KISIMNABU 30
30
Thu chiemna dante
1Tuachi’n Mosi in Israel tate phung sunga lamkaite a houpi a; “Tami ahi Mangpa thupieh. 2#Danp. 23.21-23; Mat. 5.33Mi’n Mangpa kunga thu achiem ahiei ahisihleh lungsim a amaleh ama kigah a, akichiem leh athuchiem apel ding ahi sih, akam a pawt bang banga abawl ding ahi.
3Numei in anungah lai a, apa inn a, a um lai in, Mangpa kungah thu achiema, athuchiem ah akigah a; 4Tualeh apa’n akichiemna leh amaleh ama thuchiem a, akigahna thu zanapi a, bangma genlou a aumleh akichiemna zousie a supiching dinga, tualeh thuchiem a akigahna zousie adet ahi ding. 5Hinanleh apa’n azah ni a, aphal sihleh, athuchiemte akigahna thuchiemten amanu akan kha nawnsih ding hi; apa’n aphal louziehin Mangpa’n amanu angaidam ding hi.
6A thuchiem lai a, ahisihleh athuchiemin amanu agah zinglai a pasal anei a; 7Apasal in tam thute azah a, azahni a bangma agen sihleh akichiemna atangtung dinga, akigahna thuchiem zong adet ding ahi. 8Hinanleh apasal in tam thu azah nia aphal sih leh akichiemna leh akigahna akam a agente khu bangmalou asuoh dinga, Mangpa’n amanu angaidam ding hi. 9Hinanleh Meithai leh akikhul numei in amaleh ama kigah a akichiemna ukhu a det ding hi.
10Tualeh apasal innsunga kichiemna anei a, ahisihleh amaleh ama kigah a thuchiem abawl a: 11Apasal in tam thute azah a, asipsan a, a awimawsih leh akichiemna zousie a tangtung ding a, akigahna thuchiem zousie zong a det ding hi. 12Hinanleh apasal in tua thute azah nia, bangmalou asuohsah leh athuchiem tungtanga akam a pawt pouma leh amaleh ama kigahna zousie adet sih dinga, apasal in bangmalou asuo sah tah zieh in, Mangpa’n amanu angaidam ding hi. 13Kichiemna zousie leh amanu hinna sugenthei dinga kichiemna zousie apasal in asudet thei dinga ahisihleh bangmalou asuoh sah thei ding hi. 14Hinanleh apasal in azah nia kipata bangma agen sihleh, akichiemna zousie leh kigahna zousie anamdet ahi; azah nia bangma agenlou ziehin. 15Hinanleh azah nua a, bangmalou asuoh sah leh aman amanu mawna apo ding hi.”
16Tamte khu apasal leh azi leh apa leh atanu anungah lai a, apa inn a a um lai a, akikal ua dan thupieh dinga Mangpa’n Mosi kunga thu apieh khu ahi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.