MARK 1
1
Juhan-e Hwon Anokya
(Mat 3.1-12; Luk 3.1-18; Jhn 1.19-28)
1Kaxho Müikya ija a Zang Hosa#1.1: Züizüi laiza ma Zang Hosa, le müntüi. Jisu Khrista bama changpu. 2#Mal 3.1.Ija a Isaia ajepae zale toxkya ningle chang:
“Zange thüi: ‘Kue, nang thoma,
nang lom atangle zingnui ang,
Ku kaxho mix tuita apaoüi.
3 #
Isa 40.3. Mixhuak tuita faokha to akhong ngole:
Jowanpa lomtang achwonlax;
chix lyet-lom tangthole zingkox!’”
4“Hünzom ochaxbu tokya mong chatlax ilaxle baptilax, ile changkoxle Zange hünzom ochaxbu thailak faüi”, le khünaknu hama apuk-apuale tamchu baptile koxle Juhan faokha to ngai.#1.4: apuk-apuale…ngai; züizüi laiza ma Juhan a faokhato hwon-anole ngai, le tüile. 5Jehudi chaxwan hia Jerusalem angkya khünaknu huanuma chix kax apa ang Juhan hato ngui. Hwome hwom ochaxbu ngai, üntoxle chixe hwom Jordan shua ma baptile kox.
6 #
2 Wa 1.8. Juhan-e Ut mun nyi awun, üntoxle müikhwon züpak chix khiadax ma apak; ilaxle chixe fao naxti hia züfiakbu sax. 7Chixe khünak hato khuapule akax: “Ku füi süchongkya mix tuita ku füima hüile tüile. Aku laxle zu dale chix chisox sukle fa angkya ngaxchu kuma ojao münasu. 8Kue hünzom ti füi baptile fapu ikoxle chixe hünzom Otsao Chasa ma baptile koxüi.”
Jisu Baptikya hia Thwontsingkya
(Mat 3.13—4.11; Luk 3.21-22; 4.1-13)
9Aluile chingo homtoxle Galili chaxwan ma tüikya Nazareth nok angkya Jisu ngui ilaxle Juhan chak makhange Jordan ma bapti lax. 10Jisu tikha tokya laikya füi tomle zangding ka dapkya tamchu Chasa osu ningle julaxle chix khangkho ma paxkya ngün. 11#Pon 22.2; Mts 2.7; Isa 42.1; Mat 3.17; 12.18; Mrk 9.7; Luk 3.22.Ipongkhae dingchi tokya kaxzing ile akax:
“Nang a kue mongkünkya Ku Sasün changpu!
Nang füi ku mongzom müipu.”
12Ifüima lüile Chasae chix faokha to zunle pao. 13Chix faokha to bao thwontsing ma nyix punyi nui; fao müibuchu wüi tüikya; ikoxlechu kaxtaimixbu hüilaxle chix to hume.
Jisu-e Nyaxkop-mixbu Mixhuak ali Nyak
(Mat 4.12-22; Luk 4.14-15; 5.1-11)
14Juhan kun to shokya füima, Jisu Galili to ngui ilaxle Zang Wangting bama Kaxho Müikya apuk. 15#Mat 3.2.Üntoxle chixe thüi: “Chaxwan zanghan nguile hüiüna ilaxle Zang Wangting a chaknam ma tüile; hünzom ma ochaxbu tokya mong chatlax ilaxle Kaxho müikya to onglax!”
16Jisu Galili Shinthuk-titung kax fole aham ngopong ma, nyak kop mix anyi, Simon hia honao Andriw nyi, tinu khato sha füi nyax kople ngokya ngün. 17Jisu-e hokhi ang thüi: “Ku füito oman, kue hünkhi hama khünak kop angkya anole fafang.” 18Ima wüi hokhie shabu dantox, üntoxle chix füito azui.
19Ikha angkya siatsaile paokya füima chixe chatlechu Zebedi sasün nyi, Jakop hia Juhan hokhi khua ding ma sha saile ngokya ngün. 20Ngünkya thuile chixe hokhi nyak; üntoxle hokhie hopa Zebedi, hingchak koxle thomkya dabu füi tomle khua ma tox, ilaxle Jisu füito azui.
Haxshix Chasa füikya Mixsün tuita
(Luk 4.31-37)
21Jisu üntoxle chix wangshembu Kaparnaum to pao; ilaxle ofüi angkya nazak nyix tangthole Sinagok to ngui üntoxle hwon-ano. 22#Mat 7.28,29.Chix hwon-nwot khoma ija atatkyabu ang khosam, chemthüikoxle chixe wanlom tsingpabu ningle chichangle tsak-zong füi hwon-ano.
