DANIEL 9
9
Danielbe Pe gu Zemmena hangge Kakellumbe
1Ahasu-erabe na Dariabe, Medeme jairia kau, Babilonram ge heguang hang sumgaibeipeu — 2I, Danielbe, Tingwang gu sam kemeu’mpeu Jeremiabe dage periak rangliabe gene Jerusalem sâuhammuî’nderabe tingkum riaksena ’nsanggairabe ze leisikuak ka’nchibe gene I chi de lei.
3Chidadege Tingwang Hera lam I ’nreiwang lu ze teseurei ze meseigiria paî bâ lu, zai timbun ’nnuk lu ze I kellum ze gekietew de lei. 4Tingwang a Rapeu dage I kellum ze, baudime gu hemui ralia ze, “Hei Tingwang pengêudi zai mi ngauhingbe Hera, pechu kehungme benai pe gu samde ramme teime dage samhat kai ze hung’ntip ze bambepeu, 5ning gu samde ramme benai besie-hingde tewgaibe ramme gene anui lietat ze, zai tâ-kesiabe tew ze, zai anui ka’nggibe tâ tew ze hemui gai ’nde lei; 6ning guâ ka’ngguame ramme, heguangme samramme, zai anui peume benai heram gu ziemmena leine dage ning ji gene sampaugaime, kemeume sam ’ngking mak tai de lei. 7Hei Tingwang, katelingbe ze nang â ning gu de lei, kane anui, ningchu lungsangtewbe gabe ziegene heram leine ge nang ne anui je kumraripkaibeibe bâm Judaram benai Jerusalem ge bamme zai Israelram leine ge kenahia ge zai kedeu ’mbe bamme, anui â anui ju ge ka’ngngambe ne pui ze bam lei. 8Hei Tingwang, ning peireige anui ne hemuigai’ndibe ziegene anui gu heguangme, anui gu heguangsinme zai anui peume peireige zai anui chui ge ka’ngngambe wangchang de lei. 9Tingwang anui Rapeu â anui ne pechu ’nggi bam sede kelunbe benai hungka’nggiabe ne pui lei; 10ning guâ ka’ngguame ramme, kemeume je anui suage kai bei sedu, pe gu hingde ramme tei lu ze Tingwang anui Rapeu kuâ pheusua mak lei. 11Eu lei, Israelme leine ne ning gu hede ’ngka ze ning dagene lietat ze ning kuâ pheumeu de lei. Chipauziegene anui peireige desetkaibe ruî gai lamui lei, Hera guâ ka’ngguapeu Mosabe gu hingde rawgaibe peireige deseu gai lu, pe peireige anui ne hemuigai’ndibe ziegeneu. 12Tingkehube kedibe kangge Jerusalem peireige tâtewgaibe gum ze tew gai mak bam dadege, anui peireige kahereube kedibe teiwanggaibe gezene pa ne anui peireige benai anui peireige samramme bau peireige sa’nsiagaibe, pe sam ramme ze tewpui gai de lei. 13Mosabe gu hingde ge raw gai gum ze, chi kesiabe leine anui peireige wangchang de lei; kane anui tâ-kesiabe tewbe sâu nan ze ning sam samsang chî lu ze anui tei ra tew mak, zai anui Rapeu, Tingwang suigut ze peu mak lei. 14Chidadege Tingwang ne tâ-kesiabe tewbe pie bam lei, chize anui peireige teiwang gai bei de lei; anui ne pe kuâ pheu mak ze bam sedu Tingwang anui Rapeu â tâtewbe ’mpuî leine ge ’nzei ze bam lei. 15Hei Tingwang, anui Rapeu, Ijipram dei gene ning ba ranchi ne ning gu ziemmename je nguapatkaipeu, zai ning runne ning ji tew’ndilupeu, chuna du ning ji di ze bampeu, anui ne hemui tâ tew bam di de lei, anui tâ-kesiabe tew bam di de lei. 16Hei Tingwang, nang kapelingbe leine ziegene ning râtabe benai ning lumpumbe ze ning gu namdi Jerusalem benai peloa ka’nchibe gene peize ’mbia de lau; anui gu hemui ziegene, zai anui pau-paime ne tâ-kesiabe tewbe ziegene Jerusalem benai ning gu ziemmena je anui huâzie ge bamme leine ne sa’nsia ze bam de lei. 17Chidadege Hei anui Rapeu, chunage ning gu kebang ne kakellumbe benai gekietewbe ramme ze ’ngking gai lau, Hei Tingwang gau, ningchu kakellumbeki sâuhammuî’ndibe ge ning ju ne sireba gai dai lau, ning hang ziegeneu. 18Hei a Rapeu, ning kun ’ngngiakeu ze ’ngking gai lau; ning mik rakleppat ze anui je sâuzînggai’ndibe, zai ning ji gene kûgaibe namdi je pie gai lau; anui ne gekietewbe ramme ze pelingtewbe gene ning masuage anui liâgaibe mak lei, kane nang hungka’nggiabe di-kadesangbe ziegene lei. 19Hei Tingwang, ’ngking gai lau, Hei Tingwang, lun gai lau, Hei Tingwang, ’ngking gai zai ning tâ tew gai lau, Hei a Rapeu, gîngtie ta lau; ning hang ziegene ning gu namdi benai ning gu ziemmena ne ning ji kû la lei,” kacheu de lei.
