Fakahā 3
3
Ko e Tohi ki Sātisi
1Ko e me‘a eni te ke tohi ki he ‘āngelo ‘o e siasi ‘i Sātisí:
“‘Oku ‘iate au e fitu‘i laumālie ‘o e ‘Otuá, pea mo e fitu‘i fetu‘ú. Mou fanongo ki he me‘a te u lea‘aki atú.
‘Oku ou ‘ilo‘i lelei ho‘omou me‘a ‘oku faí. Neongo e lau ‘e he kakai kotoa pē ko e kakai mo‘ui kimoutolu, ka ko e kakai mate pē kimoutolu ia. 2Fei mo ‘ā. ‘Oku toe si‘i homou iví, ‘io kuo mei ‘osi. Mou feinga ke mou kaukaua. ‘Oku ou fakatokanga‘i ‘oku ‘ikai ke mou talangofua kakato ki he ‘Otuá. 3Vakai na‘a ngalo ‘iate kimoutolu‘a e fakahinohino na‘e fai atu‘o mou fanongo lelei ki ai. Piki ki ai, pea afe mei ho‘omou ngaahi angahalá. Kapau he‘ikai ke mou ‘ā leva, pea te mou toki ‘ohovale kimoutolu kuó u a‘u atu, hangē ha kaiha‘á, ‘i ha houa ‘oku ‘ikai te mou ‘amanaki ki ai,
4‘Oku ‘i ai e ni‘ihi ‘iate kimoutolu ‘i Sātisí na kuo te‘eki ai ke ‘uli‘i homou valá he likoliko ‘o e angahalá. Te tau ‘a‘eva teunga hina mo au, he ‘oku taau ho‘omou mo‘uí. 5Pea ko kinautolu kotoa pē ‘e ikuná, ‘e teunga hina. He‘ikai tāmate‘i honau hingoá he tohi ‘o e mo‘uí. Pea te u fakahā ki he‘eku Tamaí mo ‘ene kau ‘āngeló ko ‘eku kau ako kinautolu.
6Ko ena ‘oku mou lau kimoutolu ko e kakai telinga ongo, pea mou fakafanongo ā ki he me‘a ‘oku lea‘aki atu ‘e he Laumālié ki he ngaahi siasí.”
Ko e Tohi ki Filatelifia
7Ko e me‘a eni te ke tohi ki he ‘āngelo ‘o e siasi ‘i Filatelifiá:
“Ko au ‘a e toko taha ‘oku mo‘oni mo mā‘oni‘oni, pea ‘oku ‘iate au ‘a e fuhinga kī ‘a Tēvitá. Kapau te u fakaava ha matapā, ‘e ‘ikai ke toe lava ‘e ha taha ‘o tāpuni‘i. Pea kapau te u tāpuni‘i ha matapā, ‘e ‘ikai ke toe lava ‘e ha taha ‘o fakaava. Mou fanongo ki he me‘a ‘oku ou lea‘aki atú.
8‘Oku ou ‘ilo‘i ho‘omou me‘a kotoa pē kuo faí. Pea kuo u fakaava atu ‘a e matapā ‘a ia he‘ikai toe lava ‘e ha taha ‘o tāpuni‘i. Na‘e ikai foki ke kaukaua fēfē ho‘omou mo‘uí, ka na‘a mou talangofua ki he‘eku fekau na‘e fai atú, pea na‘e ‘ikai ke mou faka‘ikai‘i ko ‘eku kau ako kimoutolu. 9Te mou ‘ilo eni ‘i he me‘a te u fai ki he kakai ko ena ‘oku kau ki he fa‘ahi ‘a Sētané. ‘Oku nau tala ko e kakai kinautolu ‘a e ‘Otuá, ka ko e loi ia. Te u ‘ai ke nau ha‘u ‘o tō tū‘ulutui atu ki homou va‘é. Pea te nau ‘ilo ko hoku ngaahi ‘ofa‘anga kimoutolu.
