HOSEA 7
7
Theisasa a Mangpa kunga kinuale utlou
1Israel damsah ka tup chiengin,
Ephraim thulimlouna leh,
Samaria gitlouna akilangdoh zel hi.
Amauten zuouthu agen ua,
asung lam ah guta alut a,
apulam ah suomhat hon in ana suom uhi.
2Agitlouna zousie uh ka theizing ahi chi,
alungtang un angaituo ngai sih uhi;
tuin vang asilbawlte un amauh aimkimkotta a,
ka masangah a um uhi.
3Agitlouna un leengpa akipahsah ua,
azuou gen un a miliente uh akipahsah uhi.
4A bawnpi un angkawm ngen ahi ua,
tanghou kangmiin tol in ajelsuoh masangsie a,
tangbuong amehman zieh a mei sawn atawpsan,
lungthu kisulum bang, ahi uhi.
5I leengpa ni chiengin,
miliente zu chia dawn in akham ding ua,
Aman misimmawhatte toh akhut azah ding hi.
6Mi adapbuh lai un alungtang uh,
lungthukhua a mei-am sa bangin abawlzouta ua,
alungthahna uh zankhuo in adai a,
zingmawng in mei bangin akuongdoh hi.
7A unpi un lungthukhua bangin asa ua,
vaihawmte uh anetum uhi,
aleengte zousie uh apua ua,
alah uah koima kei hing han a um sih uhi.
Israel leh namdangte
8Ephraim lah namdangte toh akigopta a,
Ephraim khu tanghou kan khulelou ahi.
9Gamdang miten athahatna anehkhawng piehta ua,
hinanleh aman athei sih hi,
Ahi, asatunga amulte akaang siengta a,
hinanleh aman athei sih hi.
10Israel akiletsahna in amai ah aheeh a,
hinanleh Mangpa a Pasian uh kungah,
akinuale kia sih ua,
tamte zousie zieh in Ama asui tuom sih uhi.
11Ephraim khu vakhu lungmawl,
lunggel theilou ahi nalai a,
Izipt ahan a,
Assiriate kungah ahaw hi.
12Apeinachinteng uah,
ka len ka zah khum dinga,
tungleeng vate bangin ka kaikhesuh ding hi;
akhawmpite un azahsa mabangin,
amaute ka phawh ding hi.
13Atung uh agih hi,
Kei apat a ataimang ziehun!
Amaute adingin sietna ahi.
Ka tunga atatkhel ziehun!
Amaute tankhe nanleng zong,
Keima kal in zuou agen nalai uhi.
14Amauten alungtang tahtah un,
Kei ahing han nuom sih ua,
alupna tungte uah kap leh mau in aum uhi.
Bu leh zu tha a dingin akikhawm ua,
ka tungah ahel uhi.
15Keima mama in amaute chiil in,
abantha uh hatsah nanleng zong,
ka tungah silhoilou abawlsawm nalai uhi.
16A nuakia ua,
hinanleh Tungnung Sang Pen kungah ahisih hi;
thalpi lepchie bang ahi ua,
alei ua samsietnate ziehin amiliente uh,
namsau in apua ding uhi.
Tamte Izipt gam a,
nuisat a aumna ding uh ahi ding hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.