THUPILTE 14
14
1Numei pil poumain a inn alama,
hinanleh numei moin ama khut mama in a inn aphelsie hi.
2Dihtattah a gamta mi in Mangpa agiing a,
gamtat gilou miin Ama asim maw hi.
3Mimo kam ah kiletsahna chieng a um a,
hinanleh mipil kam in amauh akembit ding hi.
4Bawngtalte umlouna ah gankuong asienga,
bawngtal thahatna in bulah ding tampi apiengsah hi.
5Theipitu gin um in zuou agen sih a,
hinanleh theipitu dihlou in zuou agen ding hi.
6Misimmawhat mi in pilna asui a,
amu sih hi;
hinanleh theisiemna nei mi in,
bailamtah in theina amu hi.
7Mimo umna apat kihemkhie in,
aziehpen ama kam apat theina na mu sih ding hi.
8Lemguotsiem pilna khu alampi theisiem ahi a,
hinanleh mimote motna khu lepchie na ahi.
9Mimoten khelna anuisan ua,
hinanleh midihtatte lah ah deisahna a um hi.
10Lungtangin ama khelna athei a,
tualeh mikhuol khu ama nopsahna ah akikum sih hi.
11Migilou inn suhsiet ahi dinga,
midihte puonbuh pen akhangtou sem sem ding hi.
12 #
Thu. 16.25
Mihinga dinga dih hileh kilawm lampi a uma,
atawpna khu shina lampi ahi.
13Nuina ah zong lungsim natna a um thei a,
tualeh nopna tawpna khu dana ahi.
14Lungtanga nuatol mi khu ama ngaidan in adim ding a,
tualeh mihoi in pen a umdan hoina pahtatman asang ding hi.
15Mi mawl in thu zousie agingta a,
hinanleh mi lunggelsiem in apeina lampite a en chien hi.
16Mipil in silhoilou agiinga ataisan hi,
hinanleh mi mote athangpai ua,
akimuong uhi.
17Milungthah baite mot huoitah in agamta ua,
tualeh ngaituona a gitlou pilte pen,
mi muda in aum hi.
18Mi mawlten motna alawtah ua,
hinanleh mi lunggelsiemte pen,
theina manglukhu akikhusah hi.
19Mihoite mai ah mihoiloute akun ding ua,
tualeh midihtatte kotpiphungah,
migiloute akun ding hi.
20Mizawngte pen a innvengte nangawn in a muda a,
hinanleh mihauten lawm tampi anei uhi.
21Koipou a innveng muda mi in khelna abawl hi,
mi zawngte hepi mi khu mi nuomsa ahi.
22Gitlouna bawlte alampiel uh hilou amah?
Hinanleh hepina leh thutah pen,
silhoi bawlte a ahi hi.
23Sepgimna zousie ah metna a um a,
hinanleh kam guoh a genthaw in zawnna ah hing puilut hi.
24Mipilte lallukhu pen ahausatna uh ahi a,
hinanleh mi mote motna khu motna ma ahi.
25Theipitu dihtahin hinna ahunkhie hi,
theipitu lepchie in zuou thu agen hi.
26Mangpa giinna ziehin kimuonna hattah a um a,
ataten kibutna mun anei ding uhi.
27Mangpa giin khu hinna tuikhuh ahi a,
shina thang toh kipel theina ahi.
28Mitampi umna ah leengpa avanglien a,
hinanleh mipi umlouna ah leengtapate manthaina a um hi.
29Lungthah ha mi khu theisiemna nei ahi a,
lungthah bai mi pen amotna uh sulang bep ahi uhi.
30Lungnopna khu tahsa damna ahi a,
thangsietna pen gute nangawn muotna ahi.
31Koipou taga bawlgenthei khu asiempa simmaw ahia,
tasamte hepi mi khu Pasian zatat mi ahi.
32Migilou khu ama gitlouna ah pailut in a um a,
hinanleh midihtat in ashi na ah lam etna anei hi.
33Theisiemna nei mi lungsim ah pilna akhawl hi,
hinanleh mi mote lungsim a um khu akithei hi.
34Dihtatna in nam atawisang a,
hinanleh khelna khu nam zalatna ahi.
35Suoh piltahin leengpa deisahna atanga,
hinanleh zumna umsah mi tungah athangpaina atung hi.
Currently Selected:
THUPILTE 14: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.