LUK 21
21
Zomnu Tuitae Koxkya Tö
(Mrk 12.41-44)
1Jisu-e akhople hukya ma hakpabue hwom hingho Zangshwom-Hom ngun suak ma shokya ngün. 2Ilaxle chemchu chitüikya zomnu tuitae ngunhuak anyi shokyachu chixe wüi ngünle lax. 3Ilaxle chixe thüi: “Otsingtsingma kue hünzom ang thüipu, hwom pangnu füi chemchu chitüi chinangkya ija zomnuchae wüi süluile shodaoa. 4Chemthüikoxle mamabu pangnue wüi ma ma ngunsyen huanuma tüikya kha angkya olap showüi, ikoxle she e ma wok hanpakma hidaole wüi tüikya abakle shopu.”
Jisu-e Zangshwom-Hom Pün angkya bama Akax
(Mat 24.1-2; Mrk 13.1-2)
5Üntoxle züizüie Zangshwom-Hom, oja thalix longbu füi osün müile swonle zing üntoxle Zang ang koxkyae otukux osün müile ngünpuix, ija mo wünle ngoponge Jisu-e thüi: 6“Hünzome chem ngünle ngopuix ibu long tuita dingma tuita le athünle chingo homle pangnu atsun angkya hanpak hüiüi.”
Sikngün hia Zothup
(Mat 24.3-14; Mrk 13.3-13)
7Hwome chix ma atüile thüi: “Nwotmix, jangchangba ibu otue changüi? Ile chang angkya hanpak ngangle hüikya chem ma awanüi?”
8Ikoxle Jisu-e thüi: “Hünzom chichang-chizang lom to zunle chipao angkya bama khünlax. ‘Ku chix changpu, üntoxle hanpak chwonüna’ lükya zangwün füi khünaknu hüiüi. Ikoxlechu ibu füito taxazui. 9Üntoxle otue achax-azankya tuwuk zing atatüihex, hünzom taxza; chemthüikoxle owangma ibu ile changle lekop angkya changle, ikoxlechu ibue oshuk hato hüiüna le münchang.”
10Ijama chixe hwom ang thüi: “Chaxwan hia chaxwan azanüi; Wangting hia Wangtinge tata ting ataküi. 11Pangnu khato huanuma bütixe sikya tüiüi, tuinu nuaknu leüi, üntoxle kaknu laknu leüi; üntoxle ding tokya tümangünkya hia za-adünkya jalibu hüiüi. 12Ikoxlechu ibu chemchu machangba, ku mün khoma hexle, hwome kop laxle hünzom to chakmok janlangüi, üntoxle wanghombu hia gowarnorbu hato hünzom kaxfün ang Sinagok to paolaxle kun ma shole thom ang owüiole koxle zothupüi. 13Ija a hünzom zongma Kaxho Müikya apuk-apua ang oshua amüikya ang changüi. 14#Luk 12.11,12.Ijakoxle hünzome makho chemle sünüihex le hanpak manguiba khosamle chingo angkya kax mong ma akhün koplax. 15Chemthüikoxle hünzom zanbu owaechu hünzom füi apan ang chitho angkya hia lan ang chitsuak angkya kax üntoxle je-hwon kue hünzom ang koxüi. 16Manu-mapa hwome ilaxlechu matüi-manao hwome üntoxle kako: homkhae, tamchu üipa-zuikhuibue, hünzom a owüiole koxüi, üntoxle hwome hünzom züizüi a omang jao amütüi. 17Üntoxle ku khoma pangnue wüi hünzom thua anuüi. 18Ikoxlechu hünzom khang angkya khopa tuita amüt ang münfaüi. 19Shingmongle ajonglax, ikoxle hünzome makho alüile azün ang thoüi.
