ZEKARIA 5
5
Küpqiu Phinkhi Michih
1Kheaküshe inü abinkih-a kheah tüsho küpqiu khülang phinkhi ngü. 2Tüsho apinü I ki keo, “ Nünü tümü ngücho?” Inü alo, “ Inü küpqiu khülang phinkhi ngüchoh; ayunglim khahnap 20, tüsho atolim khahnap 10.” 3Jushu apinü I ki tha, “Ha alomi athrünkhi kheak muthrumünean wukhiukkhi lah; tümüde sherünü ahühbanü thripkhüh lakhi yande adükheakshihbah tüsho sherünü akeangyu thiyuchihchimbanü püpü thrip lakhi yande adükheakshihbah. 4Inü yüshihdo, Wuto Atungpuhnü thachoh, tüsho ju ahührü yam ching tüsho I mung müshide akeangyu thiyuchihchimrü yam ching yüzahbah; tüsho ha ju yam ching labah tüsho sanglung le lungbo chido tsühabahbah.”
Muluk ching Aliberü Michih
5Judüki I ki asukachihbuh yunirünü mikhuh ching arü tüsho I ki tha, “Abinkih-a kheahang tüsho ju tü akhiukchonü kheahang.” 6Inü keo, “Ju tümü a?” Apinü alo, “Ha muluk akhiukde lah.” Tüsho apinü tha, “Ha lomi alala ching arü mülimkhi mütsan ah.” 7Jushu yinchi thrandobe lahkih, tüsho aliberü khülang muluk ching bina lakheah! 8Tüsho apinü tha, “Ha mihbukmuyukkhi mütsan ah.” Jumonü apinü alibe ju muluk ching nimyuklo, tüsho athrandobenü hüpdo. 9Judüki inü abinkih-a kheah tüsho aliberü mahne mikhuh ching arükhi ngü. Ane wulakhi ghidükeangbo lakheah; ane ghidükeangbo ju kewuhnu ghidükeang nangde alakheah, tüsho anenü muluk ju alomi le thüning dükeak shuhkih. 10Judüki inü I ki asukachihbuh yunirü ki keo, “Arünü muluk ju küching lude yücho?” 11Apinü I ki alo, “Ha thsungkheak arüngyam thsüpü Babilon lim yüchoh; tüsho küyimki ha thsükhibanü, anenü muluk ju kingaünpü dangpung kheak zobah.”
Currently Selected:
ZEKARIA 5: YIMCBSI
Highlight
Share
Copy
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
