DANIEL 5
5
Belshazzarbe gu Wain Luube
1Heguang Belshazzarbe pe gu ziemmena kedime chang kat je ’nnâ gai lu, wain luube-bâm kedibe teleu gai de lei, changme suagene wain penui sak te lei. 2Belshazzarbe ne wain ’ndâu gai lu ze, gechâk benai gepût kuak-piak ramme, pe peu Nebukadnezzarbe ne Jerusalem kellumki gene teiwangbe ramme teipat ra pa ne samdie gai bei de lei; heguang, zai pe gu ziemmena kedime, zai pe nâu ramme, zai nausî ramme je nguasak ra hangge zeu. 3Chidadege gechâkpiak ramme benai gechâkkuak ramme, Jerusalem kellumki gene lube ze penui teigut kai de lei; zai pe gu kedime zai pe nâu ramme benai nausî ramme ze chiramme gene sak te lei. 4Wain penui sak de lei, gechâk, gepût, kangngâgeî, hegeî, heching zai tingchu ne kateleube hera ramme je penui toa de lei.
5Chipau hî sing ge luakatne ziemmena bakêrang getuapat te lei, heguangki ’mbie ge hemibung kaibe chia taige raw gai de lei; ziemmena ba ne leisirawbe heguang ngau lu de lei. 6Dadege heguang â pe ma hâmrei bam di de lei, zai pe lung hereu ze lu lu bam di de lei; zai pe kia kehut ze, pe kukloapui kena kedia-kok-kok ze bam di de lei. 7Dadege heguang ’nrung ze, “Kahekame, Kaldiame, zai hepaudachakme je nguawang lau,” ze kacheu de lei. Zai heguang ne Babilonram gu ziemmena kaningchingme je, “Mi-mige ai rawgaibe kia lu sakelichilume je â, banutpaî bâ gai gu, zai gechâkteuria pengêudibe ’nteu gai gu lei, zai heguangram ge samrampeu pakechumbe ruage dilangpeu hang suang gai gu lei,” kacheu de lei. 8Chidadege heguang gu ziemmena kaningchingme leine gut te lei; kane rawgaibe dak ze penui kiâchi ta di de lei, zai parimba du penui rangliachi mak lei. 9Zai heguang Belshazzarbe pe duângga-desang bam de lei, pe ma hâmrei bam di de lei, zai pe gu ziemmena kedime du penui duângga ze bam de lei.
10Dadege heguang zai pe gu ziemmena kedime ’ncheu heguangpui seu lu ze, pe ki ge heguangpui gut te lei: Zai heguangpui ne, “Hei heguang gau, betingbeta peize ring bam lau; ning lung peize hereu se lau, zai ning ma du hâmmuî ze peize bam se lau. 11Ning ram ge hangkat pa ge ka’nchibe hera ramme gu herui bampeu la lei; ning peu ringbe ting ge kebabe, mâ-’nningchibe, kaningchingbe, hera kaningchingbe gumbe pe dage bam lei be chî lei, zai heguang Nebukadnezzarbe ning peu ne kahekame, Kaldiame, zai hepaudachakme peireige besuitewpeu hang suang gai bei de lei. 12Pa â pe lungyi ’ngkeukiabe kau, mâ-gechîbe zai mâ-’nningchibe, hemang sakelichibe, samchukbe rangkelichi, zai hekim sam raliachipeu Danielbe, heguang ne pe ji Belteshazzarbe ze kubepeu la lei, chidaze chuna Danielbe je kû le lau, parimba ze pa ne teilia gu lei,” ze acheu bei de lei.
Rawgaibe Danielbe ne Rangliabe
13Chidadege heguang suage Danielbe je nguagut te lei. Heguang ne Danielbe je, “Nang Danielbe de mei? A peu heguang dilangpeu ne Judaram gene Judame je kebang hang nîmgutme kebangtewme chaname ruage hangkat ze nang de mei? 14Ning dage ka’nchibe hera ramme gu herui la lei be, zai kebabe, mâ-’nningchibe, zai kaningchingbe yilangbe ning dage la lei be I seu lu de lei. 15Chidadege chunage ai rawgaibe kiâliâ ra, zai parimba achu ranglia ra ziemmena kaningchingme zai lungkahekame je a suage nguawang gai de lei, kane parimba ze penui ne achu rangliachi ta di de lei. 16Kane nang â hekim sam ramme chî duî, zai rangkelichi duî lei be I seu lu de lei; chidaze chuna ai rawgaibe nang ne kiâchi duî zai â, kiâliâ lau, zai parimba ze achu ranglia lau, dezai banutpaî ningchu bâ gai gu, ning guang ge gechâkteuria ’nteu gai gu, zai heguangram ge samrampeu pakechumbe hangge kai gu lei,” ze kacheu de lei.
