LUK 24
24
Jesu thawkiana
(Mat. 28.1-8; Mak. 16.1-8; Jn. 20.1-10)
1Tuin hapta khat a ni masapen zingmawng matahin agimnamtui bawlte uh tawi in, midang koite ahiei toh han ah ahing haw uhi. 2Amaun hankhuh apat suong kiliakhesain amu uhi. 3Tuachi’n asungah alut ua, Mangpa Jesu luong amuta sih uhi. 4Tualeh amaute tam thu a nasatah a alungbuoi lai un, ngai vawi, mi ni puon vam tesilsel sil in a kung uah ahing ding uhi. 5Amaute zau a leia abawhkhup lai un, amaun akung uah, “Bangding a mishi lah a mihing sui na hi uoi? 6#Mat. 16.21; 17.22,23; 20.18,19; Mak. 8.31; 9.31; 10.33,34; Luk. 9.22; 18.31-33Tanah a um nawn sih hi, athoukia ta hi; Galili gama aum lai a na kung ua agen khu thei ngitnget un, 7Mihing Tapa khu mikhielte khut a matsah in a um dinga, Kross ah akilbeh ding ua, tualeh ni thum niin athoukia ding achi khu,” achi uhi.
8Tuachi’n amaun athugente ahing theidohta uhi. 9Tuachi’n han akipat anuapei kia ua, tam silte zousie sawmlekhatte leh midang zousie kungah ahilta uhi. 10Sawltahte kunga tam silte va hilte khu, Mari Magdalene toh, Joana toh, Jakob nu Mari toh, tualeh amaute toh umkhawm numei dangte toh ahi uhi. 11Hinanleh athugente u’khu thu maimai bangin angai ua, atahsang sih uhi. 12Tuachi’n Peter adingdoh a, han lam ah ava tai a, kunsuh a hankhuh a et leh atuomna puonnemte maimai na um amu a, sil umdante lamdang sa kawm in inn lam ah apeikiata hi.
Emmau lampi a Jesu kilahna
(Mak. 16.12,13)
13Ngai vawi, tua ni mama in alah ua mi ni Emmau kichi khuo khat, zuon in apei uhi. Tua khuo khu Jerusalem akipat a tai sagi a gamla ahi. 14Amaute gel khu tam sil hing tungte zousie genin ahoulim uhi. 15Tuabanga amautegel houlim a akikupkhawm lai tah un, Jesu mama in amauh ava nai a, amautegel toh azawhkhawmta hi. 16Hinanleh Ama athei louna ding un, amitte uh suhvai in a um hi. 17Tuachi’n Aman akung uah, na pei kawm ua, “Bang thu houlim a, tambanga daamel puo na hi uoi?” achi hi. 18Tuachi’n amagel lah a khatpa amin Kleopa kichi penin adawnga akungah, “Tulai a sil umdante na theilou, Jerusalem ah nang maimai mikhuol na hiei mah?” achi hi.
19Aman akung uah, “Bang sil umdante la?” achi hi Tualeh amaun akungah, “Nazareth Jesu, Pasian leh mi zousie mitmu a silbawlthei leh thugen guolnei minthangtah tungtang thu: 20Ama pen siempu liente leh ka vaihawmte un shi dinga mawpai ding leh Kross a kilbeh ding a, apiehkhiet dan uh thu. 21Hinanleh kouten Israelte tankhepa ding Ama ahi chi ka kinem uhi, tualeh tamte chilou zong, tam silte hing tun kalsie tuni ani thumni ahita hi. 22Tuathamlouin ka lawi lah ua numei pawlkhat han a mataha va hawten ahing lungdong sah mama uhi. 23Aluong ava mu lou bep un ahing kinualekia ua, Ahing kiata chia hing hil vansawlsiengte zong ka mu uh, achi uhi. 24Ka umpite u’lah a pawlkhat han ah ava pei ua, numeite gen bangbang ava mu ua, hinanleh Ama ava mu sih uhi,” achi uhi.
25Tuachi’n Aman akung uah, “Oh, mi mote leh guolneite thugen zousie lungtanga tahsan hasa sate! 26Khrist in tam silte thuoh a, Athupina a lut ding mawng hilou ahiei mah?” achi hi. 27Tuachi’n Mosi leh guolneite zousie laibu a kipat Pasian Laisiengthou pumpi a Ama tungtang kigielte akung uah ahilchienta hi.