10Te u malu‘i kimoutolu mei he ‘ahi‘ahi lahi kuo pau ke hoko mai ki he kakai kotoa pē ‘o māmani, he na‘a mou talangofua ki he‘eku fekaú ‘o kātaki‘i e ngaahi faingata‘á. 11Mou pukepuke ‘a e me‘a kuo mou ma‘ú, pea he‘ikai ke to‘o ‘e ha taha ‘a e pale ‘e fakapale‘i‘aki kimoutolú. He ‘e vave pē ha‘aku toe a‘u atu.
12Ko kinautolu kotoa pē ‘e ikuná, te u fokotu‘u taki taha ko ha fu‘u pou ‘i he fale ‘o hoku ‘Otuá, pea te nau nofo ai pē ‘o ta‘e ngata. Te u tohi ‘i he fu‘u pou taki taha ‘a e hingoa ‘o hoku ‘Otuá, pea mo e hingoa ‘o hono koló. Ko Selusalema fo‘ou foki ‘e ‘ohifo mei langi ‘e hoku ‘Otuá. Pea te u toe tohi foki he ‘ū pou ko iá mo e hingoa fo‘ou ‘o‘okú.
13Ko ena ‘oku mou lau kimoutolu ko e kakai telinga ongo, pea mou fakafanongo ā ki he me‘a ‘oku lea‘aki atu ‘e he Laumālié ki he ngaahi siasí.”
Ko e Tohi ki Leotisia
14Ko e me‘a eni te ke tohi ki he ‘āngelo ‘o e siasi ‘i Leotisiá:
“Ko au ia ‘oku ui ko ‘Ēmení. Ko au ‘a e fakamo‘oni ‘oku lea falala‘anga mo mo‘oni, pea na‘e fai ‘e he ‘Otuá ‘iate au ‘ene fakatupú. Mou fanongo ki he me‘a te u lea‘aki atú.
15‘Oku ou ‘ilo e me‘a kotoa pē kuo mou faí. ‘Oku ‘ikai ke mou momoko, pea ‘oku ‘ikai ke mou vela. ‘Oku ou faka‘amu ange ‘e au na‘a mou momoko pe vela. 16Ka koe‘uhí ko ho‘omou māmāfana peé, ‘o ‘ikai momoko, pea ‘ikai vela, ko ia ai te u pu‘aki kimoutolu. 17‘Oku mou tala tokua ko e kakai tu‘umālie mo lavame‘a kimoutolu, pea ‘oku lato ho‘omou fie ma‘u kotoa pē. Ka ‘oku ‘ikai ke mou teitei lave‘iloa homou tu‘utāmaki. He ko e kakai kimoutolu ‘oku faka‘ofa, masiva, kui mo tēlefua.
18Fakatau koula meiate au, he ko e koula ‘a‘akú kuo sivi he afí, pea te mou tu‘umālie mo‘oni ai. Fakatau vala hina meiate au. Pea mou vala ia ke ‘ufi‘ufi‘i‘aki homou tēlefuá na. Pea fakatau meiate au mo ha tulu‘i ki homou matá, ka mou lava ‘o sio.
19Mou afe fakamātoato mei he angahalá. He ‘oku ou fakatonutonu mo tautea ‘a kinautolu ‘oku ou ‘ofa aí. 20Fanongo mai! Ko au eni ‘oku ou tu‘u ‘o tukituki atu ‘i homou matapaá. Kapau te mou fanongo ki hoku le‘ó, pea fakaava ‘a e matapaá, pea te u hū atu pea te tau keinanga fakataha. 21Ko kinautolu kotoa pē ‘e ikuná, kuo pau ke tau nofo fakataha mo au ‘i hoku taloní, ‘o hange pē ko ‘eku nofo fakataha mo e Tamaí ‘i hono taloní koe‘uhí ko ‘eku ikuna ‘a‘akú.
22Ko ena ‘oku mou lau kimoutolu ko e kakai telinga ongo, pea mou fakafanongo ā ki he me‘a ‘oku lea‘aki atu ‘e he Laumālié ki he ngaahi siasí.”
Currently Selected:
Fakahā 3: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
