WÜHKHE 36
36
Arhangrü Yamrüplurüp
1Kheakü Josep tsührü yamkhünbo chingnü, Manase kheak yo, Makir tsührü Gilead guk buhtsüh azothsürübonü Mosa tüsho limberü, Israel mihtsürü gukbo ching azothsürübo ki arübah tha, 2Israel mihtsürü kilim azan thsüde alo yamrüplurüp jihshihpü Atungpuhnü isa tungpuh Mosa ki thiyukhüm jih, tüsho isa khiungmungrü Zelophehadnü atsührü aliberübo kilim yamrüplurüp jihshihpü Atungpuhnü isa tungpuh kilim thiyukhüm jih. 3Kheakü arübo Israel mihtsürü trük püpürü tsührü kheak rhanga lasho, arü yamrüplurüp ju isa bebuhrü yamrüplurüp chingnü ayihkhitbah, tüsho ju anihbe rhangkhi buhtsüh yamrüplurüp ching hanyukbah; junangde isa ki mülüjihkhi yamrüplurüp chingnü chamkhia lubah atsobah. 4Tüsho küyimki Israel mihtsürü thsungkheaknü Jubilee arübanü, arü yamrüplurüp ju arü küpü ching rhangkheanü ju trük ching hanyukbah; junangde arü yamrüplurüp ju isa bebuhrü trük yamrüplurüp chingnü hande ayübah.
5Tüsho Atungpuhnü athakhi nangde Mosanü Israel mihtsürübo ki thiyukhüm jih, “ Josep tsührübo trüknü tümü thachonü ju dükdü ah. 6Ha Zelophehad tsührübebo dünkheak Atungpuhnü ajihkhi yukhüm. Arünü amulongkhi ching rhangshang, tüshe arünü arü bebuhrü trük ching lang arhangbeah. 7Jumonü Israelrünü yamrüplurüp trük le trük ching mümüthriachih, tümüde Israel mihtsürü abannü nihbuh bebuhrü trük yamrüplurüp zobah. 8Tüsho Israelrü mihtsürü trük ching tsührü aliberü sherünü yamrüplurüp lulanü mihbüm abannü nihbe bebuhrü trükrü guk niuberü thsübeah, junangde Israel mihtsürü abannü nihbuh bebuhrü yamrüplurüp labah. 9Ha ruk yamrüplurüp ju trük khülang chingnü püpü lim mümüthri, tüshe Israelrü trük abannü nihbuh yamrüplurüp zobah.”
10 Atungpuhnü Mosa ki thiyukhüm jihkhi nangde, Zelophehad tsührübebonü rhimo; 11tümüde Zelophehad tsührübebo Mahla, Tirza, Hogla, Milka tüsho Noa arünü nihbe bebuhrü keoniorü tsührübo ki rhanga lakheah. 12Arübo Josep tsührü Manase trük yamkhün ching rhangkheah, tüsho arü yamrüplurüp ju nihbe bebuhrü trük ching lang la. 13Harü ha Jirikho hobah Jordan ki, Moab dükhün ching Atungpuhnü Mosa hode Israel mihtsürü kilim jihkhi yukhüm tüsho yakzanbo ah.
Currently Selected:
WÜHKHE 36: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
