TÂTEWBE 20
20
Makedonia benai Akaia ’mbe tatbe
1Zai kakebiengbe sau di dege, Paulbe ne kenieme je kûwang’ndui lu ze penui je gecheulumbup kai lu, rimna ra kellum gai lu ze, Makedoniaram ’mbe pa zuapat ti de lei. 2Chipauram huâzie ge sam misongga ze penui dage gecheulumbup kai ze tatpela ze Gresia ge pa wangchang de lei. 3Chige kêu chum pa ’nnaibam gai lu dege, Siriaram lam ’mbene ’nnei gene pa tat ra ka’nning de lei, kane Judame ne ’ngkim ne pechu tewchat ra kelutewbeibe ziegene Makedoniaram tatpela ze wang dai de ra pa ka’nning de lei. 4Pirrabe na Sopaterbe Beroia’mpeu ne pechu kangzangtew ze nguatat ti de lei; zai Thessalonikame hangna Aristarkabe benai Sekundabe, zai Derbe’mpeu Gaiabe, zai Timothibe zai Asia dei ge bamme Tukikasbe benai Trophimabe, aime ne pechu nguatat ti de lei. 5Penui â raîtat lu ze Troas ge anui je bamkuâ de lei. 6Kane ’Nduihîkaimakbe tingku-ngi bamlube châng ne Philippi gene ’nnei gene tat ti ze hezie mengeune châng ne Troas ge penui dage anui wangchang de lei, zai chige hezie sena riâ anui ’nnai gai di de lei.
Troas Keloa ge Paulbe ’Ngkiâmiebe nâlangbe
7’Ntakkak gu naimikpui raîlangbe mai ge tingku tiapâng ra (hegî teseu teu ra) anui wangka’nduibe ge, Paulbe ne penui dage samsa ze, bechai mai hechua ge pa tat te ra ka’nningbe ziegene muisum riâ pa samsachang ze bam de lei. 8Anui wangka’nduibe ’nreibe sîam ge hemibung du misongga ze ’ntauba bam lei. 9Zai rehang’mpeu hangkat pe ji, Eutikasbe â kemuicheiki ge ’ntau ze bam de lei, Paulbe pa samsabe tew’ntiebi-bidibe ziegene, Eutikabe â jeineu-desang di, jeikeuzut ti de lei, zai hekisiâm pakechumbe gene kedei ’mbe pa ’ngngaîkeu ze chai di ze pechu puachu lei. 10Kane Paulbe ne wangkeu di ze pe peireige keikeu lu pechu hegai lu ze, “Ningnui lung hereu se lau, pa keringbe pe dage larei lei,” kacheu de lei. 11Dadege Paulbe hekisiâm kehu ’mbe hang lu ze, tingku tiapâng lu teu de lei, zai kecheîne bamnak kai dege penui dage hechua tingbapatbe riâ sachang gai di ze chipau châng ne pa rimna di de lei. 12Zai rehang’mpeu ring ze pe ki lam’mbe penui ne nguatat ti de lei, zai penui ne pechu teleuka’mmibe kecheîne ta di ze bam de lei.
Troas gene Miletus ’mbe tatbe
13Kane anui â ’nnei gene tatraî lu ze, Assos ’mbe ’nnei gene tat ti de lei, chigene Paulbe je du ’nnei ge teichu gai ra anui ’nning zeu; Paulbe â kedei ’mbene pe pî ne tat ra kahekabe ziegene anui suage acheu tat ra pa ne rang gai de lei. 14Zai Assos gene anui je pa hedau lu dege, ’nnei ge pechu teichu gai lu ze, Mitilin ’mbe anui wang de lei. 15Zai chigene ’nnei gene anui tat dai ze, bechai mai ne Kios ge anui wangchang de lei; zai bechai mai ge Samos tatka de lei; bechai mai ne Mileta ge anui wangchang de lei. 16Paulbe â Asiaram dei ge pehî tew’ngga mak ra luneibe ziegene, Ephesi tat’ngka ze ’nnei gene tatkelua ze, chang dui zai â, Pentikos mai ge Jerusalem namdi ge wangchang ra ka’nning de lei.
