Mātiu 6
6
Ko e Foaki
1‟Kae tokanga ke ʻoua naʻa fai hoʻomou tōʻonga fakalotú ke fakahāhā ki he kakai̇́. He ka pehē, pea ‘e ‘ikai maʻu haʻamou totongi mei ho‘omou Tamai ʻoku ʻi he Langi̇́.
2Ko ia, ʻoka ke ka fai ha‘o foaki, ‘oua ‘e ifi ha me‘alea ʻo hangē ko ia ‘oku fai ‘e he kau lotuloi̇́ he ngaahi falelotú mo e ngaahi toumuʻá, ke fakamālōʻia kinautolu ʻe he kakai̇́. Ko ʻeni ‘oku ou tala atú, kuo ʻosi maʻu kakato pē ai ʻenau totongi̇́.
3Ka ʻoka fai haʻo foaki, pea vakai na‘á ʻilo ʻe ho nima toʻohemá ʻa e meʻa ʻoku fai ʻe ho nima toʻomataʻú.
4Koeʻuhi̇̄ ke fakafufū pē ho‘o foaki̇́, pea ko ho‘o Tamai̇́ ʻa ia ʻokú ne ʻafioʻi ʻa e me‘a ‘oku fai ʻi he liló, te ne toki totongi kiate koe.”
Ko e Lotu ʻa e kau Akó
(Luke 11:2-4)
5‟Peá ka fai haʻamou lotu, pea ʻoua na‘a mou hangē ko e kau lotuloi̇́, he ‘oku nau manako he tuʻu ‘o lotu he ngaahi falelotú mo e ngaahi tuliki halá, ke hā ki he kakai̇́. Ko hono mo‘oni̇́ ‘eni ‘oku ou tala atú, kuo maʻu kakato pē ai ʻenau totongi̇́.
6Ka ko koe, ʻoka fai leva ha‘o lotu, peá ke hū ki ho loki̇́ ʻo tāpuni ʻa e matapā, pea toki fai ho‘o lotú ki ho‘o Tamai ‘oku ʻafio ʻi he liló. He ko hoʻo Tamai̇́, ‘okú ne ʻafioʻi ʻa e me‘a ʻoku fai ʻi he liló, te ne totongi kiate koe.
7Pea ʻoka mou ka lotu, ʻoua te mou fa‘ifa‘itaki ki he kau taʻe‘ilo ‘Otuá. He ʻoku nau fakakaukau, ka lahi ‘enau valelaú pea ‘e ongo atu ki he ‘Otuá. 8ʻOua na‘a mou fa‘ifa‘itaki kiate kinautolu, he ‘oku tomu‘a ʻafioʻi pē ‘e ho‘omou Tamai̇́ ʻa e me‘a ‘oku mou fiemaʻú, ki muʻa pea mou toki fai ha kole ki ai. 9Ko ia ai, ko e lotu ʻeni ke mou fai̇́,”
‟Ko ‘emau Tamai ‘oku ‘i Hēvani,
Ke tāpuhā ho Huafá,
10Ke hoko mai ho Pule‘angá.
Ke fai ho finangaló ʻi māmani,
‘O hangē ko ia ‘oku fai ‘i he Langi̇́.
11‘Omai mu‘a ha‘amau me‘atokoni ki he ‘ahó ni.
12Pea fakamolemole‘i ‘emau ngaahi angahalá,
‘O hangē ko ‘emau fakamolemole‘i ‘akinautolu ‘oku fai angahala mai̇ kiate kimautolú.
13Pea ʻoua na‘á tuku ke mau mo‘ua ‘i ha ‘ahi‘ahi,
Ka ke fakahaofi kimautolu mei he Toko Taha kovi̇́.
14He kapau te mou fakamolemole‘i ʻakinautolu ʻoku faihala mai kiate kimoutolú, pea ‘e fakamolemole‘i kimoutolu foki ‘e ho‘omou Tamai fakalangi̇́. 15Pea kapau ‘e ‘ikai te mou fakamolemole‘i kinautolu, ‘e ‘ikai fakamolemole‘i kimoutolu ‘e ho‘omou Tamai̇́.”
Ko e ‘Aukai̇́
16‟Pea ka fai haʻamou ‘aukai pea vakai na‘a mou fa‘ifa‘itaki ki he kau lotuloi̇́ he ʻoku nau fakamatamata kovi ke fakahāhā ki he kakai̇́ ‘enau ʻaukai̇́. Ko hono mo‘oni̇́ ʻeni ‘oku ou tala atú, ko ʻenau totongi̇́ pē ia. 17Ka ʻoka ke ka ‘aukai, pea te ke helu ho ʻulú mo tafitafi ho matá. 18Koeʻuhi̇̄ ke ʻoua ʻe fakatokanga‘i ‘e he kakai̇́ ho‘o ʻaukai̇́ pea ko hoʻo Tamai̇́, ʻa ē ʻokú ne ʻafioʻi ʻa e meʻa ʻoku ʻi he liló, te ne totongi kiate koe.”
