1 Tīmote 1
1
Ko e Fakafe‘iloaki
1-2Si‘i Tīmote,
Ko au Paula ‘oku tohi atú. Ko e ‘apōsitolo au ‘a Kalaisi Sīsū, tu‘unga ‘i he fekau ‘a e ‘Otuá ko hotau Fakamo‘ui pea mo Kalaisi Sīsū, ‘a ē ‘okú ta fakatu‘amelie aí. Ko hoku foha mo‘oni koe koe‘uhi ko ‘eta tuí. Tauange ke faka‘inasi ai pē koe ‘e he ‘Otuá ko e Tamai pea mo Kalaisi Sīsū ‘i he‘ene ofa lī‘oá, mo ‘ene manava‘ofá, mo ‘ene tāpuakí.
Ko e Fakatokanga he Ngaahi Fakahinohino Hala
3Na‘á ku teu hiki ko ē ki Masitōniá, peá u kole atu ke ke nofo pē ‘i ‘Efesō ‘o fakatokanga ki he ni‘ihi ai ke tuku ā ‘enau fakamafola ‘a e ngaahi fakahinohino halá, 4pea tuku ‘enau fakamole‘i noa honau iví he fanangá mo e lau hohokó. He ko e ngaahi me‘a ia ‘oku fakatupu kē. ‘E ‘ikai ma‘u ai ha me‘a ‘a e kakai ‘oku loto-mo‘oni ke fai e ngāue ‘a e ‘Otuá. He ko e ngāue ‘a e ‘Otuá, ‘oku fai‘aki pē ‘a e tuí.
5Ako‘i e kakaí ke ‘ai ke mo‘oni ‘enau ‘ofá, pea ‘ai ke ma‘a honau lotó, pea ‘ai ke fakamātoato ‘enau tuí. 6He ‘oku ‘i ai ha ni‘ihi kuo nau fetongi‘aki e ngaahi me‘a ko iá ha koto launoa. 7‘Oku nau holi ke lau kinautolu ko e kau faiako Lao ‘a Mōsese. Ka ko e kau fie poto kinautolu ‘oku nau lea‘aki e ngaahi me‘a ‘oku ‘ikai ke nau maa‘usiá.
8‘Oku mahino foki ko e me‘a lelei e Laó, ‘o kapau ‘oku ngāue totonu ‘aki. 9Pea ‘oku toe mahino pē foki na‘e ‘ikai ke ‘uhinga hono tuku mai e Laó ke pule‘i e kakai fai leleí, ka ko e kakai maumau laó, mo e kakai fai hiá, mo e kakai faka‘ikai ‘Otuá, pea mo e kakai fai angahalá mo e kakai ‘oku ‘ikai ke mo‘ui fakalotu pe mo‘ui fakalaumālié, pea mo kinautolu ‘oku tāmate tangata, ‘o nau a‘u ai pē ‘o fakapoongi ‘enau tamaí pe ko ‘enau fa‘eé. 10Ko e tuku mai ‘o e Laó koe‘uhí ko e kakai fe‘auakí, fakasōtomá, kaiha‘a tangatá, kākaá, mo fakamo‘oni loi ‘i fale hopó. Na‘e tuku mai ia koe‘uhí ko e kakai kotoa pē ‘oku nau fai e ngaahi ‘ulungāanga ‘oku fehālaaki mo e fakahinohino totonu 11‘o e Ongoongo Lelei, ‘a ē na‘e tuku falala mai kiate au ‘e hotau ‘Otua mohu lāngilangi mo fakaofó ke u malanga‘í.
Ko e Fakahounga‘i e ‘Ofa ‘a e ‘Otuá
12‘Oku ou fakamālō lahi ki hotau ‘Eiki ko Kalaisi Sīsuú koe‘uhí ko ‘ene fetuku mai ‘a e ivi ke fai‘aki ‘eku ngāué. ‘Oku ou fakamālō ki ai foki koe‘uhí ko ‘ene lau au ko e toko taha ‘oku falala‘anga, ‘o ne fakanofo au ke fai fatongia ma‘ána. 13‘I he kuo hilí, na‘á ku fakangalikovi‘i mo fakaongoongokovi‘i ia, peá u anga-fita‘a. Ka na‘á ne manava‘ofa kiate au, koe‘uhí he ko ‘eku fai fakapo‘uli pē hoku ngaahi anga ko iá, pea na‘e te‘eki ai ke u tui au. 14Ko e ‘ofa lahi ‘a hotau ‘Eiki ko Sīsū Kalaisí ‘iate aú, he kuó ne fakakoloa‘i lahi ‘eku mo‘uí ‘aki e tui mo e ‘ofa ‘oku tatau pē mo e tui mo e ‘ofa ‘a‘aná.
15Hangē ko e laú, “Na‘e ‘alu hifo ‘a Kalaisi Sīsū ki māmaní ke fakahaofi ‘a e kakai angahalá.” Ko e lau ia ‘oku mo‘oni pea falala‘anga, pea ko au ‘a e fai angahala lahi tahá. 16Ka na‘e manava‘ofa ‘a e ‘Otuá kiate au koe‘uhí kae hā sino ‘i he fu‘u angahala lahi taha ko aú ‘a e kātaki ta‘e fakangatangata ‘a Kalaisi Sīsuú. Pea ko ‘ene fai peheé hei‘ilo ‘e tui ai ha ni‘ihi kia Kalaisi ‘o ma‘u ai e mo‘ui ta‘e ngatá. 17Tauange ke fakahīkihiki‘i mo fakalāngilangi‘i ai pē ‘a e ‘Otua pē tahá, ‘a ē ‘okú ne ‘afio ko e Tu‘i ta‘e hā mai mo ta‘e ngatá. ‘Ēmeni.
18‘E Tīmote, si‘oku foha, ko e ngaahi fakahinohino kuó u fai atu kiate koe he tohí ni, ko e ngaahi fakahinohino ia ‘oku hoa mo e lau kiate koe ‘a e kau palōfita he siasí. Kapau te ke fai pau ki he ngaahi fakahinohino ko iá, te ke taukei ai he taú. 19Te ke tu‘u kalikali ai pē mo e loto-tau‘atāina. Kuo hē ‘a e tui ‘a e ni‘ihi ko e ‘ikai ke nau lava ‘o tauhi ‘enau loto-tau‘atāiná. 20Pea ‘oku kau ai ‘a ‘Aiminia mo ‘Ālekisānita. Kuó u ‘osi tuku ange ‘a e ongo tangata ko iá ke fa‘ahi ai ā mo Sētane, hei‘ilo te na poto ai ‘o tuku ‘ena fakafepaki‘i ‘a e ‘Otuá.
Currently Selected:
1 Tīmote 1: TCNT
Highlight
Copy
Compare
Share
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
