NASEPTE 5

Anania leh Saphira khelna leh shina

1Hinanleh mi khat amin Anania in azi Saphira toh aneisa khat uh azua ua; 2Tualeh aman sekhat ama a dingin a im a, azi in zong athei hi, tualeh sekhat hing tawi in sawltahte keng bul ah akoi hi. 3Hinanleh Peter in, “Anania Hagau Siengthou sol ding leh gam man sekhat im ding a, Setan in na lungtang aluodim bangchidan ahiei? 4Gam khu zua lou a aum lai in, nanga hilou ahiei mah? na zua nua in zong nangma thuthu hinalai lou ahiei mah? Bangdinga tambang sil bawl dinga na lungtang a ngaituo na hiei? Mihing sol na hi sih a, Pasian sol na hi zaw hi,” achi hi. 5Anania in tam thu azah tahin apua a, ashita hi. Tuachi’n tam thu za zousie azau mama ta uhi. 6Tuachi’n tangvalte akipan ua, Anania luong atuom ua, azawngdoh ua, avuita uhi.

7Tualeh naikal thum ding vel nuain, bang sil tung ahiei chi theiloupi in azi ahing lut hi. 8Tuachi’n Peter in akungah, “Hing hil in gam na zuana uh hiza bep ma ahi na amah” chiin adonga, amanu’n “Hi hiza bep ma hina,” achi hi.

9Tuachi’n Peter in akungah, “Bangchidan a, Mangpa Hagau ze et ding a kithutuoh na hi uoi? Ngai in, na pasal vuite keng kotkhah bul ah ahing tungta, nang zong ahing zawng ding uhi,” achi hi. 10Tuatahin akeng bulah apua pai a ashita hi. Tuachi’n tangvalte ahing lut ua, amanu shisa in amu ua, azawng doh ua, apasal kungah avuita uhi. 11Tuaziehin hattuom zousie leh tam thu za kha pouma nasatahin azauta uhi.

Sawltahten chiemtena leh sillamdang abawlna uhi

12Tualeh Pasian in Sawltahte khutin mite lahah, chiemtena leh sillamdang tampi abawl hi. Tualeh amaute abawn un lungsim munkhat puoin Solomon innliep ah a um uhi. 13Ahinlah alah uah koima atel ngamta sih uhi; hinanleh miten amaute pahtatna lienpi anei uhi. 14Gingtha mi apung semsem ua, numei leh pasal tampi Mangpa kungah ahing kibelap deudeu uhi. 15Tuachi’n miten chinate ahing zawpi ua, gawlzingte ah lupnate leh pheh tungte ah alumsah uhi; Peter ahing pei chienga ahim beeh mi pawlkhat tunga tu a alie theina dingin, abawl uhi. 16Jerusalem kim a khuote akipat in zong mipite ahing peikhawm ua damloute leh dawibuain asuhgentheite ahing pui ua, amaute zousie suhdamin a um uhi.

Sawltahte suongkul apat lamdang tah a asuohtatna uh

17Tuachi’n Siempu lien leh alawmte akisa ua ahing pei ua (alawmte khu Saddukai pawl ahi uhi,) thangsietna in adim uhi; 18Tualeh Sawltahte aman ua, mi vantang khumna suongkul ah akhum uhi. 19Hinanleh zanlai in Mangpa vansawlsieng khat in suongkul kotkhate ahing honga, amauh apuidoh a, akung uah, 20“Pei unlen Biehinn sung ah ding unlen, mipite kungah tam hinna thu zousie va gen un,” achi hi. 21Tam thu azah tahun, zingmawng matahin bieh inn ah ava lut ua, thu ahilta uhi. Hinanleh siempu lien leh a lawmte ahing pei ua, vaihawmte leh Israel tate upate zousie ahan khawm ua, sawltahte va pui dingin suongkul ah mi asawl uhi. 22Hinanleh biehinn veng lamkaite ava pei ua, suongkul ah amaute ava muta sih ua, ahing kinuale kiata uhi. 23“Suongkul bittah a kikhain leh avengmite zong kotkhah bul a ding ka mu ua, hinanleh ka hon uleh asung ah koima ka mu sih uhi,” chiin agen uhi. 24Siempu lienpen leh biehinn veng lamkaipa tualeh siempu lienten tam thu azah un lamdang asa ua, bang thu ahing thangdoh ta bep diei izaw, achi uhi. 25Tuachi’n mi khat ahing pei a, akung uah, “En un, suongkul a na mikhumte un, biehinn ah dingin mi ahil uhi,” chiin ahing gen hi. 26Tuachi’n biehinn veng galkap lamkaipa leh galkap lamkaite ava pei ua, mipite agiin zieh un, thagumsuo louin ahing zawpi uhi, tuahisihleh suonga se ahi kha ding uhi.

