ZEKARIA 1

Mulong Rholopü Jikhi

1Darius kam mahnepü, khinu tizheah ching Iddo tsührü Berekia tsührü wukihbuh Zekaria kilim Atungpuh yu arü: 2Atungpuh nüsa jipürü kheak khide bukakhiukde alakheah. 3Jumonü arü ki thaang, Wuto Atungpuhnü ha thachoh: I kilim rholoang, Wuto Atungpuhnü thachoh, tüsho inü nü kilim rholobah, Wuto Atungpuhnü thachoh. 4Nüsa jipürü nangde düla, sherü ki akhuhlim wukihrübonü zhiyuk, “ Wuto Atungpuhnü ha thachoh, Nüsa amütsü limrobo tüsho nüsa amütsü rhimobo chingnü rholoang.” Tüshe arünü muso yungsho I ki mani, Atungpuhnü thachoh. 5Nüsa jipürübo, arü küching la? Tüsho wukihrübo, arü lünnü la shi? 6Tüshe I yubo tüsho I yakzanbo, küpü inü I yamlarübo tüsho wukihrübo ki thiyukhüm jihkhea, jurünü nüsa jipürü müyanphuhkhea de? Jumonü arünü mulong müthri tüsho tha, “ Wuto Atungpuhnü apinü arhimopü lümkhi thsükhi nangde isa limrobo tüsho rhimobo yande isa ki rhimodo.”

Khorabo Michih

7Khinu thürükheak khülang nimung mukukheak phüyi nipü, Shebat khinu, Darius kam mahnepü ching, Iddo tsührü Berekia tsührü wukihbuh Zekaria kilim Atungpuh yu arü; tüsho Zekarianü tha, 8Azhing ching inü mihtsürü khülang khora amürüm kheak binde ngüdo! Api ju jindükhün ching martel sangbo lung zhipde alakheah; tüsho api dunglim ju khorabo amürüm, mürümmuchu tüsho amüye zhipde alakheah. 9Judüki inü tha, “ I tungpuh, harü ha tümü a?” I ki asukde alabuh yunirünü I ki tha, “Arü tümüanü inü nü ki huhbah.” 10Jumonü martel sangbo lung zhipkhi mihtsürünü alo, “Arübo ju Atungpuhnü lomi rhuakheahpü thiyikhi lah.” 11Judüki arünü martel sangbo lung zhipkhi Atungpuh yunirü ki asuk, “ Isanü alomi rhuakheahdo, tüsho kheahang, lomi athrünkhi akhimahede lah.” 12Judüki Atungpuh yunirünü tha, “ O Wuto Atungpuh , nünü kam nerü bukakhiukkhi Jirusalem tüsho Juda kiutobo kheaknü külokhüh nünü mihmüthsüm tholoba?” 13Judüki Atungpuhnü I ki asukachihbuh yunirü ki muzhode tüsho ashukheam yubonü alo. 14Jumonü I ki asukachihbuh yunirünü I ki tha, Ha yusheak zhiyukang: Wuto Atungpuhnü ha thachoh: inü Jirusalem tüsho Zion thsungkheak khide mükthsülah. 15Tüsho keamramde alakhi trükshihbo kheak inü khitode bukakhiukchoh; tümüde I bukakhiukkhi anikhüh lachoki arünü tukthsü amütsübe kamshih. 16Jumonü Atungpuhnü ha thachoh, Inü muzhode Jirusalem kilim rholodo, I yam ju ching thsübah, Wuto Atungpuhnü thachoh, tüsho kiuto thsülobah. 17Zhiloang: Wuto Atungpuhnü ha thachoh: I kiutobo kheaküshe lakhitnü azhikhiukbah; Atungpuhnü kheaküshe Zion shukheambah tüsho Jirusalem mokhitlobah.

Juhbo Michih

18Judüki inü abinkih-a kheah tüsho juh phüyi ngü. 19Inü I asukachihbuh yunirü ki keokhi, “Harü ha tümü a?” Tüsho apinü I ki alo, “Harü ha Juda, Israel tüsho Jirusalem müzütshihkhi juhbo ah.” 20Judüki Atungpuhnü I ki rhimorü phüyi yümlung shuhbah huh. 21Tüsho inü keokhi, “Arü tümü thsüpü arücho?” Apinü alo, “Harü ha Juda lomi tüsho lomi ayingthrümnü züthünakde müzütshihkhi mihtsürü lahyuka bahpü tüsho müzünpü arüdo.”

Currently Selected:

ZEKARIA 1: YIMCBSI

Highlight

Copy