THUPILTE 6
6
Thasietna leh zuou gen zieha kigiihna
1Ka tapa na innveng a dinga mawpotu a na pan a,
gamdang mi vuohna dinga na khut na lap leh,
2Nangma ham kamte ah na awh a,
na kam a thupawtten ahing manta hi.
3Ka tapa tambangin bawl inlen,
kihunkhedoh in,
na innveng khutsunga awh na hitahzieh in,
kintah in pei pai inlen,
amasang ah kingiemkhieh inlen na innvengpa va lut in.
4Na mit imusah sinlen,
na mitte lusu sah sin.
5Sabengmi khut a sakhi asuohtat bang in leh,
thangkam mi khut a va apit khieh bangin
nangma leh nangma kihunkhedoh in.
Mithasie leh Mesi
6Nang mithasie aw,
mesite kungah pei inlen,
agamtat dan uh ngaituo inlen pil in.
7Amauten lamkai ahiei,
hausa leh vaihawm anei vateh sih uhi.
8Nipi laiin neh ding asutuo ua,
tualeh pawltah chienga aneh ding uh akholkhawm uhi.
9Aw Mithasie bangtan vei ahiei na imut ding a,
imutna apat bang chih chienga thoudoh ding na hiei?
10 #
Thu. 24.33,34 Bakhat imu tadivang,
bakhat mitsing nalai vang,
bakhat ka khut hing pheh tadi vang na chi sungin;
11zawnna suomhat bangin ahing tung dinga,
tahsapna in galvan a kivonmi bangin ahing lap ding hi.
Migilou hindan
12Miginalou,
mi gilou khu thumanlou gen in avah kawi kawi a,
13mit sih et in mi ahoupi kawi a,
akengtawtat in thu agen a,
akhutme in mi akawh hi.
14Alungtangah gitlouna ngen a um a,
silhoilou bawl ding ngen atum a,
kituohlouna a pieng sah hi.
15Tuaziehin atungah sietna thakhat in atung dinga,
suhdam guollouin thakhat in asegawp ding hi.
16Mangpa’n ahuot sil guh a um a,
kidahhuoi asah sil sagi a um hi.
17Tuate khu,
kisahtheina mit ha,
lei zuouthei,
mawna neilou sisansuo khutte,
18gitlouna ngaituona lungtang,
silgilou bawl dinga kintah a tai kengte,
19zuou gen a theipitu dihlou,
leh unau lah a kituohlouna piengsah mite.
Angkawm thu a hilna
20Ka tapa na pa thupieh zui inlen,
na nu dan nuasie sin.
21Na lungtang ah viel ngitnget inlen,
na ngawng ah khi ngitnget in.
22Na peina lampi ahing hil dinga,
na imut kaal in ahing veng dinga,
na khanlaw chiengin ang houpi ding hi.
23Aziehpen thupiehte khu meivah ahia,
tam dan khu vah ahi,
tualeh thununna kihilna khu hinna lampi ahi.
24Numei thanghuoi lah apat nang ahing veng dinga,
numei thangtat mi zawlsiem kamhum akipat.
25Na lungtangin amanu melhoina enla sinlen,
a mitmei a azawlphah in um vawt sin.
26Aziehpen kizuanu a dingin ann kamkhat giap bang na hi dinga,
tualeh angkawmnu’n na hinna manphatah asui leng hi.
27Mi’n apuon kasahlouin mei-am a angpom thei diei mah?
28Mi khat akeng kasahlou in mei-am tungah avah thei diei mah?
29Koipou a innvengpa zi luppi mi khu tuabang ahi dinga,
koipou amanu va khoikha mi khu mawnabei in a um sih ding hi.
30Gilkiel a shi dinga kisa mikhat in agilva theina dinga,
mi van aguh leh koiman asimmaw sih ding hi.
31Hinanleh akimat khah leh pen ale sagi in adin ding hi.
32Koipou numei toh angkawm pouma in theisiemna atasam a,
tuabanga bawl mi in ama hinna asusie hi.
33Liemna leh zumhuoina amu dinga,
tualeh aminsietna akiphietmang sih ding hi.
34Aziehpen thangsietna khu apasal thangpaina ahi a,
tua ziehin phuba alah ni chiengin bangma ahinkhawi sih ding hi.
35Aman zangnadopna asang nuom sih dinga,
amanbei a silpiehte in zong alungkim sih ding hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.