23Ijaponge Sinagok ma haxshix chasa füikya khünak tuita ngui; ilaxle ija khünak awao. 24Chixe thüi: “Kwom tata danhüi, nang füi kwom ang chem mwot tüikya, nang Nazareth nok Jisu? Nang ikhato kwom amüt ang hüipia? Nang owa hex kue awanle: Nang a Zang tokya Otsao changpu!”
25Ikoxle Jisu-e chix to sale thüi: “Nang dangün ilaxle chix angkya laiün!”
26Haxshix chasae ija mixsün to zongle si, ilaxle awaole sople chix angkya laile pao. 27Khünaknu huanuma abüt ilaxle tata ma atüi: “Ija chemli hex? ija a li tuita hozün hwon-nwot hia? Chemthüikoxle ija mixsün ma haxshix chasabu ang kaxkox angkya zongchu tüile, ilaxle ibue chix kax ma laxle.”
28Idaile Galili tuitui pangnu khato wüi Jisu achuakle wünkya zangwün akhang le pu.
Jisu-e Khünaknu Kakbu Amüi
(Mat 8.14-17; Luk 4.38-41)
29Jisu hia chix wangshembu, Jakop hia Juhan nyichu wüi womle, Sinagok angkya lai ilaxle Simon hia Andriw hokhi hom to tangthole ngui. 30Iponge Simon honyenu tundün kak kakle lya ma jiple tüikya. Chix nguikya füi tomle hwome she bama chix hama wün. 31Chix she hato hüilaxle she to chak ma sietle she azwot. Ima wüi thuile tundüne she dan, üntoxle she-e hwom to hume.
32Üntoxle hansonge zanghan düt füima, hwome kaklak füikya khünakbu tamchu haxshix chasa füikyabu le chix hato tüle apüi. 33Tingnu angkya khünaknu nok wüi ija homtho ma awangle asox. 34Malili kaklak füikya khünakbu Jisu-e amüi ilaxle haxshix chasabu jwonle apao. Chixe haxshix chasabu ang kaxfa tuitachu akax ang chitom, chemthüikoxle hwome chix owa hex ija awanle ngo.
Jisu-e Galili ma Hwon-Ano
(Luk 4.42-44)
35Ifüinop huazunge, zang mangaiba wüi zolaxle chix ija hom angkya laile pao ilaxle mix zing chiatatkya khato tingnu pan kaile paolaxle ikhato zangjop. 36Simon hia chix füi tüikyabue chix lomle pao, 37ilaxle otue hwome chix atakpuix, hwome thüi: “Pangnue nang lomle ngole.”
38Ikoxlechu Jisu-e lan: “Ikhama ngokya kem a mama tingsho to pao angkya tüile. Kue hwom hamachu hwon-ano angkya changle, chemthüikoxle ija hanpakmale ku nguipu.”
39 #
Mat 4.23; 9.35. Idaile sinagokbu to hwon-ano üntoxle haxshix chasabu jwonle apao le chix Galili pangkha towüi aham.
Jisu-e Kakmix tuita Amüi
(Mat 8.1-4; Luk 5.12-16)
40Ngwon kak füikya mixsün tuita Jisu hato hüilaxle chikux athong le akhux ilaxle chix ma chingcha jule akax: “Nang mong jangtsu thüiba ku amüihüi.”#1.40: ku amüihüi: Ija kak a khünak tuita zanglom ma chitsaokya ang achangkya kakli changkya.
41Jisu-e chingchale bang#1.41: chingcha; züizüi laiza ma mongtsik, le tüile. ilaxle chix chak thui, chix to po, ilaxle chix ang thüi: “Ku mongtsule, nang müiün!” 42Chix kax füi tomle, ija mixsün angkya ngwon kak momle atsaile pao ilaxle chix müi. 43Ifüima kaxshing kople Jisu-e chix füi ibu akaxlaxle chix momle chat ang tom: 44#Liw 14.1-32.“Hulax, nange mix hama chemlechu taxwün ikoxle tangthole nguapa hato paolax ilaxle chixe nang to thwonle naxano; ifüima nang owüiole müiüna le khünaknu hato aho angkya kuxma, Mosa wanlom ma tüikya ningle zomzingle tö laxkox.”
45Ikoxle ija mixsüne paolaxle pangnu khato ija bama apuk ang süt; ingaxchu Jisu tingnu to noke ngünle nop ang chimüitang le chixe onüimix apuk. Ikhoma chix ahuakle dangkya kha onuk to ngo, ilaxle pangnuchi tokya khünaknu chix hato ngui.
Currently Selected:
MARK 1: WANCBSI
Highlight
Copy
Compare
Share
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.