Jerusalem Ama angkya bama Jisu-e Akax
(Mat 24.15-21; Mrk 13.14-19)
20“Otue hünzome Jerusalem zanbue akhop laxle ngünüi hex, iponge she ama angkya chwonünale hünzome awanüi. 21Iponge Jehudi ma ngokyabu haxhua to paolax; üntoxle Jerusalem tingnu ma ngokyabu pao angkya changle, üntoxle tingnu pankai to ngokyabu tingmong to taxdong. 22#Hos 9.7.Chemthüikoxle zale thomkyabu pangnu kotok to ngai angkya hanpakma ibu a zothupkya din changüi. 23Ituke omün ma asukyabu hia tsomsip tankya nao füi asukya onubu maxsax! Chemthüikoxle ija chaxwannu hato sikngün chongle hüiüi üntoxle ibu khünakbu füi Zang mongtsik kya huanu changüi. 24Üntoxle hwom züizüi chang ma maxüi; hwom züizüi kop laxle pangnu chaxwan to paoüi. Üntoxle mixnok hanpak ma-ashuk ma-ashukle Jerusalem to mixnok cha füi naküi.
Khünak Hosa Nguikya
(Mat 24.29-31; Mrk 13.24-27)
25 #
Isa 13.10; Ezk 32.7; Jol 2.31; Mik 6.12,13. “Üntoxle Zanghan hia Lyetnu üntoxle Lyettsibu to mowan tüiüi; chaxwannu pangnu haxtok towüi tichap hia tinu jazinge khünaknu ang pipale khosamkya tüiüi. 26Khünaknu abüt-abanle zakyae zaktutle maxüi; chemthüikoxle ding tokya tsakzongbu sile achikachaxüi. 27#Dan 7.13; Mik 1.7.Iponge Khünak Hosa zangfwom ma tsakzong hia fuazangkya füi ngamle jukya hwome ngünüi. 28Otue ibu chang ang owang wangüihex, ajonglax, üntoxle ngom nwonlax; chemthüikoxle hünzom khosün chwonüna.”
Fupsa Pün makhange Tsingkop Angkya
(Mat 24.32-35; Mrk 13.28-31)
29Ifüima Jisu-e hwom ang ija kaxpan akax: “Fupsa pün hia mamabu pün ajangle anolax. 30Otue hünzome ibu ochak chui ang thüile ngünüi hex, hünzome tsonu nguiüna le awanle. 31Ija lailaile otue hünzome ibu changle ngünüi hex, hünzome Zang Wangting hüitu nguiüna le awanüi.
32“Otsingtsingma kue hünzom ang thüipu, ipongkhae ozün ma tüikya khünak komle maziba wüi ibu changle hüiüi. 33Ding hia hax kaile lemax koxlax ibachu ku kax chichang homle kaile münleüi.
Nyele Ngo angkya Wüi
34“Aluile fongkha lanle hia jutok saxnga lanle üntoxlechu ija chaxwannu tsün khoma aban-asan tata le ngokyae janba jao chitüi le nang mong awangle chingo angkya bama khünlilax, chichangthüiba ija chaxwan-zanghane kam ma mankya ningle nang kopüi. 35Chemthüikoxle ija a chaxwannu thün angkya noknusa hato wüi hüiüi. 36Ibu pangnu zia akaile letsuak angkya üntoxle Khünak Hosa chitong ma ajong angkya hanpakma, hünzome othuithuima hule ngolax ilaxle mik-hingle zangjoplax.”
37 #
Luk 19.47. Nyixfole chixe Zangshwom-Hom ma hwon-anole han ahom üntoxle jafole chix Olip le nyak kya haxhua to zang angai. 38Üntoxle nyixfole Zangshwom-Hom to chix kax apa ang khünaknu swomsasae ngui.
Currently Selected:
LUK 21: WANCBSI
Highlight
Share
Copy
Want to have your highlights saved across all your devices? Sign up or sign in
Wancho Naga Bible - OTSAO BAIBEL
Copyright © 2012 by The Bible Society of India
Used by permission. All rights reserved worldwide.