Fakahā 10
10
Ko e ‘Āngelo pea mo e Ki‘i Takainga Tohi
1Peá u mamata ki ha ‘āngelo kaukaua ‘e taha ‘oku ‘alu hifo mei langi kuo kofu ‘aki ha konga ‘ao, pea hā mai ha ‘umata mei hono tumu‘akí. Na‘e hangē ko e la‘aá hono fofongá, pea hangē ha ongo pou afí hono ongo va‘é. 2Na‘á ne to‘oto‘o ha ki‘i takainga tohi kuo ‘osi fakaava, pea tu‘u hono va‘e to‘omata‘ú ‘i loto tahi, kae tu‘u hono va‘e to‘ohemá ‘i he funga fonuá. 3Na‘á ne kalanga ‘o hangē ko e ngungulu ‘a ha laioné, pea na‘e pā tu‘o fitu ‘a e maná.
4Pea ‘osi ‘a e maná, peá u kamata ke hiki tohi ‘ene leá. Kae ongo mai ha le‘o mei langi na‘e pehē, “Ko e ngaahi me‘a fakapulipuli ena. Vakai na‘á ke tohi.”
5Pea ko e ‘āngelo na‘á ku sio ki ai ‘oku tu‘u ‘i tahi mo ‘utá, na‘á ne hiki hake hono nima to‘omata‘ú ki langi. 6Peá ne fai ‘ene tukupā ‘i he huafa ‘o e ‘Otua mo‘ui ‘oku tuputupu‘a peá ne fakatupu e langí, mo māmani, mo tahi, mo e me‘a mo‘ui kotoa pē. Peá ne toki pehē leva ‘e ia, “He‘ikai te ke toe fiu tali koe. 7Kuo fakahā ‘e he ‘Otuá ‘ene ngaahi fokotu‘utu‘u fakapulipulí ki he‘ene kau sevāniti ko e kau palōfitá. Pea ko ‘ene ifi pē ‘e he ‘āngelo hono fitú ‘ene talupité kuo fakahoko ia ‘e he ‘Otuá.”
8Pea toe ongo mai ‘a e le‘o mei langi na‘e pehē mai, “‘Alu ‘o to‘o mai ‘a e takainga tohi kuo fakaavá mei he nima ‘o e ‘āngelo ‘oku tu‘u ‘i tahi mo ‘utá.”
9Peá u ‘alu atu ‘o kole ki he ‘āngeló ‘a e ki‘i takainga tohí, pea pehē mai ‘e he ‘āngeló kiate au, “To‘o ‘a e takainga tohí ‘o kai. ‘E tamala ki ho keté, ka ‘e melie ia ki ho ngutú ‘o hangē ha huhu‘a‘i honé.” 10Peá u to‘o ‘a e takainga tohí mei hono nimá ‘o kai. Pea na‘e hangē pē ko e lau ‘a e ‘āngeló, na‘e melie ki hoku ngutú kae tamala ki hoku keté.
11Pea pehē mai ha ngaahi le‘o, “Talaki e finangalo ‘o e ‘Otuá ki he kakai ‘o e ngaahi pule‘angá, mo e ngaahi matakalí, mo e ngaahi leá, mo e ngaahi tu‘í.”
Currently Selected:
Fakahā 10: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
