MIKA 7
7
Israel Lalim Mütsükhi
1Ayokhe! Tümüde I a muzhu sangaso rho dunglim, kurungaso rho dunglim, atsühpü adüchi müngürü ruk kamdo; I khümkhi thsungkheaknü akhuh münkhi khubaso müla. 2Athülünkhi alomi chingnü kheamabahdo tüsho alungki larü sheshe müla; arü alalanü thiyih bukpü aleangde binchoh, tüsho arünü keang lubah jimachihchoh. 3Arü khahbo amütsü thsüpü yuklah; atorü tüsho mahkhaprünü buknim kheangchoh, tüsho wularübonü arü künkhi thachoh; hanangde arünü lümkhi amütsü thsüchoh. 4Arü bolung atsüdakbe ju khingphu nangde lah, arü bolung khide alungki ju ayangrung lah. Arü aheangrü nimungbo arü thsümüchipü arüdo; kheakü arü yingyingpü khah ki lah. 5Müyamrü kheak akin düla, amuzhokhi kheak mulongram düla; niube-niubuh ki she nü mün kümkangang; 6tümüde tsührünü buhrü bahyukde rhimochoh, tsührübenü berü azhihde wusuchoh, tsühmeakbenü anihbe ani azhihchoh; nü riribo ju nihbuh betsührü ah. 7Tüshe I a, inü Atungpuh kheahbah, inü I khümkhitbuh Thrünpuh aleangbah; I Thrünpuhnü I ki anijihbah.
Atungpuhnü Akhümkhit Handarüchoh
8I kurungkheak dasühachih, O I riri; küyimki I angakbanü, I asürübah, küyimki I amiting ching binbanü, Atungpuh ju I ki ayin labah. 9Tümütüsho inü api azhihde neak yihbeak, api I kilim tsangkhi tüsho I mahkhapkhi khiungde inü Atungpuh bukakhiukkhi arümpü lah. Apinü I ayin ching bekhitbah; inü api thiyuro-lungki ngübah. 10Judüki I ririnü angübah, tüsho achihnü anihbe lüpdobah, shepünü I ki tha, “Atungpuh nü Thrünpuh küching la?” I mükbonü anihbe lungkhi ngübah; kheakü anihbe ju kiudunglimro akhimniuhniuh nangde athrümyukbah.
11Nü chipibo thsüpü nimung arüchoh! Ju nimungnü aredung shude akhinbah. 12Ju nimung arünü Asiria chingnü Ijip, tüsho Ijip chingnü Ayung, keto chingnü keto tüsho müzüng chingnü müzüng nü kilim arübah. 13Tüshe ju ching larü rhimo sangasobo dünkheaknü alomi zhikrangkhündo alabah.
Tamkhüntamnü tüsho Mungshi
14Nü tsonü nü mihtsürü, nü yo namfimihnu boto neakang, küpü murung khülang ching alo atsü phulung la; arübo awün nimungbo nangde Bashan tüsho Gilead ching yimtsühshang.
15Nünü isa Ijip chingnü bekhitkhi nimungbo ching nangde, isa ki amüyinsahbebo huhang. 16Trükshihbonü angübah tüsho arü sühmüh alala dünkheak achihbah; arünü arü khahbo arü mün hümbah; arü nükhün peangbah; 17arünü alo kheak chinde abükhi phuruto nangde asungthulung müleakbah; arübonü arü chipibo chingnü ajande akhiukbah; arünü Atungpuh isa Thrünpuh kilim trede rholobah, tüsho arünü nü dünkheak trebah.
18Nü nangde she Thrünpuh la, shepünü api yamrüplurüp aningkhi neak tüsho alakmihkhi bahjihcho? Nünü lünnü bukakhiukde müla tüshe mihmüthsüm huhpü mulungchoh. 19Nünü isa kheak mihmuzholobah; nünü isa mülimkhibo müphü khüp thrümbah. Nünü isa neakbo alala keto asük ching bahjihbah. 20Nünü awün nimungbo ching isa jipürü ki thiyuchihchimkhi nangde Jakob ki thiyuro tüsho Abraham ki mihmüthsüm huhbah.
Currently Selected:
MIKA 7: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
