KISIMNABU 32
32
Reuben, Gad leh Manasseh phung kimkhat Jordan suo lam a ten phal ahi
1Reuben leh Gad taten ganta tampi anei ua, tualeh Jazer gam leh Gilead gam amu tahun, tua mun khu ganhon dinga mun hoitah hiin athei ta uhi. 2Gad tate leh Reuben taten Mosi leh siempu Eleazar leh mipi kikhawmte lamkaite ahoupi ua. 3“Ataroth gamte, Dibon gamte, Jazer gamte, Nimrah gamte, Heshbon gamte, Elealeh gamte, Shebam gamte Nebo gamte leh Beon gamte, 4Israel mipi kikhawmte masanga Mangpa’n asuh mang gamte khu gantate dinga gamhoi ahi a, na suohten ganhon ka hau uhi,” achi uhi. 5Tuaziehin “Na mitmu a deisahna katan u’leh tam gam na suohte kung ah ka luo dingun hing pie inlen, Jordan gal hing kaipi da mai in chi’n ahing gen uhi.” 6Tualeh Mosi in Gad tate leh Reuben tate kungah, “Na unaute uh galdou a kuon ding ua, noute tam mun a tou mai ding maw? 7Bangdinga Mangpa’n amauh apieh gam a lutlou dinga Israel tate lung kesah na hi uoi? 8#Kisim. 13.17-33Tambangmain napu leh pate un Kadesh-Barnea akipat a gam enkhe dinga ka sawl laiin abawl uhi. 9Aziehpen amaute Eshkol phaijang dong ava tung ua, a gam ava mu tahun Mangpa’n amauh apieh gam lutlou dingin Israel tate alung kesah uhi. 10#Kisim. 14.26-35Tuachi’n, tua niin Mangpa lungthahna khu meibangin akuongdoh a, tualeh akichiem ta hi. 11Izipt gam akipat a hing pawtdoh, kum sawm ni apat atung lam, mi mawngmawng in, Abraham, Isaak leh Jakob kunga kichiema ka pieh gam khu, lungsim siengthou taha ahing zuilou zieh un koiman amu sih ding uhi. 12Keniz mi Jephuneh tapa Kaleb leh Nun tapa Joshua chiloungal, aziehpen amauten Mangpa azui bukim uhi. 13Tua Mangpa lungthahna khu Israelte tungah, akuong ta a, Mangpa mit mu a sil gilou bawl mite khang zousie abeimang sieng masangsie uh gamdai ah kum sawmli sung avahvai sah ta hi. 14Tualeh ngai un, Israel tunga Mangpa lungthahna zauhuoitah belap dingin nou khang giloute na pate uh taangin na dingta uhi. 15Aziehpen Mangpa zuilou a, na kiheimangsan ngeingei u’leh Aman amaute gamdai ah anuasie kia mai ding ahi, tualeh tam mite zousie na mangthaisah sieng ding uhi.” 16Tualeh amaute akungah ahing peikia ua, “Ka ganhonte ua dingin, belam honte leh ka taneute ua dingin khopite ka bawl ding ua: 17Hinanleh koute ahileh, amaute amun ding ua, ka lutsah masang sie uh, Israel tate masang a pei zel dingin ka kigalvon ding uhi; tam gam mite ziehin ka taneute uh kulpi nei khopite ah ateng ding uhi. 18Israel tate mi chinin agamluo ding uh aluo chiet masangsie un, ka inn lam uah ka kinuale sih ding uhi. 19Aziehpen koute gamluo ding Jordan gal nisuoh lam ahi ziehin, Jordan gal khatlam leh akallam ka luopi sih ding uhi,” achi uhi. 20Tuachi’n Mosi in akung uah, “Tam sil na bawl ua, galdou dinga Mangpa masanga, kigalvon a na pei ding ua; 21Amasanga kipata, melmate na nawmang masangsie ua, Jordan gal a Mangpa masanga na bawn ua kigalvon a na pei ding ua; 22Tualeh Mangpa masanga gal zaw ahi zou chiengin, na hing kinuale ding ua, Mangpa masang leh Israelte masangah mawnabei na hi ding uh, tualeh tam gam Mangpa masangah na luo ding uh ahi. 23Hinanleh tuabanga na bawl sih u’leh, Ngaiun, Mangpa tungah sil na bawl khiel uh ahi dinga, na khelna un ahing mukhe ngei ngei ding chi thei un. 24Na ta neute ua dingin khopite bawl unlen, na belamte ua dingin belam huongte bawl unlen, tualeh na kam ua thu pawtsa khu bawl ngei ngei un,” achi hi. 25Tualeh Gad tate leh Reuben tate’n Mosi kungah, “Na suohten ka pu uh thupieh bangin ka bawl ding uhi. 26Ka ta neute uh, ka zite uh, ka belamhonte u’leh ka ganhonte uh, Gilead khopite ah ana um ding ua. 27Hinanleh na suohte pen ka pu uh gen bangin galdou dingin Mangpa masangah mi chin kigalvon in kava galkai ding uhi, chi’n agen uhi.” 28#Josh. 1.12-15Tuachi’n Mosi in amaute tungthu ah siempu Eleazar leh Nun tapa Joshua leh Israel phung sunga upa pente thu apie a. 29Tualeh Mosi in akung uah, “Gad tate leh Reuben tate, kidou dinga kigalvon zousieten Mangpa masangah Jordan gal ahing kaipi ua, tualeh na masang ua gam na zaw u’leh, Gilead gam pen aluo ding ua na pieh ding uh ahi. 30Hinanleh kigalvon a ahing galkaipi sih u’leh, Kanaan gam ah na lah uah atel mai ding uhi,” achi hi. 31Tualeh Gad tate leh Reuben taten “Na suohte kunga Mangpa’n agen bangin ka bawl ding uh. 32Kigalvon a Mangpa masanga galkai in, Kanaan gam ah ka lut ding ua, tuachi’n ka gam luo ding uh pen Jordan luigal tam langpang ahi ding hi,” chiin adawng uhi. 33Tuachi’n Mosi in Gad tate leh Reuben tate kungah tualeh Joseph tapa Manasseh nam kimkhatte kungah, Amormite leengpa Sihon gam, Bashan leengpa Og gam, tualeh tua gamte leh akhopi teng leh akimvel gam khopite toh, apie hi. 34Tualeh Gad taten Dibon leh Ataroth leh Aroer toh 35Atroth, Sophan, Jaazer, Jogbehah, 36Beth-nimrah tualeh Beth-haran, khopi kulpi neite leh belam huongte abawlta uhi. 37Tualeh Reuben tate Heshbon, Elealeh leh Kirjathaim. 38Nebo leh Baal Meon (aminte akiheng ta hi) tualeh Sibmah atungdoh ua, a khopi bawlte uh min dang a phuo uhi. 39Tualeh Manasseh tapa Makir tate Gilead gam ah ava kuon ua, ala ua, tua muna um Amormite adeldoh ta uhi. 40Tuachi’n Mosi in Manasseh tapa Makir khu Gilead gam apeta a, asungah atengta hi. 41Tualeh Manasseh tapa Jair in tua khuote avala a, Havoth-Jair aphuo hi. 42Tuachi’n Nobah ava kuona, Kenath avala a, akhopite Ama min tapin Nobah aphuo ta hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.