Paulbe ne Ephesi ge Gechîngme je Rimnarabe Samsabe
17Paulbe ne herakiangna ge gechîngme ramme je pe tailam peize wang gai ra Mileta gene Ephesi ’mbe sam lang gai de lei. 18Zai pe dage penui wangchang dege, pa ne penui je:
“Asiaram dei ge gutbe raîlangbe mai gene seu ze ningnui ruage ’ndaigum ze I bam bam mei be tak ze ningnui runne ne chî kam la de lei, 19Judame ne achu tew’nsia ne ra kelutewbe ziegene a peireige kakedakbe ramme lie ze kecheiluilungpungbe benai a mikdui ne Heguangpeu guâ ’nggua ze I bam-bambe tak zeu; 20ningnui hangge gierabe hang saliagai’ndibe benai haimena ruagene zai kelak-gekeu tatruabe gene mâ-geteiliagai’ndibe ramme gene I ’ngngîn dai sua mak ze 21Hera dage helung-heliwangrabe benai anui Wang Isua Krista ge nei’ntip ze bam ra Judame benai Judame-makme Grikme dage I sakkitew-bambe tak zeu. 22Zai chunage pie le lau, Herui Ka’nchibe ’nning ge I keikeu ze Jerusalem ’mbe I hang gu de lei, chige achu ’ndaikau hedau gu mei be I mâ de chî mak zeu; 23kane I chibe â namdi ’nsangne ge a hangge kebangbe benai tewkahereube ramme kaikua la lei be Herui ne achu ranggaibe runne de lei. 24Kane I â a keringbe ze pemîhungbe hang mei nune a hangge pemîhungbe hang mei ze riamgaisua me lei, kane Hera ka’nggiabe gu samkeyibe sakkitew ra Heguang Isua dage I ngaulube geze a hangge tâtew ra kaikuabe benai tâka’ngguabe ge tewpui luzai kam de lei. 25Zai chunage, pie le lau, I ne heguangram rasam ningnui dage tatrua ze pauliâgai’ndime, ningnui ’nteumena ne a ju ngau dai ta du lei be I chî lei. 26Chipauziegene nemai ge ningnui je I rang lei, ningnui hang yirabe benai siarabe zai ringrabe benai chairabe hang â ningnui ne chî du lau, I â mâ de chî ta de lei, 27Hera ne nguatâtewbe rasam ge ningnui dage I bai mak ze salia kam bei la daseu. 28Herui Ka’nchibe ne Heguangpeu gu herakiangna, chi pe jai gene ngaulube, chige kereîme hang ningnui je tewgaibeibe ge ningnui runne ningnui benai melidung pelane je reîchi ze bam lau. 29I tattibe chângge henei pategârasiabe ramme ningnui ruage gut ku lei, zai melidung je ’nsak kai ra mak lei be I chî lei; 30zai ningnui bau ruagene du ziemmena hanggesame ne samsang ze sakedet’nrui ze, kenieme je penui chai sui ra tewgairame zuachu gu lei. 31Chidaze kum chum sing ze a mikdui zâu ze, kemuî-keba sau mak ze ningnui je I mâ-geteigai’mmibeibe ze ’ngngaî mak ze ’nrakhak ze bam lau. 32Chunage Hera dage benai pa ka’nggiabe sam ge ningnui je I peipat kai de lei, chize ne ningnui je tei’nsap kai ra, zai tew’nchigailume ruage pe heu nguaheu ra pei dui lei. 33Miramme gu gechâk mei gepût mei zai paîni ramme mei ze mâ de I ka’nchiebe ga lei. 34Aipau ba kena ne a hangge benai a dage bamme hangge mâ-mâ ka’nnangbe leine tewpat lu de lei be ningnui ne chî lei. 35Heguang Isua ne, ‘Lurabe suadu peirabe ze yi-ka’nteu lei,’ ze ranggaibe sam tak ramme ze chî lu ze tâtewka’nrîbe gene heran-game je ’ngngâ gai sing ra lei be ze mâ-leine ge ningnui je teilia gai bei de lei,” ze kacheu de lei.
36Zai pa acheu ze sa kam lu dege, pa kukdungkeu lu, penui ’nteumena je nguakakellum de lei. 37Dadege penui ’nteumena hap ze Paulbe je hegai lu keput-kagetie de lei, 38pe ju penui ne ngau ta du de lei ze pa ne sagaibe sam ziegene ’nteumena ne penui suisia kam di zeu. Zai penui ne pechu ’nnei ge gepâu gai de lei.
Currently Selected:
TÂTEWBE 20: ZEMEBSI
Highlight
Share
Compare
Copy
Want to have your highlights saved across all your devices? Sign up or sign in
Zeme Naga CL Bible - KEMCI BIBLE
Copyright © 2013 by The Bible Society of India
Used by permission. All rights reserved worldwide.