28Tuachi’n ahawna ding khuo uh atun kuon un, Ama pen gamlapi a peisuoh ding bangin a um hi. 29Hinanleh amautegel in Ama ahou ua, “Ka kung uah taam mai ve aw, nitahlam ahita a, ni zong tum ding ahita hi,” achi ua, tuachi’n akung ua um dingin khuo ah alutta uhi. 30Amaute gel toh annkuong a atou lai in, tanghou ala a, aguolzawl a, tualeh abalkeh a, amauh apie hi. 31Tuachi’n amit uh ahing vahta a, Ama a theita uhi, tualeh Ama pen amitmu ua kipat amang ta hi. 32Tualeh amautegel akihoulim ua, “Lampi a ahing houpi a, Laisiengthou thute ahing hilchien laiin ilungtang isung ah akuong hiel hilou ahiei mah?” akichi uhi.
33Tuachi’n tuami hun mama in amautegel adingkhie ua, Jerusalem ah akinuale kia ua, Sawm leh khatte leh akung ua umkhawmte ava mu uhi. 34Amauten “Mangpa athoukia tahtah ahi, Simon kungah zong akilahta hi,” ana chi uhi. 35Tualeh amaute gelin zong, lampi a asiltuohte u’leh tanghou aphalsuo a, Ama atheidoh dante uh ahil uhi.
Sawltahte kung a Jesu kilahna
36Tambang silte agen lai un Jesu mama alah uah ahing ding a, akung uah, “Na tung uah hamuonna um hen,” achi hi. 37Hinanleh amaute achiza ua, azau sengseng ua, shiha muin akingaituo uhi. 38Aman akung uah, “Bangdinga hichi patau na hi uoi? Tualeh bang zieh a na lungtang ua ginlana hing um ahiei? 39Ka khutte leh ka kephangte En un, Keima mama hilou ka hiei mah? hing tham unlen, hing vel un. Mishi ha in tua ka nei na mu uh tahsa leh guletaangte a nei sih hi,” achi hi.
40Tam thute agen zouin, akhut leh akengte amauh a ensahta hi. 41Tualeh amauh akipah seng tahluot zieh ua, gingta ngamlou khop a lamdang asah lai un, Aman akung uah, “Tanah neh ding bang ahiei khat na nei uoi?” achi hi. 42Tuachi’n amaun akungah, nga emminsa khat leh khuoizu khal khat apie uhi. 43Aman tuate ala a, amasang uah aneta hi.
44Tuachi’n Aman akung uah, “Na kung ua ka um lai a, ka gen Mosi dan leh guolneite laibu leh Late laibu a ka tungtang kigielte zousie, tungkim teitei ding ahi chia, kagente khu tam thute ahi,” achi hi. 45Tuachi’n Laisiengthou thute atheisiemna ding un Aman alungtang uh avahsahta hi.
Khantanhoi gen ding a vaihahna
(Nasep. 1.3,8)
46Tuachi’n Aman akung uah, “Tambanga gel ahi, tambangin Khrist in gimna athuoh ding a, ni thum ni a mishi lah akipat athawkia ding mawng ahi. 47Tualeh kisiana leh khel ngaidamna khu Ama min in Jerusalem akipat in namchin lah ah gen ahi ding hi. 48Noute pen tam silte theipite na hi uhi.
Jesu van a akaltouna
(Mak. 16.19; Nasep. 1.9)
49 #
Nasep. 1.4
Ngai un, Ka Pa thuchiem noute tungah ka hing sawl ding hi; hinanleh tunglam akipat silbawltheina a thop na hi masangsie un Jerusalem khopi ah um khinkhien un,” achi hi. 50#Nasep. 1.9-11Tualeh Aman Bethani khuo dongin amaute azawpi a, tualeh Aban azah a ama uh aguol zawl hi. 51Tualeh hichi ahing hi a, amauh aguolzawl laitahin, Aman apeisanta a, van ah puitouin aumta hi. 52Tuachi’n amauten Ama abie ua, lungnopna thupitah toh Jerusalem ah anuakiata uhi. 53Tualeh biehinn ah Pasian phat leh pahtawi in a umdenta uhi, Amen.
Currently Selected:
LUK 24: ZOUBSI
Highlight
Share
Copy
Want to have your highlights saved across all your devices? Sign up or sign in
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.