Filimone 1
1
Ko e Fakafe‘iloaki
1-2Si‘i Filimone, mo hotau tuofefine ko ‘Apafia, mo hotau kaungāsōtia ko ‘Akipō, mo e kāinga lotu kotoa ‘oku fa‘a fakataha ‘i homou ‘apí.
Ko au Paula, ko e pōpula koe‘uhi ko Kalaisi Sīsū, ‘oku ou tohi atú, mo hotau tokoua ko Tīmote. 3Tauange ke mou ‘inasi ai pē he ‘ofa lī‘oa mo e tāpuaki ‘a e ‘Otuá ko e Tamai mo e ‘Eiki ko Sīsū Kalaisí.
Ko e ‘Ofa mo e Tui ‘a Filimoné
4Ko ‘eku lotu ma‘u pē ma‘amoutolú peá u fakamālō ai ki he ‘Otuá 5koe‘uhí ko e ongo mai kiate au ho‘omou tui ki he ‘Eiki ko Sisuú mo ho‘omou ‘ofa ki he kakai kotoa pē ‘a e ‘Otuá. 6‘Oku ou kole ki he ‘Otuá ke hoko ho‘omou talaki ki he kakai kehé ho‘omou tuí ko ha me‘a ke fakautuutu ai ‘enau ‘ilo ki he ngaahi tāpuaki kuo faka‘inasi ‘aki kitautolu ‘e Kalaisí.
7Si‘oku tokoua, ‘oku fakafiefia mo fakalotolahi kiate au ho‘o ‘ofá, pea kuo māfana ai e loto ‘o e kāinga lotú.
Ko e Kole ‘a Paula ‘o Felāve‘i mo ‘Onesema
8‘I he‘ene peheé leva, te u fakato‘oto‘a au ke fai atu ha tu‘utu‘uni, he ko ho tokoua au ‘ia Kalaisi. 9Ka koe‘uhí ko ‘eku ‘ofa ‘iate koé, ‘oku sai ange kiate au ke u fai atu pē ha kole. 10‘Oku ou kole fakamātoato atu ke ke tokoni‘i ‘a si‘i ‘Onesemá. ‘Okú ne hangē ha foha mo‘oni ‘o‘okú, he na‘á ne tali ‘a Kalaisi ‘i ‘api pōpulá ni koe‘uhí ko au. 11Ki mu‘a atú, ko ha toko taha ia na‘e ta‘e ‘aonga kiate koe. Ka kuó ne ‘aonga eni kiate kitaua.
12‘Oku ou teu eni ke fakafoki atu ia kiate koe, pea ‘oku mafasia lahi ai hoku lotó. 13‘E lelei ange kiate au ke nofo pōpula ai pē heni mo au ke ne fetongi koe he tokoni mai kiate aú. 14Ka ‘oku ‘ikai te u fie fakakouna koe. ‘Oku ou loto ke ke fai tau‘atāina pē ho‘o ‘ofa ‘iate aú, pea ‘oua ‘e fakapu‘ia.
15Na‘a ko homo fakamāvae fuonounou mo ‘Onisemá kae toki fakafoki atu ia ke ne nofo ai leva ‘iate koe, 16‘o ‘ikai ko ha pōpula pē eni, he kuo hulu atu ia ai. He ko ho toe tokoua ‘ofeina ia ‘ia Kalaisi. ‘Oku mahu‘inga ‘aupito ia kiate au. Pea huanoa ha‘ane mahu‘inga kiate koe. He ko ho‘o pōpula ia mo ho toe tokoua ‘i he ‘Eikí. 17‘I he‘ene peheé leva, kapau ‘okú ke lau au ko ho kaume‘a, peá ke ‘ai ā mu‘a ke tatau ho‘o tali ‘ene foki atú mo ha‘o tali ha‘aku ‘alu atu ‘a‘aku. 18Pea kapau na‘á ne fai ha kovi kiate koe, pe ‘oku mo‘ua kiate koe, peá ke tohi ia kiate au. 19Ko e tohi nima ena ‘a‘aku: KO AU, PAULA, TE U TOTONGI FAKAFOKI ATU. Ka ke manatu‘i, na‘a mo e mo‘ui ho laumālié ‘okú ke mo‘ua mai ai kiate au.
20Si‘oku tokoua ‘ia Kalaisi ko hotau ‘Eiki, ‘ofa mu‘a ‘o tali ‘eku kolé, kae fei mo nonga hoku lotó. 21‘Oku ou tui te ke tali ‘eku kolé, pea te ke toe fai ‘o mahulu atu.
22Kātaki kae teuteu ange ha ki‘i feitu‘u hena ke u mālōlō ai. He ‘oku ou ‘amanaki ‘e tali ho‘omou ngaahi lotu ‘oku fai ma‘akú, pea ‘e lava ai ke u ‘a‘ahi atu kiate kimoutolu.
Ko e Pōpoaki Faka‘osi mo e Tala Monū
23‘Okú ma ‘i ‘api pōpulá ni mo ‘Epafasi koe‘uhi ko ‘ene kau mo Kalaisi Sīsuú. ‘Okú ne ‘ofa atu kiate kimoutolu, 24pea pehē pē mo Ma‘ake, ‘Ālisitako, Tīmasi, mo Luke, ‘a ia ‘oku mau kaungāngāue mo au heni.
25‘Ofa ke mou ‘inasi ai pē he ‘ofa lī‘oa ‘a e ‘Eiki ko Sīsū Kalaisí.
Currently Selected:
Filimone 1: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
