MIKA 2
2
Zhochihrü Junorü Kuhi
1Sherünü arü yapkiu kheaknü mihbukmuyuk tüsho amütsü rhimo lümkhi thsüchonü ayokhe! Küyimki yinkhibanü, arünü ju asahchoh, tümütüsho ju arü wu ching lah. 2Arünü thulubo lunechoh, tüsho jurübo jangkhichoh; thüyambo she lude tsochoh; arünü thüyam putungrü tüsho thüyam, mihtsürü tüsho arü yamrüplurüp junochoh.
3Jumonü Atungpuhnü ha thachoh: kheakü nüsanü nüsa hungbo manguhkhukpü ha yamkhün azhihde inü amütsü lümkhi asahchoh; tüsho nüsanü korakde mütsah, tümüde ha amütsü kim khülang labah. 4Ju nimung arünü nüsa azhihde korak-khün thsübah, tüsho khühde tüzhokhinü mulong rozhakbah, tüsho athabah,
“ Isa shahde thsümünimdo;
Atungpuhnü I mihtsürü lakhit hande tsodo;
künangde apinü ju I kheaknü luakhinkhea!
Isa ramrü kilim apinü isa lubo chama jihdo.”
5Jumonü Atungpuh borü bolung ching alo chamnaka lupü nüsa she mülade alabah.
6“Düthsangyuthsangra” arünü hade thsangyuthsangrachoh– “ Khürünü hadürü thsangyuthsangra müthsübeah; mihmüthsüm mülakhinü isa müyanphuh.” 7Ha athabea de, O Jakob yamkhün? Atungpuh arümkheamkhi kheama la de? Harübo api rhimobo a de? Lungkide atsahrü ki I yubonü atsü mürhimo de?
8Tüshe nüsanü thiriri nangde I mihtsürü azhihde wusudo; nüsanü thirithsüpü tümü mülümde atsahrü kheaknü shulünkhim züngkhia ludo. 9I mihtsürü liberübo arü yambo atsü chingnü yankhitdo; arü tsührü athunu chingnü nüsanü lünnü I müretah lude tsodo. 10Asürang tüsho yüang; tümüde ha sühakhim dangpung yung, tümütüsho mümüsühkhinü ha khitode thsümünima lah.
11Khürünü akeangyu thade arüsho, “ Inü nüsa ki suhdahkhi yukhu tüsho ayungbe dünkheak müchitbah,” api ju ha mihtsürü thsungkheak wukihrü lakhi labah!
12Inü tsükjide nüsa alala bemukhungbah, O Jakob, inü Israel arhang larü bemukhungbah; inü arübo rimlopung ching namfimihnu boto nangde, ayam ching bemukhungbah; ju mihtsürünü mide akambah.
13Shepünü lakashungchonü arü müngüh yübah; arünü lakashungbah tüsho chipiripit hode junü awukhiukbah. Arü kiulongthsüpuh arü müngüh yübah, Atungpuhnü arü limbebah.
Currently Selected:
MIKA 2: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