17Dadege Danielbe ne samkak ze heguang je, “Ning gu kela ze â ning hang peize chang de lau, zai getoabehi ze â miramme je pei be lau; acheusedu rawgaibe ze heguang je I kiâliâ gu lei, zai parimba ze ranglia gu lei. 18Hei heguang, Hera Hulangpeu ne ning peu Nebukadnezzarbe je heguangram zai heguang chang ra pengêudibe, zai hengêutewbe pei gai bei de lei; 19pengêudibe pechu peigaibeibe ziegene ziemmena leine ne, zai pedeime leine ne, zai helad leine ne pechu hing ze kedun ze bam de lei; pe sui-sui ne pa ne tewchatneime je tewchat, zai pa ne luneime je â ring ze bam ra pei, zai pa ne luneime je â tei’ngnguchu gai, zai pa ne hanggesame je â tei’nnakeu gai ze bam de lei. 20Kane pe lung ge kechî-keditewbe ziegene pe lung tew’ndi lu, gechîrettew ze pa bam de lei, chuna â pechu heguang-bamrak gene teikeu lu, pengêudibe lutua ’ndi de lei; 21zai ziemmena ruagene pechu tuâpat kai bei, zai pe lung ze hekaubena gum ze bam ra tew gai bei de lei; zai pa bambe ram ze â hekunmerângne ramme ruage pa bam de lei, zai getum je gum ze timpei ne pechu guî de lei, zai pe pum ge tinggîm gu kezikdui ne tewchim ze bam de lei; Hera Hulangpeu ne ziemmena kaheguangbe peireige besuitew, zai pa ne lunei-neime je heguang chang ra pa ne pei lei be pa chî mak tânai. 22Zai nang pe na, Hei Belshazzar, airamme leine nang chî lu ze, ning lung keikeu lak, 23tinggîm wangpeu peireige nang ne pa suadu di ze bam ra tew, zai pe ki gu hekuak, hepiak ramme ningsuage teipat lu, nang benai ning gu ziemmena kedime, zai ning nâu ramme benai nausî ramme ze chigene wain puasak, gepût râ ramme, gechâk râ ramme, kangngâgeî râ ramme, heching râ ramme, zai tingchu râ ramme luî hang tewgaibe hera ramme mâ-ngauchi lak, seuchi lak, zai mâ de chimakbe kau ramme je nang hengêutew di, kane keringbe benai ning gu ’mpuî leine reî ze peipeu Hera je nang hengêutew mak zeu.
24“Chidadege pa bambe luagene ziemmena ba ze lang gai ze ai rawgaibe ze ’nrit kai de lei. 25Chige rawgaibe sam ze â, MENE, MENE, TEKEL zai PARSIN, kacheube ze de lei. 26Sakakelibe ze â aize lei: MENE: nang heguangram ting ze Hera ne sei gai de lei, tewbetûn gai ’nde lei. 27TEKEL: Hedu gene ningchu ’nchu gai da, nang ’ncha di lei. 28PERES: Nang kaheguangbe ram ’nzipâng gai ’nde lei, zai Medesme benai Persiame hang pei ’nde lei,” ze kacheube zeu.
29Chidadege Belshazzarbe ne samdie gai bei ze, Danielbe je banutpaî ne bâ gai de lei, zai pe guang ge gechâkteuria ’nteu gai de lei, zai heguangram ge samramme hangchum ruage dilangbe chang de lei, ze rangba gai de lei.
30Chipau mai tingmuî ge Kaldia heguangpeu Belteshazzarbe je tewchat ’ndi de lei. 31Pe tingkum riakseruk ze kena gum runne rei lei, Mede’mpeu Dariabe ne heram ze lu lu de lei.
Currently Selected:
DANIEL 5: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
