MATHIU 16
16
Chiemtena ngetna Jesu’n penuomlou
(Mak. 8.11,12)
1 #
Mat. 12.38; Luk. 11.16 Tuachi’n Pharisaite leh Saddukaite ahing pei ua, Ama ze etna dingin van akipat chiemtena amauh ensah dingin angen uhi. 2Aman adawnga akung uah, “Nitahlam chiengin khuo apha ding hiva, mei san asuoh na chi zel uhi. 3Tualeh zingmawng chiengin, Tuni khuo ase ding hiva, mei san a suoha angiemkai hi, na chi thei zel uhi. Nou milepchiete aw, van umdan na theisiem ua, hinanleh hun chiemtena na thei siem sih uhi. 4#Mat. 12.39; Luk. 11.29Khangtha gilou leh angkawm hatte’n chiemtena asui ua, hinanleh guolnei Jonah chiemtena loungal akung uah chiemtena dang pieh ahi sih ding, achi hi. Tualeh amauh anuasie a, apeita hi.
Pharisaite leh Saddukaite tol
(Mak. 8.13-21)
5Tualeh anuazuite gallang khat atun un, tanghou apo manghil uhi. 6#Luk. 12.1“Tuachi’n Jesu’n akung uah, Pharisaite leh Saddukaite tol lah ah kiveng unlen, pilvang un” achi hi.
7Tualeh amaun “Tanghou ipuoh lou zieh ave maw,” chiin akingai sut uhi. 8Jesu’n tuakhu atheidoh tahin akung uah, “Nou ginna tawmte aw, tanghou na puohlou zieh ua bang ding a kingaituo na hi uoi? 9#Mat. 14.17-21Tu nangawn a na lungsim ua thei nailou na lailai na hi uoi mah? Mi tulnga, vahna tanghou pheng nga leh na seupi dimsah za uh, na thei zing sih uh amah? 10#Mat. 15.34-38Mi tulli, vahna tanghou pheng sagi leh na seupi dim zat uzong? 11Tanghou thu na kung ua gen ka hi sih a, Pharisaite leh Saddukaite tol lah ah kiveng un, chia gen ka hizaw chi bang ding a theisiemlou na hi uoi?” achi hi.
12Tuabepin amaun tanghou tol lah a kiveng ding a thuhil hilou in, Pharisaite leh Saddukaite thuhilna lah ah pilvang dingin amauh athuhil ahizaw chi atheita uhi.
Peter in Jesu Khrist ahi chi a aphuonna
(Mak. 8.27-30; Luk. 9.18-21)
13Jesu Kaisaria Philippi gam ahing tun tahin Anuazuite Kungah, “Mite’n Kei Mihing Tapa khu koi ahi achi uoi?” chi’n adong hi. 14#Mat. 14.1,2; Mak. 6.14,15; Luk. 9.7,8Tuachi’n amaun, “Kimkhat in Baptispa Johan ahi ahing chi ua, Kimkhat in Elijah ahi achi ua, tualeh adangten Jeremiah, ahisihleh guolneite lah a khat ahi, ahing chi uhi,” achi uhi. 15Aman akung uah, “Ahileh nouten kei koi ahi na hing chi uoi?” achi hi. 16#Jn. 6.68,69Tuachi’n Simon Peter in adawng a, “Khrist Pasian hing Tapa khu na hi,” a chi hi.
17Jesu’n adawnga akungah, “Simon Bar-Jonah#Bar Jonah (Aramaik) Jonah (Johanan) Tapa china ahi. na hampha hi, tahsa leh sisan in ahing theisah na hi sih a, Ka Pa van a um in ahing theisah na hi zaw hi.” 18Tualeh Ken zong na kungah, Nang Peter na hi, chi ka hing hil ahi, tualeh tami suongpi tungah ka hattuom ka lam dinga, mishi khuo kul kotkhaten tuami azouthaw sih ding hi. 19#Mat. 18.18; Jn. 20.23Ken vangam chabite nang ka hing pe dinga, leitunga na kaan pouma van ah zong kaan ahi dinga, tualeh leitunga na sutkhieh pouma van ah zong sutkhieh ahi ding,” achi hi. 20Tuachi’n Ama khu Jesu Khrist ahi chi koima hillou dingin anuazuite khautah in thu apie hi.
Jesu’n a shina ding leh athawkiana ding thu agen lawhna
(Mak. 8.31—9.1; Luk. 9.22-27)
21Tua hun akipat in Jesu’n Jerusalem ah apei dinga, upate, siempu liente, leh laigiel mite, lah a sil tampi athuoh dingte leh tha a a um dingdan leh, ni thum ni a athawkia ding dante, anuazuite atheisah panta hi. 22Tuachi’n Peter in Ama apuituom a, Pasian in phalsih heh, “Mangpa! Tambang na tungah tung ngai sih heh,” chi’n aphawhhilta hi. 23Hinanleh Ama akihei a, Peter kungah, “Setan ka nua ah pei in, Kei a dingin kipalpuana na hi, Pasian silte ngaituo louin, mihing silte na ngaituo zaw zieh ahi,” achi hi.
Jesu nuazui dan ding
(Mak. 34-37; Luk. 9.23-25)
24 #
Mat. 10.38; Luk. 14.27 Tuachi’n Jesu’n anuazuite kungah, “Mi koipouin ahing zui ut leh ama gimthuoh khawhsa louin, a kros puo in hing zui heh. 25#Mat. 10.39; Luk. 17.33; Jn. 12.25Koipou ahinna humbit ut in ataan dinga, tualeh Koipou keima zieh a ahinna tan in amu ding hi. 26Mi khat in leitung pumpi nei henlen, ahinna taan taleh ama adingin bang aphatuom diei? Ahisihleh min ahinna taangin bang ahiei apieh ding? 27#Mat. 25.31; Late. 62.12; Rom. 2.6Mihing Tapa khu vansawlsiengte toh a Pa thupina a kizemin ahing pei ding zieh in, tua hun chiengin michin anasep dungzui un nuomman ape chiet ding hi. 28Chitahtahin ka hinghil ahi, Tana dingte lawikhat Mihing Tapa aleenggam a hing pei amu masangsie uh, shina chiem vawtlou ding a um uhi,” achi hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.