihîkaimakbe dekuî keneilube kâng ramme penui teitatbe ze penui lang de lei, keluakkelet Ijipram gene penui je kumpatkai’ndibe ziegene penui hetak hangge mâ de teleu le mak dadegeu.
40Ijipram ge Israelme lunggaibe tingkum riak â kum haî medai ze himreu de lei. 41Zai kum haî medai ze himreu kam gai dege, chipau mai gîm sing ge Tingwang gu ziemmena baudime leine Ijipram kedei gene zuapat ti de lei. 42Chipau mai ze â Ijipram kedei gene penui je nguapat kai ra hangge Tingwang ne reîkuabe mai tingmuî de lei; chidadege penui gu rehei ramme piakeu tânege aipau mai muî ze â Israelme leine ne reîkuabe mai muî hanggene reibam de lei.
Kapatbe-ngi Reirabe-sie
43Zai Tingwang ne Mosabe benai Aaronbe je, “Aize kapatbe-ngi reibambe tingnasie gu hingdetewgaibe de lei: hesangkedeume â chize teu mak ra lei; 44kane rangkâng ne luilube kebang â penui je ningnui ne rumgetenlube châng dezai â chize teu dui lei. 45Lunggailêupeu mei nune tâtew ra puîwangbe kau mei chime â chize teu mak ra lei. 46Chize heki kat gene teu ra lei; hemei ze kecheîne leusede heki gene hela ’mbe teipat mak ra lei; zai chize hemeira katte tewbet mak ra lei. 47Israelme bau leine chize reibam ra lei. 48Zai ningnui dage hesang heluîchâmme bam ra chang ze Tingwang dage kapatbe-ngi reibam lêuzai â peize pe dage ’mpeumi bamme leine je rumgeten ne lau, chidezai pa wang’nna ze chize reibam dui lei; pa ze du heram deina’mpeu gum ze chang ra de lei. Kane rumgetenmakbe kau â chize mî de tew mak ra lei. 49Heram deina’mpeu hangge du zai ningnui ruage hesang heluîchâmme bamgaileume hangge du hingde â kat ra lei,” kacheu de lei. 50Chipau luigum ze Israelme tew de lei; Tingwang ne Mosabe benai Aaronbe je samdiegai’ndibe luigum ze penui tew de lei. 51Zai chipau mai gimsing ge Ijipram kedei gene Israelme bau leine je Tingwang ne nguapat kai de lei.
Currently Selected:
EKSODAS 12: ZEMEBSI
Highlight
Share
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
