LEVI 8
8
Aron tüsho Atsührübo Müsühkhitkhi
(Abe 29.1-37)
1 Atungpuhnü Mosa ki tha, 2Aron tüsho api lung atsührübo beang tüsho ju lung amükeamrü khimmih, mujude-müsühkhitbe müdangke, neak kingaün thsungkheak moshipung nunu khülang, mihnupung mahne, tüsho phaüm muyukkhi yikhap muluk khülang, 3tüsho amukhungrü athrünkhi ashorupung khimyam ripit ki bemukhungang.
4 Atungpuhnü thiyukhüm jihkhi nangde Mosanü rhimo, tüsho küyimki amukhungrü ju ashorupung khimyam ripit ki bemukhungkheanü, 5apinü arü ki tha, “ Kheakü inü tümü rhimopü lanü ju Atungpuhnü thiyukhüm jihkhi ah.”
6Mosanü Aron tüsho atsührübo khuhto ching bedarü tüsho arüngako kemüyihjih. 7Apinü Aron kheak pangkhümpü tüsho shulünkhim khümyukjih tüsho achim yande pangrümbe rümjih, tüsho amükeamkhim phuyujihbah düshihde akeakkhi pangrümbenü achim yande rümkihjih. 8Apinü api kheak treangkhümbe yihkihjih tüsho ju kheak Urim tüsho Thummim yihkih. 9Atungpuhnü Mosa ki thiyukhüm jihkhi nangde apinü anihbuh ku kheak kuhingbe khim hingkihjih, tüsho kuhingbe mikhuhlim amüsüh kuthran amütsan thsüde suna beak yihkihjih.
10Jushu Mosanü amujube müdangke lubahle arüngyam tüsho ju ching lakhi alala kheak mujukih, tüsho junangde apinü jurü Atungpuh kilim müsühkhit. 11Atungpuh kilim müsühkhitpü thsungkheaknü apinü müdangke khürü lubah kingaünpung kheak thüne ki rhakkih, tüsho kingaünpung, pungphuru, müsühmüraphuru tüsho kingaün sadam jing kheak mujukih. 12Apinü Aron ku kheak müdangke dungkihjihde api mujude-müsühkhit. 13Jushu, Atungpuhnü Mosa ki thiyukhüm jihkhi nangde, apinü Aron tüsho atsührübo mikhuhlim bedarübah pangkhümpü khümjih, pangrümbe chim ching rümjih tüsho arü ku kheak kuthran rümkihjih.
14Neak kingaünpü Mosanü moshipung handarü, tüsho Aron le atsührübonü arü khah aku kheak nimkih. 15Mosanü ju laksahbahle athiyih khürü lu tüsho müsühkhitde ayingkhing kheaknü kingaünpung juhbo kheak yihkih. Tüsho apinü aningkhi thiyih ju kingaünpung jing kheak bukkih. Hanangde apinü dünthsükhide müsühkhit. 16Tüsho Mosanü bukning müdangbo, amüsan tüsho amüdang bebah amügüe mahne lubah kingaünpung kheaknü tak. 17Tüshe Atungpuhnü Mosa ki thiyukhüm jihkhi nangde, aküp, ayin, tüsho arhubo khimyam aleanglim hande wukhiukbah takabah.
18Jushu, Mosanü taka kingaünpü mihnupung handarü, tüsho Aron le atsührübonü arü khah aku kheak nimkih. 19Mosanü ju laksah tüsho athiyih kingaünpung khuh phüyi kheak hiukih. 20Tüsho küyimki mihnupung ju akhapthünakkheanü, Mosanü aku, akhapthünakkhibo tüsho amüdangbo lua mo ching tak. 21Tüsho bukningbo le ajingbo kenü müsühabahshu, Mosanü mihnupung apang abümnü kingaünpung kheak taka kingaünde arhümthüneakhinü Atungpuh asühshih; ju Atungpuhnü Mosa ki thiyukhüm jihkhi yande rhimo. 22Jushu, Mosanü amükeamrübo müsühkhitpü mihnupung mahnepü handarü, tüsho Aron le atsührübonü arü khah aku kheak nimkih. 23Mosanü ju laksahbahle athiyih khürü lubah Aron nuku müzhean tsülim, akhahkutopü tsülim, tüsho ajingkutopü tsülim yihkihjih. 24Jushu apinü Aron tsührübo mikhuhlim bedarü tüsho athiyih khürü lubah arü nuku müzhean tsülim, arü khahkutopü tsülim, tüsho arü jingkutopü tsülim yihkihjih. Tüsho Mosanü aningkhi thiyihbo kingaünpung khuh phüyi kheak dungabah. 25Tüsho amüdang, amokungro müdang, bukning muhiukhi müdang alala, amüsan, amüdang bede amügüe mahne, tüsho tsülim pho apinü lu. 26Jushu Atungpuh kilim müsühkhitkhi muluk ching yo phaüm muyukkhi yikhap khülang, müdangke bede akhapkhi yikhap khülang, yikhapkheam khülang apinü lu, tüsho jurübo amüdang tüsho tsülim pho mi kheak yihkih. 27Harü tsühyungpü alala apinü Aron le atsührübo khah ching yukjih, tüsho arünü müleamde Atungpuh kingaün. 28Tüsho Mosanü jurü arü khah chingnü lubahle müsühkhitkhi kingaün thsüde taka kingaünkhi mi kheak yihkih-a tak; ha kingaünkhi rhümnü Atungpuh asühshih. 29Mosanü akhüh lubahle Atungpuh kilim müleamde jih; ju Atungpuhnü Mosa ki thiyukhüm jihkhi nangde müsühkhitpü jihkhi mihnupung lung Mosa shihcham lakheah.
30Mosanü amujube müdangke khürü tüsho kingaünpung kheak lakhi thiyih khürü lubah Aron le atsührübo tüsho arü khimmihbo kheak rhakkihjih. Hanangde apinü arübo tüsho khimmihbo Atungpuh kilim müsühkhit.
31Mosanü Aron tüsho atsührübo ki tha, “Shih lude yübah Atungpuh shorupung khimyam ripit kinü khiungang, tüsho Atungpuhnü thiyukhüm jihkhi nangde müsühkhitkhi kingaün muluk ching lakhi yikhap bebah ju chingnü tsühang. 32Shih thsüthsü yikhap thsüthsü aningkhi a takabahang. 33Nüsa müsühkhitkhi arüngako rhimobo mübanyichokia, ashorupung khimyam ripit kinü nüsa mutsode nimung thüne mungang. 34Khihni isanü tümü rhimodünü, nüsa neak dünthsükhipü thsungkheaknü Atungpuhnü isa ki thiyukhüm jih-a rhimoshihkheah. 35Nüsa müshepü thsüde Atungpuhnü thiyukhüm jihkhibo rhimode ashorupung khimyam ripit ki nüsanü animung tüsho are nimung thüne mungang: tümüde Atungpuhnü ha I ki thiyukhüm jih.” 36Jumonü Mosa hode Atungpuhnü thiyukhüm jihkhi nangde Aron tüsho atsührübonü athrünkhi rhimo.
Currently Selected:
LEVI 8: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
