AMOS 6
6
Israel je Tewka’nsiabe
1“Zaion ge lung’ntaza ze bamme,
zai Samaria deiloa ge ’ntêulung ze bamme,
heram zatme ramme ruagene heram zat dilangbe gu kedime,
penui dage Israel kiduîme ne wang’nsui ze bamme bau ze penui duângga gu lei!
2Kalne ge kapat ze pie gai ni lau;
zai chigene Hamath kedibe geze tat lau;
zai chipau chângge Philistinme gu Gath ge tatkeu gai lau.
Ai heguangram ramme sua â chiramme â yi-ka’nteu se mei,
makchai du ningnui gu heramrai suane â,
penui gu heramrai dika’nteu se mei?
3Ningnui kesiabe tingnaimikpui ze kedeu ’mbe kai nan ze,
Hei tewkakebuakbe bâm ze teiwang’nnagaime bau gau?
4“Hepuagim ne tewbe jeî ge jeime bau,
zai penui jeîra ge temichai ze jeikakelame bau,
zai melidung ruagene melipoine je langteume bau,
zai kauruidung ruagene getumpoine je langteume bau ze penui duângga gu lei;
5’nrabung kuâ ge peruânggabe leu nguajieme bau,
zai Dabidbe ne tew gum ze penui hangge ’nrabung ramme chiampatme bau penui duângga gu lei;
6hepiak kedibe ramme gene wain sakme bau,
zai taudui yilangbe ne penui runne penui je ka’nnukme bau,
kane Josepbe kiduîme je tew’nsiagaibe peireige helung hereumakme bau ze penui duângga gu de lei!
7Chidaze chunage kebang hang nîmtat-rame ruage penui ne keraime chang gu de lei,
zai jeikelarua ze ’ntakediâu ze bamme ga gai kam du de lei.”
8Tingwang Hera ne pe runne ne deseu gai ze (Tingwang baudime Rapeu ne acheu ze sa lei):
“Jakobbe ne gechîrettewbe ze I ngauka’nneî lei,
zai pe gu keriengdi ramme deze I ngaugailak lei;
zai chi namdi benai chige kebamme leine je nîm ra I ne pei gai gu daseu,” ze acheu zeu.
9Zai heki-kelak kat ge ziemmena hangkereu ringpat lêuzai du penui chai kam gu lei. 10Zai hangkat chaidipeu kiduî’mpeu, pechu rû ze kechai kateleupeu ne heki lung gene chaidibe ra ramme teipat ra hang heki lung nuksing ge bampeu je nguapat lu pechu, “Ning dage mige â larei mei?” ze acheu ’nneu gai dezai pa ne, “Ga de lei,” ze acheu gu lei; dezai pa ne, “Ning kuâneu se lau! Tingwang ji anui ne kûpatkaimau ra mak lei,” ze acheu gu lei.
11Pie le lau ni, Tingwang ne pe samdie gai lei,
zai heki kedibe ze lakdesuirui gai bu lei,
zai heki kecheibe du tewpângdesuirui gai gu lei.
12Hekun ramme tingchutelie peireige pak semei?
Mige getumsei tei lu ze sungkling pu gu semei?
Kane ningnui â mâ-pelingtewbe ze chairabe reheu siabe hang tew gai bei,
zai kapelingbe rachî ze keza karîbe hang tew gai bei de lei—
13ningnui Lo-debar ge hesuiyi’nta ze bamme,
“Karnaim ze anui hangge anui ranchi ne anui ne sutlube mak semei?” ze kacheume bau gau.
14“Pie le lau ni, Hei Israel kiduîme gau,
ningnui je ’nggi ra hangge pezat kêdabe zat je I teichu gai gu lei,”
ze Tingwang baudime Rapeu ne kacheu de lei;
“zai ningnui je Hamath gutbe keriekemui gene Araba geuki riâ chang ze tewhereu gai gu de lei,” kacheu de lei.
Currently Selected:
AMOS 6: ZEMEBSI
Highlight
Copy
Compare
Share
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
