1 Tesalonaika 4
4
Ko e Fa‘ahinga Mo‘ui ‘oku Fakahōifua ki he ‘Otuá
1Ko e faka‘osí, kāinga, ‘oku mau kole mo tapou atu koe‘uhí ko e ‘Eiki ko Sīsuú, ke mou fai ai pē ‘a e fa‘ahinga mo‘ui na‘a mau fakahinohino atú, pea fai ke lōlahi ange. He ‘e hōifua mai ai kiate kimoutolu ‘a e ‘Otuá. 2Manatu‘i mu‘a ‘a e ngaahi fale‘i na‘a mau fai kiate kimoutolu ‘i hono fakamafai‘i kimautolu ‘e he ‘Eiki ko Sīsuú. 3Ko e finangalo ‘o e ‘Otuá ke mou mo‘ui ma‘a mo faka‘ehi‘ehi ‘aupito mei he fe‘auakí. 4Ko kimoutolu e mātu‘a tangatá, mou faka‘apa‘apa‘i mo fakalāngilangi‘i homou ngaahi malí. 5‘Oua te mou fakatuituia ‘a e holi koví, ‘o hangē ko e kakai ‘oku ‘ikai ke ‘ilo ‘Otuá. 6‘Oua pē te mou faikovi ‘i ha me‘a pehē ki ha taha ‘oku muimui ki he ‘Eikí, pe te mou kākaa‘i. ‘Oku mau toe fakamanatu atu kiate kimoutolu, kuo pau ke tautea ‘e he ‘Eikí ‘a e kakai ‘oku fai peheé. 7Na‘e ‘ikai foki ke fili kitautolu ‘e he ‘Otuá ke tau mo‘ui‘aki ‘a e ‘ulí, ka ko e ma‘á. 8Ko ia te ne faka‘ikai‘i e akonaki ko ‘ení, ‘oku ‘ikai ko ‘ene faka‘ikai‘i ha tangata, ka ko ‘ene faka‘ikai‘i ia ‘a e ‘Otuá, ‘a ia ‘okú ne foaki atu hono Laumālie Mā‘oni‘oní.
9‘E ‘ikai te mau hela tohi atu ke mou fe‘ofa‘aki. He kuo ‘osi ako‘i ai kimoutolu ‘e he ‘Otuá, 10pea kuo mou ‘osi fakahaa‘i ho‘omou ‘ofa ki hono kakai kotoa pē ‘i Masitōnia. Ka ‘oku mau kole atu, kāinga, ke toe lahi ange ho‘omou ‘ofá. 11Mou feinga mu‘a ke melino ho‘omou nofó. ‘Oua ‘e kaunoa. Taki taha tokanga‘i pē ‘e ia ia. Ko e ‘ū me‘a ia na‘a mau ‘osi fakahinohino atu. 12Kapau ‘e pehē ho‘omou nofó, ‘e faka‘apa‘apa‘i leva kimoutolu ‘e he kakai kuo te‘eki ke muimui ki he ‘Eikí, pea ‘e ‘ikai te mou toe mo‘ui fakafalala ki ha taha.
Ko e Toe Hā‘ele Mai ‘a e ‘Eikí
13Kāinga, ‘oku mau faka‘amu ke mahino lelei kiate kimoutolu ‘a e me‘a ‘e hoko ki he kakai tui kuo ‘osi maté, koe‘uhí ke ‘oua ‘e fu‘u mamahi ai homou lotó, ‘o hangē ko e kakai ‘oku ‘ikai ha’anau ‘amanakí. 14‘Oku tau tui kitautolu na‘e pekia ‘a Sīsū pea toe fokotu‘u ia ki he mo‘ui. ‘Oku tau toe tui kitautolu ‘e hanga ‘e he ‘Otuá ‘o fakafoki fakataha mai mo Sīsū ‘a e kakai kotoa pē na‘e mate ‘i he funga ‘o ‘enau tui kiate iá.
15Na‘e fakahā mai ‘e hotau ‘Eiki ko Sīsuú, ka hā‘ele mai ia, ‘oku ‘ikai ko kitautolu ‘e mu‘aki fe‘iloaki mo iá pea toki muimui hake ‘a e kakai tui kuo maté. 16Ka ‘e fai ha tu‘utu‘uni mo ha kalanga le‘o-lahi ‘a e ‘āngelo pulé, pea ha‘aki le‘o-lahi mai ‘a e me‘aifi ‘a e ‘Eikí, pea ‘e toe hā‘ele mai ‘a e ‘Eikí mei langi. Pea ko kinautolu na‘e tui kia Kalaisi pea toki maté, ‘e fokotu‘u hake kinautolu ke nau mo‘ui. 17Pea ka ‘osi ia, ko kitautolu ‘oku kei mo‘uí, ‘e ma‘u hake fakataha kitautolu mo e kakai ko eé ki he ngaahi ‘aó ke tau fetaulaki mo e ‘Eikí he vavaá. Pea te tau nofo fakataha ai pē mo e ‘Eikí ‘o ta‘e ngata. 18Mou fepoupouaki ‘i he ngaahi fakakaukau ko iá.
Currently Selected:
1 Tesalonaika 4: TCNT
Highlight
Share
Copy
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.