Fakahā 22
22
1Na‘e fakahā mai kiate au ‘e he ‘āngeló ‘e vaitafe ‘o e vai fakamo‘ui, ‘oku fetapaki ‘o hangē ha kilisitalá, pea ‘oku tafe mei he taloni ‘o e ‘Otuá pea mo e Lamí 2‘o hangatonu mai pē ‘i he loto hala ‘o e koló. Na‘e tu‘u mei he ongo kauvai e vaitafé ‘a e ‘akau e mo‘ui, ‘a ia ‘oku fua tu‘o hongofulu mā ua ‘i he ta‘u, pea tu‘o taha ‘i he māhina. Pea ko hono laú ko ha faito‘o ia ma‘á e tukui kakaí.
3He ‘ikai ke toe mala‘ia e kakai ‘o e koló. ‘E fokotu‘u e taloni ‘o e ‘Otuá mo e Lamí ‘i he koló, pea ‘e tauhi kiate ia ‘ene kau fai fatongiá. 4Te nau mamata tonu kiate ia, pea ‘e tohi hono hingoá ‘i honau la‘é. 5He ‘ikai ke toe ‘i ai ha po‘uli, pea he‘ikai ke toe ‘aonga ha maama pe ko e la‘aá kiate kinautolu, he ko e ‘Eiki ‘Otuá ‘a honau māmá, pea te nau pule fakatu‘i ‘o ta‘e ngata.
Ko e Liuaki Mai ‘a Sīsū
6Pea pehē mai ‘e he ‘āngeló kiate au, “Ko e ngaahi folofola mo‘oni mo falala‘anga eni. Ko e ‘Eiki ‘Otuá ‘okú ne pule ki he laumālie ‘o e kau palōfitá, pea ko ia na‘á ne fekau mai ‘ene ‘āngeló ke fakahā ki he‘ene kau fai fatongiá ‘a e ngaahi me‘a kuo vavé ni pē ‘enau hoko maí.” 7Ko e folofola eni ‘a Sīsū, “Fanongo mai! Kuo vave pē ke u a‘u atu! ‘E tāpuaki‘i ‘e he ‘Otuá ‘a e kakai kotoa te nau talangofua ki he ngaahi folofola fakapalōfita he tohí ni!”
8Ko au Sione na‘á ku fanongo mo mamata tonu ki he ngaahi me‘á ni hono kotoa. Pea hili ia, na‘á ku tō atu ki he va‘e ‘o e ‘āngelo na‘á ne fakahā kotoa maí peá u kamata lotu kiate ia.
9Kae pehē mai ‘e ia, “Tuku ia! Ko ho kaungātamaio‘eiki pē au, mo ho ngaahi tokoua palōfita ‘a kinautolu kotoa ‘oku talangofua ki he ngaahi folofola ‘oku tu‘u atu ‘i he tohí ni. Ka ke lotu ki he ‘Otuá!”
10Peá ne toe pehē mai kiate au, “Vakai na‘á ke fufū e ngaahi folofola fakapalōfita ‘i he tohí ni, he kuo vave ke hoko mai e ngaahi me‘á ni.
11Tuku pē ‘a e kau faikoví ke faikovi, mo e kau fakalielia ke fakalielia. Pea tuku pē ‘a e kau faileleí ke failelei, mo e kau faitotonú ke faitotonu.”
12Na‘e toki fakahā mai kiate au, “Vakai, kuo vave ‘eku ‘alu atú! Pea ko ‘eku ‘alu atú ‘o fakapale‘i e toko taha kotoa pē ‘o fakatatau ki he‘ene tō‘onga mo‘uí. 13Ko aú ko e ‘Ālifa mo e ‘Ōmeka, ko e ‘uluakí mo e faka‘osí, ko e kamata‘angá mo e iku‘angá.”
14‘E tāpuaki‘i ‘e he ‘Otuá ‘a kinautolu kuo fō ‘o ma‘a honau valá. ‘E ngofua ke nau kai mei he fua e fu‘u ‘akau ‘o e mo‘uí, mo hū ki he koló. 15Ka ‘e nofo tu‘akolo ‘a e fanga kulií, mo e kau fai fakalou‘akaú, ‘a e kau fai fakalieliá, mo e kau fakapoó, pea mo e kau lotu ki he tamapua, mo e kau ngutu-loí, mo e fa‘ahinga ‘oku lata ki he koví.
16Ko au Sīsū na‘á ku fekau ‘eku ‘āngeló ke ‘alu atu ‘o fakahā kiate koe ‘a e ngaahi me‘á ni peá ke toki fakahā ki he ngaahi Siasí. Ko e huli mo e hako au ‘o Tēvitá. Ko aú ko e fetu‘u ngingila ko e Fetu‘u‘ahó.”
17Ko e folofola eni ‘a e Laumālié mo e Ta‘ahine Ta‘ané, “Ha‘u ā!”
Pea lea pehē ai pē foki mo e kakai kotoa ‘oku fanongo ki aí, “Ha‘u ā!”
Ko koe ‘oku fieinua, ha‘u.
Ko koe ‘oku fie inu ta‘e totongi he vai ‘o e mo‘uí, ha‘u ‘o inu.
Faka‘osi
18Ko au Sione ‘oku ou fakatokanga mamafa atu ki ha taha pē te ne fanongo ki he ngaahi lea fakapalōfita he tohí ni.
Ka fakalahi ‘e ha taha ‘a e ngaahi lea ko iá, pea ‘e fakalahi ‘e he ‘Otuá ‘a hono tauteá ‘aki ‘a e ngaahi mala ‘oku fakamatala ki ai ‘a e tohí ni. 19Pea ka to’o ‘e ha taha ha lea fakapalōfita mei he tohí ni, pea ‘e to’o ‘e he ‘Otuá hono ‘inasi ‘i he fu‘u ‘akau ‘o e mo‘uí, mo hono ‘inasi he Kolo Tapú, ‘a ia ‘oku fakamatala ki ai ‘a e tohí ni.
20Ko e folofola eni ‘a e toko taha kuó ne fakahā mai ‘a e ngaahi me‘á ni, “‘Io, kuo vave ‘eku a‘u atu!”
Tauange ke pehē! Hā‘ele mai ā, ‘Eiki Sīsū!
21Tauange ke mou ‘inasi kotoa ai pē he ‘ofa ‘aufuatō ‘a e ‘Eiki ko Sīsuú.
Currently Selected:
Fakahā 22: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
