THUPILTE 19
19
1Mi zawng adihna toh gamta mi khu,
mimo thusie gen sangin ahoizaw hi.
2Tualeh theina neilou hinna ahoi sih a,
tualeh kalsuon kinawten lampi azui khiel uhi.
3Mihing motna in agamtat asesah a,
alungtang Mangpa tungah akiphin hi.
4Hausatna in lawm tampi asiem a,
mi zawng pen alawm nangawn in ataisan hi.
5Theipitu dihlou khu gawtlou in a um sih dinga,
tualeh zuou thu gen pouma asuohta sih ding hi.
6Mi tampi in vaihawm mi deisahna asui a,
tualeh koipou sil thawnpieh pe mi adingin,
michin alawm ahi zel uhi.
7Mizawng pen asanggamte zousie nangawn in amuda ua,
alawmten gamlapi ah akihepmangsan sem ding uhi!
Kampha toh maute anuadel vangin anuasie ua,
ataisanta uhi.
8Koipou pilna mu in ama hinna a it a,
tualeh theisiemna kemching miin sil hoi amu ding hi.
9Theipitu dihlou pen gawtlou in a umsih dinga,
zuouthu gente amangthai ding hi.
10Mi mo adingin nuomtat akilawm sih a,
Suoh khat in leengtapate tunga,
avaihawm khum ding akilawmmo zawsem ding hi.
11Alunggelsiemna in mi alungthah ha sah a,
tualeh tatkhelna mumo akipan pen athupina ahi.
12Leengpa lungthahna khu humpibahnei hawh bang ahi a,
hinanleh adeisahna khu hampa tunga daitui kia bang ahi.
13Tapa mo khu apa adinga vangsietna ahi a,
tualeh zi hangsan phunhat khu intung ke a guotui tahkhie bang ahi.
14Inn leh hausatna pen pate akipat a gou kiluo sawn ahi a,
hinanleh lunggelsiem zi pen Mangpa a hing kipan ahi.
15Thasietna in mi nuomtahin a imu sah a,
tualeh mi thasie in gilkiel a thuoh ding hi.
16Koipou thupieh kemchingin ahinna akembit a,
hinanleh agamtatna simmaw mi khu ashi ding hi.
17Koipou mi zawngte hepi miin,
Mangpa leitawisah ahi a,
asilpiehte Mangpa’n adinkia teitei ding hi.
18Lam etna a umlai in na tapa thunun inlen,
amangthai mai dingin ngaituo sin.
19Mi lungthah bai in gawtna athuoh dinga,
aziehpen va hundoh nanlachin,
na hutdoh kia teitei angai ding hi.
20Lemguotna ngaikhie inlen thuhilna zuiin,
na hinkhuo nukhia lam ah na pil law ding hi.
21Mihing lungsim ah tupna tampi a um a,
ahivangin Mangpa deilam bou atangtung ding hi.
22Mihingin alunggul pen hepina ahi a,
mi zuouthei hi sangin mi zawng hi ahoizaw hi.
23Mangpa giinna in hinna atun a,
tualeh hinna nei mi sungah lungkimna aumden dinga,
silhoilou in ama ave ngai sih ding hi.
24Mi thasie in akhut hengkuong sungah adie a,
akam nangawn atuntou ngap sih hi.
25Mi simmawhat khat satthop lachin, mi mawl
ahing pilvang dinga,
theisiemna nei mi phawhhil lachin,
sie leh pha theina a nei ding hi.
26Koipou apa bawlsie a,
anu delmang mi khu zumna leh minsietna umsah tapa ahi.
27Ka tapa sil bawlkhiel dinga,
pilna thuhilna ngaikhieh tawpsan in.
28Theipitu dihlou in vaihawmna dih asimmaw a,
migilou kam in thulimlouna anawmval hi.
29Thukhenna khu mi simmawhatte a dinga,
guonggal masah ahi a,
tualeh mi mote elduongah zepna chieng atu ngei ngei ding hi.
Currently Selected:
THUPILTE 19: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.