MATHIU 2
2
Suolam mipilte vena
1Tuin leengpa Herod in vai ahawm lai a, Judia gam a Bethlehem khuo a Jesu ahing pien in, En vawi, suolam akipat in mipilte Jerusalem ah ahing pei ua, 2“Judate leengpa hing pienna heisung ahiei? Suolam ah aasi ka mu ua, Ama be dinga hing pei ka hi uh,” achi uhi. 3Lengpa Herod in tam thute azahtah in alungbuoita a tualeh Jerusalem mite zousie zong ama toh abuoita uhi. 4Tualeh siempu liente leh mipite laigielmite zousie ahankhawm a, Khrist hing pienna ding heisung ahiei chi’n adongta hi. 5Tuachi’n amaun akungah “Judia gam a Bethlehem khuo ah; azieh pen guolnei in tambang in ana giel hi:
6 #
Mik. 5.2
‘Nang Juda gam a Bethlehem,
Juda khopite lah ah na neupen vawt sih hi,
Nang akipat in vaihawmpa khat hing pieng ding ahizieh in,
ka mi Israelte vengpa dingin,
akichi hi,’
achi uhi.”
7Tuachi’n Herod in mipilte adap hat a, aasi kilat hun kichientah in akankheta hi. 8Tualeh amaute Bethlehem ah asawl a, “Peita unlen naungeh thu kichientah in va kankhie un, tualeh na mu tah chieng un hing hil kia un, kei zong hing pei a ka hing bieh thei sam na dingin,”
achi hi.
9Lengpa thu azah nua un apeita uhi, tualeh en vawi, suolam a amu uh aasi khu naungeh umna tung zawn atun a akhawlden masangsie’n amasang uah apei zel hi. 10Aasi amu tah un nasatah a nuom in akipah mama uhi. 11Innsunga aluttah un, naungeh anu Mari toh um amu ua, tualeh akhupboh ua, abeta uhi. Tualeh a goubawmte uh ahong ua, akungah sana, begaw, leh Murrahte apie uhi. 12Tuachi’n Herod kung a kile kia lou dinga amang ua, vauhil a aum zieh un, lampi tuom zui in agam lam uah apeita uhi.
Izipt gam a taimangna
13Tuin amauh pei nua in, en vawi, Mangpa vansawlsieng khat Joseph kungah amang in ahing ki laha, “Thou inlen naungeh leh anu pui inlen Izipt gam ah taipi in, tualeh ka hing hil kia masangsie tuanah umden in, Herod in naungeh tha dinga sui ding ahi ziehin,” achi hi. 14Tuachi’n athou pai a, naungeh leh anu a pui a azan azan in Izipt gam lam ah apeita hi. 15#Hos. 11.1Tualeh Herod a shi masangsiein khunah aumdenta hi; Mangpa’n guolnei kam a, “Ka tapa Izipt gam a kipat ka handohta hi,” chi a agen ahing tangtun theina dingin.
Herod in Bethlehem naupangte athana
16Tuachi’n Herod in mipilten asol uh chi atheitah in alungthah mama a, mi asawl a, mipilte kunga ahun thu kichientah a adoh khieh bangtahin, Bethlehem khuo leh akim avel a pasal naupang kum ni nuoi lam zousie athatta hi. 17Tuachi’n guolnei Jeremiah thugen khu tua hun laitah in atang tungta hi.
18 #
Jer. 31.15
“Khum hunlai in guolnei Jeremiah in,
Ramah khuo ah aw akiza,
mishi ngai a kaa leh mauna,
Rachel in atate akaa a, a umnawn lou
zieh un, hamuon thei ahi sih,”
chia a gen khu.
Izipt gam akipata anuakiana
19Hinanleh Herod ashi bep in, Ngai in, Mangpa vansawlsieng khat Izipt gam a Joseph kungah amangin ava kilah a; 20“Thou inlen naungeh leh anu pui inlen, Israel gam ah pei in, naungeh tha tumte ashitah zieh un,” achi hi. 21Tuachi’n athou a naungeh leh anu apui a, Israel gam ah apeita uhi.
22Hinanleh Arkelaus khu apa Herod tangin Juda gam ah vai ahawm chi azah in khum lang a pei ding azauta hi. Tualeh amanga Pasian in athuhil ziehin Galili gam lam ah akile hei a apeita hi. 23#Mak. 1.24; Luk. 2.39; Jn. 1.45Tualeh Nazareth kichi khuo khat ah a umta hi; guolneiten “Ama khu Nazareth mi” achi ding uh chia agen uh atangtun theina dingin.
Currently Selected:
MATHIU 2: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.