Gabrielbe ne Kemeusam Rangkeligaibe
20Zai a gu hemui benai a gu ziemmena Israelme gu hemui ralia ze, kellum ze Tingwang a Rapeu suage a Rapeu gu peloa ka’nchibe hangge gekietewbe peipatbe-râtewbe peipat lage, 21eu lei, I kellum ze samsabe lua sing ge Gabriel, bepîbang raîlangbe ge keliâbe ge I ngaupeu, hegî, herâtewbe hî gumbe ge kelua-desang ze liamzuaikeu ze achu deî gai de lei. 22Mâ chî ra salia ze achu ka’mpau de lei, zai pa ne achu, “Hei Daniel, mâ-’nningchibe kaningchingbe ningchu pei gai ra I wangkeu lei. 23Bepîbang raîlangbe ge nang gekietewbe luage sam wang de lei, zai ning chu pau gai ra I wang de lei, nang achu hung-kadesang daseu, chidaze sam ze ’nning gai lau, zai keliâbe ngaube ze ’nningchi le lau.
24“Hedeka’ngkabe tew’ngga ra, hemui tew’ntau ra, zai tâ-kesiabe tewbe hangge desieyibetew gai ra, zai kapelingbe betingbeta bam ra teiwang gai ra, zai keliâbe benai pauliâ ka’ntuabe ’nchet kai ra, zai ’nchilangbe bâm ge taudui ’nnuk kai ra hangge ning gu ziemmena benai ning gu namdi ka’nchibe hangge ’ntakkak riaksena tûm sena rangba gai ra die gai de lei. 25Chidaze chuna aize chî le zu lau, zai heguangsinpeu, ’nnukkai’ndipeu wangrabe hangge Jerusalem tewchu gai dai ra sam pattibe gene ’ntakkak sena chang du de lei be ’nningchi le lau; Jerusalem ze perielung hang kai’ndibe ze rieguatuipik kai gu lei, zai chize tingkum haî medai ze himreu medai sapchang gu lei, kane aize â kahereube ting chang gu lei. 26Zai ’ntakkak riakseruk ze kena chângge taudui ’nnukkaibe tew’ngga ’ndu lei, mâ de bam dai ra mak lei; zai heguangsinpeu wangrapeu gu ziemmena ne namdi benai ka’nchibe bâm tew’nsia gu lei; zai betun â hedui dikeube gum gu lei, zai betun-gaibe changbe riâ hereika’nggibe bam gu lei, tew’nsiarabe â samdie gai ’ndi de lei. 27Zai ’ntakkak kat hangge ziemmena misonggame dage samhatkaibe kedibe tew gai gu lei; zai ’ntakkak pa’mpi â herâtewbe benai kela peipatbe deî’nsau ’ndu lei; zai mi ngauhingbe katenetbe kantua peireige chua lu tew’nsiarapeu wang gu lei, dezai mi ngauhingbe tewka’nsiapeu dage samdiegaibe betun-gaibe ruî gai mak tâneu,” ze kacheu de lei.
Currently Selected:
DANIEL 9: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
