THUPILTE 26
26
1Nipi lai a vua kie leh,
bulah lai a guozu akilawmlou bangin,
mi mo kunga pahtawina pieh akilawm sih hi.
2Vatou kitawm kawi kawi leh,
sielpaleng leeng kawi kawi bangin,
azieh bei a,
hamselaw atangtung sih hi.
3Sakol a dingin zepna,
sabiltunga dingin kamkaina,
tualeh mi mote elduong zepna ding in chieng ahi.
4Mi mo amotna dungzui in dawng sin,
Nang zong ama bang na hikha ding hi.
5Mi mo amotna dungzui in dawng in,
ahisihleh apil in akingai kha ding hi.
6Koipou mi mo khut a thuvaihah poumain,
akeng asattan a,
sietna adawn hi.
7Mi mo kam a pawtdoh paunahte pen,
mi kengbai kikhai nilnel toh kibang ahi.
8Mi mo khat kunga zatatna pe pouma khu,
suongtang saili toh khauzam a kaan khawm bang ahi.
9Mi mo kam a pawtdoh paunah khu,
zukham khut loulingnei in asut bang ahi.
10Mi vahvai leh mi mo nasem dinga guoikha pouma pen,
thalkap siemmi liemsah toh kibang ahi.
11 #
2 Pet. 2.22
Ui in ama luoh aneh kia bangin,
mi mo in amotna anua bawlkia zel hi.
12Mi ama leh ama apil a kingai na mu kha ngai ei?
ama a kipat sangin mi mo a kipat in kinepna aum zaw hi.
13Mi thasie in lampi ah humpibahnei a um a,
kholai dungah “Humpibahnei giinhuoi tah a um hi,”
achi hi.
14Kotkha kopza tunga akihei kawikawi bangin,
mithasie alupna tungah akihei hei hi.
15Mithasie in annkuong sung akhut in asohsuh a,
akam ah akhut a tuttou ngap nawn sih hi.
16Mi thasie khu ama ngaiin,
piltah a dawng thei mi sagi sangin pil akisa zaw hi.
17Midangte kihauna va tuohkha a va kikumthaw mi khu,
ui vahlai abil a kiman bang ahi.
18Shi theina meisel leh,
thal mawhkap lungsim venglou mi khu,
19a innvengte a sol zou chienga,
“Ka chiemmuina chi mi toh kibang ahi.”
20Singkhuo umlouna ah mei amit a,
tuamabangin gensietna thu zong,
agensawn mi umlouna ah kihauna atawp hi.
21Meihol khu mei aam sah dingin,
singkhuo khu mei kuongsah ding ahimabangin,
mi phunsie in kihauna apiengsah ding hi.
22Mi gensiet hatte thugen khu hima toh kibang ahia,
mihing tahsa sungah thuhtah in alutsuh thei hi.
23Lungtang gilou kam zol mi pen,
leibel dangka tui a kiluonkhum bang ahi.
24Mi muda senga lungsim tahtah genlou a,
akam a kilep mi lungtang pen,
lepchie na in adim hi.
25Thu kilawmtah agen vangin ama gingta sin,
alungtang sungah kidahhuoi sagi a um hi.
26A mimudana khu lepchiena in liekhu nanleh,
agitlouna khu mipi kikhawmte mai ah,
suhlat in a um ding hi.
27Lei hum tou pouma atawsa lei hum sungah,
ama mama ake dinga, tualeh suongtum lia pouma,
asuongtum in ama adeng ding hi.
28Lei zuoutheiin ama liemsahte a muda a,
tualeh maitangphatna kam in zong mi asusie hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.