ESTHER 2
2
Vasti mun luo ding suina.
1Tam silte nua a leengpa Ahasueras lungthahna ahing dambep in, aman Vasti in bang ahiei abawl a, atunga bang thupieh kikesah atai chi ahing ngaituodoh hi. 2Tuachi’n leengpa nasem asuohten leengpa kungah, “Leengpa adingin nungah siengthou dawnglai melhoi khat kisui hen, achi uhi. 3Tualeh leengpa’n nungah siengthou melhoi zousie susa leeng innpi a numeite umna inn ah, numeite kempa, leengpa michilge Hegai etkolna inn a hing puikhawm dingin aleenggam sung leh gamkai pumpi ah miliente guot henlen, akizepna ding uleh akinu ding uh van leh sathaute kipie hen. 4Tualeh nungah leengpa lungkimna pen khu Vasti taangin leengnu hita hen,” achi uhi. Tam thu in leengpa akipahsah a, aman tuabangin abawlta hi.
5Tualaitah in susa leeng innpi huong sungah Juda mi khat aum a, amin Mordekai ahia, Jair tapa ahi. Jair khu Shimei tapa ahia, Shimei khu Kish tapa ahia, Benjamin mite khat ahi. 6#2 Leeng. 24.10-16; 2 Khang. 36.10Kish khu Babilon leengpa Nebukadnezzar in Judate leengpa Jakoniah#Jehoiakim zong aki chi hi. toh Jerusalem apata sal a apui khawmte lah a khat ahi. 7Mordekai in apaneu tanu asanggam numei khat Hadassah tua khu Esther ahi, ana kem piching a, amanu’n nu leh pa a nei nawn sih a, tam nungah khu amelhoi in aduong ching mama hi, tualeh anu leh apa ashitaah ziehin Mordekai in ama tanu dinga a lah ahi.
8Tuachi’n leengpa thupieh leh athuphuonte akizah tahin, nungah tampi Shushan a leeng innpi a Hegai mikepna inn a ahing kikhopkhawm tah un, Esther zong leengpa leeng inn huongsungah ahing zawpi ua, Hegai in akikemsah hi. Hegai pen numeite umna enkolpa ahi. 9Esther in Hegai alungkim sah a, adeisahna anga hi. Tuachi’n aman melhoina dinga, kinu leh kizutna ding leh ann neh ding hoitah leh leengpa innpi sung a kipat in nungah teltuom sagi kintah in ape pai a, tualeh aman amanu leh anungahte umna dingin numeite umna innsunga mun hoipen aguot piehta hi.
10Mordekai in genlou ding chia akham ziehin, Esther in, achi anam leh abe aphung koima kung ah agen sih hi. 11Tualeh Mordekai in Esther bangchin aum ei, tualeh atungah bang thu aum ei, chi thei nuom in numeite umna innmai leituol ah nichin in avah kawi kawi hi.
12Nungah chinteng leengpa Ahasueras mai a akilah hun uh ahing tuntahin, numeite dinga dan kibawlpieh ha sawm leh hani a um nua un, tuabanga akisiensahna nite uh suhbukim ahi zel hi, ha guh sung mura thau akizut ding, haguh sung gimnamtuite a kizut ding, tualeh numeite melhoina ding a kizutna dang dangte kinu ding ahi. 13Nungahte leengpa mai a ava kilah hun chieng un, numeite umna inn-a kipat a leengpa innpi a alut chieng a aken ding adei dei pieh ding ahi. 14Nitahlam in amanu ava haw a, azingni zingmawng in numeite umna inn nina ah, leengpa michilge Shaashga, leengpa meite kempa kunga ahing kinuale kia ding ahi. Lengpa’n amanu tunga alungkim a amin a nua hat kia ahilou ngal leh leengpa kungah ahawkia thei nawn sih ding hi.
Esther kiteldohna
15Atanu dinga amanu lapa Mordekai paneu Abihail tanu leengpa kunga ahaw hun ahing tun tahin, amanu’n numeite kempa leengpa michilge Hegai in athumopna chiloungal bangma angen sih hi. Esther in ama ente zousie deisahna atangta hi. 16Lengpa Ahasueras vaihawm kum sagina, aha sawmna, Tebeth ha in Esther leengpa innpi ah puilut in aumta hi. 17Lengpan numei dangte zousie sangin Esther a it penta a, nungah siengthou dangte sangin leengpa deisahna leh hepina atangta hi, tuazieh in leengpa’n Esther lutungah a leenglukhu akhusah a, Vasti mun ah leengnu in apangsahta hi. 18Tuachi’n leengpan amiliente leh avaihawmpite adingin annkuong Esther annkuong kichi thupitah in alui a, agam sung pumpi ah khawlni aphuonga, akiphalna dungzui in kipahman ahawm hi.
Mordekai in leengpa kiguh phielna agen khiehna
19Nungah siengthoute aniveina dinga ahing kikhop khawm lai un, Mordekai khu leengpa innpi kotkha ah atou hi. 20Hinanleh Mordekai in ahil bangin Esther in amanu hing kipatna innkuon leh aminam hina agenkhe nai sih hi, aziehpen Esther in Mordekai thuhilnate ama innsung a, akhawi piching lai mabangin a zui nalai hi.
21Khummi hunlai a, Mordekai leengpa innkotpi a atou lai in, leengpa michilge nite Bigthan leh Teresh, kotpi venga umtegel alungthah ua leengpa Ahasueras tha tum in thu aguh phiel uhi. 22Tam thu kiphielgu khu Mordekai in atheikhata a, aman tam thuguh leengnu Esther kungah ahil a, tualeh Esther in Mordekai min in leengpa kungah ahil hi. 23Tam thu ahing kikanchien tahin, adih ahi chi akimuta a, tuachi’n tua mi nite kikhailupna tau tungah akikhailumta uhi. Tam thute leengpa muna ngel ah, leengte khangthu gelna laibu ah akigiel hi.
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.