MATHIU 13
13
Buchithepa gentena thu
(Mak. 4.1-20; Luk. 8.4-15)
1Tua ni main Jesu khu inn apat in apeidoh a, tuipi pieu ah atouta hi. 2#Luk. 5.1-3Tualeh akungah mipi tampi ahing kikhawm ua, tuachi’n Ama kuong khat ah alut a, atouta hi, tualeh mipi zousie luipieu ah ading uhi. 3Tuachi’n Aman akung uah, gentenain thu tampi agen a, Ngai vawi un, “Buchithepa khat buchithe dingin akuon a; 4Tualeh athe laiin kimkhatte lamgei ah akie a, vate ahing pei ua, atom beita uhi. 5Kimkhatte suongsilei lah ah akie a, lei asalou ziehin ahing pou pai a; 6Hinanleh ni ahing suoh in a emvuoi a, thahui aneilou ziehin avuoi paita hi. 7Kimkhatte loulingnei lah ah a kie a, lingte ahing khang lien a, adepmangta hi. 8Hinanleh adangte lei hoi ah akie a, Kimkhatte ale za bangin, kimkhatte ale sawmguh bangin, kimkhatte ale sawmthum bangin ahing gata hi. 9Koipou zahna ding bil nei pouma in za heh,” achi hi.
Gentena thu kigenna zieh
10Tuachi’n nuazuite ahing pei ua, akungah, “Bangdinga akung ua gentena thu nagen ahiei?” achi uhi. 11Aman adawnga akung uah, “Aziehpen vangam thuguh khu noute thei ding phal ahia, hinanleh amaute thei ding pen phal ahi sih hi. 12#Mat. 25.29; Mak. 4.25; Luk. 8.18; 19.26Koipou aneite pieh be ahi dinga, ahau semsem ding, hinanleh koipou aneilou khu, anei sun zong lahpieh ahi ding. 13Tuaziehin akung uah gentena in thu ka gen ahi, aziehpen amauten mu napiin amu sih ua, tualeh za napiin aza sih ua, thei zong atheisiem sih uhi. 14#Isai. 6.9,10Tualeh Isai in ana genlawh khu atung uah ahing tangtungta hi:
Zahpen na za ding ua,
na theisiem sih ding uhi;
Mu pen na mu ding ua,
na theichien but sih ding uhi.
15Azieh tam mite lungtang amawlgawpta a,
abil uh abingta a,
a mitte uh asingta uhi,
tuachilouin amit un amu kha ding ua,
abil un aza kha ding ua,
tualeh alungtang un athei kha ding ua,
ahing kinuahei kia kha ding ua,
Ken amauh ka na sudam kha ding hi,
chi a ana gen khu.
16 #
Luk. 10.23,24 Hinanleh noute mit vang amu ziehin ahampha hi, na bil uh zong azah zieh in ahampha hi. 17Chitahtahin ka hing hil ahi, guolnei tampi leh midihtat tampiin zong na sil mute uh mu aut ua, ahivangin amu sih uhi, tualeh na sil zahte uh zong aza nuom ua, hinanleh aza sih uhi.
Buchithepa gentena hilchienna
18“Tuaziehin buchithepa gentena thu za un. 19Koipouin leenggam thu azah a, atheisiem sih leh, migiloupa khat ahing pei a, alungtanga thesa khu alahmang pieh zel hi. Tua khu lam gei a thepa ahi. 20Suongsilei lah a kithete khu, thu za a, kipahtah a pom pai bang ahi uhi. 21Ahivang in ama a thahui anei lou ziehin tomnou khat sung a um a; thu ziehin gimthuohna ahiei, gawtna ahiei, ahing um chiengin apua pai zel uhi. 22Tualeh loulingnei lah a the pen, thu khu za a hinanleh leitung awlmawnate leh hausatna solnain thu khu adep a, tuachi’n ama khu ga nei louin a umta hi. 23Hinanleh lei hoi tunga the pen, thu khu za a theisiem mi ahi; tua khu ga zong aga a, kimkhatte aleza bang, kimkhatte ale sawmguh bang, kimkhatte ale sawmthum bang in apung uhi,” achi hi.
Bulemte gentena
24Gentena dang akung uah agen kia a, “Van gam khu, mi alou a haichi hoi thepa toh gente ahi. 25Hinanleh mite a imut kaal un amelmapa ahing pei a, bu lah ah bulem athe a, apeimangta hi. 26Tuachi’n bu khu ahing pou a, ahing vui a, tuachi’n bulemte zong ahing kilangta hi. 27Tuachi’n inn neipa suohte ahing pei ua, akung ah, Pu na lou a chi hoi the hilou na hiei mah? bulemte hei akipat a hing um ahi uoi? achi uhi. 28Aman akung uah, melma khat in abawl ahi, achi hi. Asuohten a kungah, ahileh koute va peiin tuate va lakhawm u’leeng hoi na sa ei? achi uhi. 29Hinanleh Aman hoisa lou e, bulemte na lahkhawmna lam uah, butahte zong na botkhawm kha ding uhi. 30Bu lah dongin poukhawm u’heh, tualeh bu at hun chiengin, bu atte kungah, bulemte lakhawm masa phot unlen, mei a hal dingin alom lom in kaan un; hinanleh bute pen ka bupang sungah koilut un, ka china ding hi,” achi hi.