27Tualeh amauh ahing pui tung tah un, vaihawm pawlte mai ah adingsah ua, tuachi’n siempu lien in akung uah. 28#Mat. 27.25“Tampa min a thu hil nawn lou dingin thu khautahin ka hing peta uh hilou amah? Thei un, na thu hil un Jerusalem khuo na sudim siengta uhi, tualeh tam mipa asisan phuba koute tunga hing khuhsah sawm na hi uh,” achi uhi.

Vaihawmte mai a sawltahte thugen

29Tuachi’n Peter leh Sawltah dangten adawng ua, “Mihing thu sangin Pasian thu ka man zawh ding uh ahi,” achi uhi. 30Nouten singa na khai ua, na thapa uh Jesu, ipu ipate Pasian in akaithouta hi. 31Ama khu Pasian in leengtapa leh hundampa hi dingin azietlam ah apahtawita a, Israelte kunga kisia a lungheina leh khel ngaidamna pe dingin. 32Koute tam thute theipimite ka hi uhi, Pasian in Ama thu zuite pouma kunga apieh, Hagau siengthou zong Ama theipipa ahi.

Gamlielin athuhilna

33Amauten tam thu azah tah un, alungthah mama ua, sawltahte tha atumta uhi. 34Tuachi’n vaihawm mite lah a Pharisai mi khat amin Gamiliel, dan hil sie, mi zousiein a zatat mama uh, adingdoh a pulam a sawltahte hun tomnoukhat puidoh tadi dingin thu apie hi. 35Tualeh amaute kungah, “Nou Israel mite aw, tam mite tunga na sil bawl sawm uh pilvang un. 36Tu masangin zong Theuda milien ka hi chi ahing um a, mi zali velin anua azui uhi. Ama tha in a um a, ama muonga zuite akithezah siengta ua, bangma ahita sih uhi. 37Tua mipa nuain minkhum lai in Galili gam mi Juda ahing um kia a, akungah mi tampi ahip a hinanleh Ama zong amangthangta a, Ama muonga zuite zong akikhenzahta uhi. 38Tuaziehin tuin noute kungah ka gen ahi, tam mite apat kihemkhie unlen, hichiin umsah kuom unlen, hata un, asil tup uleh asilbawlte uh mihing akipan ahileh, bangma louin ahing mang ding hi. 39Hinanleh Pasian akipan ahileh, na sumang zou sih ding uhi, Tuachilouin pen Pasian dou nahi kha zaw ding uhi.” 40Tualeh athugen khu pha asata ua, tuachi’n sawltahte ahan ua, ajep ua, ajep zou un, Jesu min a thu gen kia nawnlou dingin thu apie ua, ahata uhi. 41Tuachi’n amauh vaihawmte lah a kipat in apawtkhie ua, Jesu min zieh a zumna thuohtah a guot ahi zieh un akipah mama uhi. 42Tualeh nichin in Pasian biehinn leh inn chin ah Jesu khu Khrist ahi chia thuhil leh gen akhawl thei sih uhi.

Currently Selected:

NASEPTE 5: ZOUBSI

Highlight

Copy