Ko e Tānaki Koloa ki Langi̇́
(Luke 12:33,34)
19‟ʻOua te mou tānaki koloa ‘i māmani he ʻoku kai ia ‘e he popó mo e ʻumeʻumeá, pea kaiha‘asi ‘e he kau kaihaʻá. 20Ka mou tānaki koloa ki Langi, ʻa ē ‘oku ‘ikai lava ke kai ‘e he popó mo e ʻumeʻumeá, pē hae ʻe ha kau kaihaʻa, ʻo kaihaʻasi. 21He ko e feituʻu ‘oku tānaki ai ho‘o koloá, ‘e tuku ai foki mo ho lotó.”
Ko e Maama‘anga ‘o e Sinó
(Luke 11:34-36)
22‟Ko ho matá ‘oku maamangia ai ho sinó. Ka sai ho‘o sió, pea ‘e maamangia kotoa ai pē ho sinó. 23Ka ‘okapau ‘e ‘ikai sai ho‘o sió, pea ‘e fakapoʻuli kotoa ai mo ho sinó. Kapau leva ko e koto fakapoʻuli ʻa e maama ‘oku ‘i ho lotó, pea tā ko e fakapoʻulituʻu mo‘oni ‘oku ke ‘i ai̇́.”
Ko e Koloa
(Luke 16:13; 12:22-31)
24‟He‘ikai lava ʻe ha taha ke fakaongoongo ki ha ongo pule ‘e ua, he kuo pau ke ne ‘ofa ki he taha kae fehi‘a ki he taha, pē te ne mamahi‘i ʻa e taha kae liʻaki ʻa e taha. He ‘ikai te mou lava ke ‘eiki ʻaki ʻa e ‘Otuá mo e Koloá fakatouʻosi.”
ʻOua te ke hohaʻa
(Luke 15:22-31)
25‟Ko ia ʻoku ou tala atu kiate kimoutolu: ʻOua te mou hoha‘a ki ho‘omou mo‘ui fakasinó, ki ha me‘a ke mou kai, pē inu, pē ki ha mou vala. ʻIkai ‘oku mahuʻinga ange ʻa e moʻui̇́ ʻi he me‘akai̇́ mo e valá? 26Mou vakai ange ki he fanga manupuna ʻo e ʻatā. ‘Oku ‘ikai te nau tōtaʻu pē ututaʻu pea ʻoku ‘ikai te nau tānaki me‘akai ki ha feleoko, ka ‘oku fafanga kinautolu ‘e ho‘omou Tamai fakalangi̇́. ‘Ikai ‘oku mou mahu‘inga ange ʻi he fanga manupuná?
27Pea ko ho‘omou hohaʻá, he ‘e lava koā ke fakalōloa atu ai ho‘omou moʻui̇́? 28Ko e hā koā ‘oku mou lotomo‘ua ai ki homou teungá? Vakai ange ki he tupu ʻa e ngaahi ʻakau kakalá ‘i he vaó. ʻOku ʻikai te nau tuitui hanau teunga.
29Pea ko ʻeni ‘oku ou tala atu: Na‘á mo Solomone ʻi hono naunauʻiá, ʻe ʻikai ala fakatataua ia, ki he fakaʻofoʻofa ʻo ha taha ʻo e ngaahi ʻakau kakalá ni. 30Kapau ʻoku fakateunga pehē ‘e he ‘Otuá ʻa e ʻakau kakala ‘o e vaó, ‘a ē ‘oku matala he ‘ahó ni kae mae ‘apongipongi ‘o tutu ‘i he tuʻunga vevé, pea huanoa ʻene fai teunga kimoutolu! Kuo pehē fau koā ʻa e vaivai ho‘omou tui̇́?
31Ko ia, ʻoua te mou lotomoʻuá mo fa‘a lau ʻo pehē: ‛Ko e hā te tau kai? pē; Ko e hā te tau inu? pe; Ko e hā te tau teungaʻaki̇́?’ 32He ko e ngaahi me‘a ia ‘oku tuli ki ai ʻa e kau taʻetui ‘Otuá, ka ʻoku ʻafioʻi pē ‘e ho‘omou Tamai fakalangi̇́ ‘a hoʻomo fiemaʻu ʻa e ngaahi me‘a ko iā.
33Ka mou tomu‘a kumi ki he Pule‘anga ‘o e ‘Otuá, pea mo ʻene māʻoniʻoni ʻaʻaná, pea ‘e ‘oatu kotoa foki ‘e he ‘Otuá mo e ngaahi me‘a ko iā maʻamoutolu.
34Ko ia, ʻoua te mou loto mo‘ua koeʻuhi̇̄ ko e ‘a pongipongi̇́, he ʻe tokanga‘i pē ia ʻe he ‘a pongipongi̇́. Ka ‘oku feʻunga pē ʻa e faingata‘a ‘o e ‘aho ni̇́, mo e ‘ahó ni.”
Currently Selected:
Mātiu 6: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.