Ankamtang gentena
(Mak. 4.30-32; Luk. 13.18,19)
31Gente thu dang akung uah agenkia a, “Van gam khu ankam tang khat mi’n alaah a, alou a athe bang ahi; 32tua khu, haichi lah a neupen ahi a, hinanleh ahing khanlet chiengin, hampate sangin ahing lienzaw a, singkung ahing hita hi; tuachi’n tungleeng vate ahing pei ua, abazamte ah ahing gieh uhi,” achi hi.
Tol gentena
33Gentena dang khat akung uah agen kia a, “Vangam khu numei khat in tol alaah a, tangbuong tena thum lah a abawn a ajelsuoh masangsie a, aphum bang ahi,” achi hi. 34Tam silte zousie Jesu’n gentena thuin mipite kungah agen a, gente thu louin akung uah bangma agen sih hi. 35#Late. 78.2Guolnei in,
“Gentena in ka kam ka kaah ding a,
Leitung siemchil a kipat sil aguh a,
kiphuol khu ka gendoh ding hi,
achi khu ahing tangtunna dingin.”
Bulem gente thu hilchienna
36Tuachi’n Jesu’n mipite asawlmanga, innsungah alut a; tuachi’n nuazuite akungah ahing pei ua, “Lou a bulem gentena thu hing hilchien in” achi uhi. 37Aman adawnga, akung uah, “Tua haichi hoi thepa khu Mihing tapa ahi a, 38Lou khu Leitung ahi, haichi hoite khu, leenggam tate ahi ua, tualeh bulemte khu migilou tate ahi uhi. 39Melma athepa khu Diabol ahi a, bu lah hun khu leitung tawpna ding ahi, a atte khu vansawlsiengte ahi uhi. 40Tuazieh in bulemte khu akhopkhawm ua, mei a ahal bangun, leitung tawp hun chiengin a um ding hi. 41Mihing Tapa in vansawlsiengte asawldoh ding a, aleenggam akipat in khelnabawlsahte leh silgilou bawl zousie akhawm khawm ding ua, 42tualeh meilipi sungah apailut ding ua, khunah ka leh hagawtna a um ding hi. 43Tua hun chiengin midihtatte khu a Pa uh gam ah, ni bangin ataang ding uhi. Koipou zahna ding bil neiin za heh.
Suongmanpha gou leh lenpi gentena
44“Van gam khu lou lai a gou kiphuol bang ahi, tua khu mi khat in amu a, aphuoldap a, akipah ziehin, lungnuom tahin apei a, anei zousie azua a, tua lou khu aleita hi.
45“Tualeh van gam khu summetbawl mi suongmanpha hoitah sui bang ahi kia hi. 46Aman suongmanpha mantamtah khat amu a, apei a, anei zousie azua a aleita hi. 47“Vangam khu lenpi tuipi a sepluta nga namkim huoikhawm bang ahi kia hi. 48Tua khu adimtahin pieugei ah akaikhie ua, atou ua, ahoite khu bawm sungah aguong ua, ahoiloute pen apaimang uhi. 49Leitung bei chiengin tuabangin a um ding hi. Vansawlsiengte ahing pawtdoh ding ua, migiloute khu midihtatte lah akipat akhenkhe ding ua; 50Haltuina meilipi ah amaute apai ding uhi, khunah ka leh hagawtna a um ding, achi hi. 51Jesu’n akung uah, “Tam silte zousie na theisiem na uoi?” achi hi. Amaun akungah “Ing” Mangpa, achi uhi. 52Tuachi’n Aman akung uah, “Tuaziehin laigielmi vangam thu a hil a um pouma khu, inn neipa agoubawm akipata sil lui leh sil tha pholdohpa bang ahi,” achi hi. 53Tualeh hichi ahi a, Jesu’n tam gentena thute agen zouin, khuna pat in apeidohta hi.
Nazareth ah Jesu anuol uh
54Tualeh Ama a umna gam lam a ahing tun tahin, akikhopna inn uah amauh thu ahil a, tuachi’n amauten lamdang asa mama ua; “Tam mipa’n tambang pilna leh sil thupi bawltheina hei akipat a amu ahiei? achi uhi. 55Tam Mipa, sing bawlsiempa tapa hi ngel lou amah? Anu Mari kichinu hilou ahiei mah? Tualeh asanggamte khu Jakob, Joseph, Simon, leh Judas hilou ahi uoi mah? 56Tualeh asanggam numeite zong ikung ua um hilou uh i? Tua ahileh tam Mipa’n tam silte zousie hei akipata amu ahiei?” achi uhi. 57#Jn. 4.44Tuachi’n atungah, alunghimawta uhi. Hinanleh Jesu’n akung uah, “Guolnei ama gam sung leh ama inn sung loungal ah, pahtawi louin a um ngai sih hi,” achita hi. 58Tualeh agintatlou zieh un, Aman khunah sil thupi tampi abawlta sih hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.