TÜZHOKHI 3
3
Thsümüchi, Mulong Rholokhi, tüsho Mulonglam
1Thrünpuh bukakhiukkhi tsonü thsünükhi ngübuh I ah;
2apinü I yanyuka bahdo tüsho ayin mülakhi amiting ching I tsahshih;
3I azhihde apinü nimung amuyung alochode akhah rholodo.
4Apinü I shihtsü tüsho I küp aneankhishih tüsho I robo yihshak;
5apinü I thsümütsü tüsho thsünü rihyam ching rihdo.
6Apinü I adüsonü ashekhi nangde amiting ching binshih.
7Apinü I khiungdoabah,
junangde inü mutsokhitkhuk;
apinü yinchiliu amülangnü I rhük;
8Inü arung thsungkheak jiji she tüsho zhizhi she,
apinü I tamkhüntamnü musojih;
9akheankhi lungbonü apinü I limro yihdojih,
apinü I limro khürangshih.
10Api I aleangde ayapkhi kuto khülang nangde,
kekhüzü khülang nangde jika lah;
11apinü I limro chingnü yanyukabah tüsho adütre kamde sükthünak;
apinü I zhikrangkhündo kamshih;
12apinü api sanglüh hünkih tüsho I api hühzo münchi-thsüpung kamshih.
13Apinü hühzopung ching yo hühzo I pang ching kipyuk;
14I a I mihtsürü alala münedung kamdo,
nimungroro arü keangrümüne khün lah.
15Apinü I akhühnü mishih tüsho akhühkenü müshangshih.
16Apinü I hü lungjinim kheaknü thüleakshih tüsho awah ching I phamshih;
17I mungtsü müladebahdo,
latsühlayung inü mihabahdo;
18jumonü inü tha, “ I müretahkhi tüsho Atungpuh kilimnü I mulonglamkhi alala tsodo.”
19I thsünükhi, tüsho rümde atsahkhi akhüh müzüm inü lümkhitchoh!
20I menü ju mutukzhakde lümchoh tüsho I pang ching keamyukchoh.
21Tüshe ha I lüm ching inü lümkhitchoh,
jumonü I mulonglam lah.
22 Atungpuh amuzho adüküng küyimkishe mükheam,
api mihmüthsüm küyimkishe mükheam;
23arübo yapsu aban aso lah;
nü thülünkhi ju ato ah.
24“Atungpuh ju I shihcham,” I menü thachoh,
“Jumonü inü api kheak mulonglambah.”
25 Atungpuhnü api aleangrü, api yimrü kheak tsülah.
26Khürünü Atungpuh akhümkhit thsungkheak zhikde aleangkhi ju tsülah.
27Khürünü athunuchoki arümkheamkhi ju tsülah,
28api alangzü zhikde binshang
tümütüsho Atungpuhnü api kheak ju yihkihjih-a lah,
29api mün asungthulung ching lashang,
khükijua ju ching mulonglam labah.
30Amüchip damrü kilim amüchip leangshang, tüsho mükhemürangnü mishihang.
31Tümüde Atungpuhnü lünnü mübahyuk.
32Apinü mulong rozhak jihjih she anihbuh amuzho düküngkhi yande apinü mihmuzho labah;
33tümüde apinü künsahde mihtsürü tsührü müthsünüshih yungsho mulong murozhakshih.
34Küyimki lomi ching aramrü alala api jing khüp jubanü,
35küyimki mihtsürü alimbo Khide Achang miki bephülapbanü,
36küyimki khürü thiyuro lakhi bephülapbanü,
Atungpuhnü ju müngü de?
37 Atungpuhnü mümulongsho shepünü thiyukhüm jihpü tüsho ju rhimokhukpü?
38Ha Khide Achang mün chingnü atsü tüsho amütsü arüchoh yung de?
39Küde thsah arhang larü mihtsürünü arü neakbo dünkheak thsümüchikhi arünü atsanglopü?
40Isanü isa limrobo ajamakheahanü tüsho jurü rükakiakheahanü,
tüsho Atungpuh kilim rholoanü.
41Isanü isa mulongbo, isa khahbo Thrünpuh kilim yinmi ching shuhkihanü.
42Isanü lakmünimdo tüsho azhihdo tüsho nünü neak mübahjih.
43Nü bukakhiukkhinü nü muhiudo tüsho isa müsham,
mihmuzho mülade laksah;
44nünü amonü nü hingdo,
junangde tamkhüntamnükhi muhokhuk.
45Nünü isabo mihtsürü bolung amüneankhi tüsho sünit kamshih.
46Isa riribo alalanü isa azhihde arü münbo khimshuh;
47thsünü tüsho qimürip,
abahyukkhi tüsho athsümünim isa kheak arü.
48I mihtsürü thsümünimkhi dünkheaknü I mükbo ching chike ayungbo bukchoh.
49I mükbo chingnü mükheamde sühakhim mülade abukbah,
50 Atungpuhnü yinmi chingnü abinkhia mükheahyi khiungde.
51I yo kiuto ching athunu liberü alala kuhi thsungkheak I müknü I mulong rozhakshihchoh.
52Akeangnü I riribonü wuhnu khülang nangde I phuhdo;
53arünü I arhangnü alokhün ching nimyuk tüsho lungnü rhungdo;
54I ku kheak ke dütsüt;
inü tha, “ I laksahdo.”
55Alokhün asük chingnü inü nü mung jichoh, O Atungpuh ;
56Inü mushukhi nünü sodo,
“Arung thsungkheak inü azhikhi nü nükhün düyihdo!”
57Inü nü jichoki nü phünide arükheah;
nünü tha, “Dütre!”
58Nünü I dünkheak mushudo, O Atungpuh ,
nünü I rhangdung rhokhitdo.
59I ki amülim rhimokhi nünü ngüdo, O Atungpuh ;
I dünkheak mahkhapang.
60Arünü I azhihde mülapyukde royimkhi alala nünü ngüdo.
61O Atungpuh , arünü I azhihde mükhemürangkhi alala nünü sodo.
62I riribo phiphirarakhi tüsho dapdaprarakhi nimung amuyung I azhihde lah.
63Arübo bina lalashe yungsho asürürü she–
kheahang I a arünü khün thsüde luhmünekhi lah.
64O Atungpuh , arü khahnü arhimokhi yande arü rhimobo dünkheak jihloang!
65Arü ki mulong thsünüpü jihang;
nü muthrumünean arü kheak lashang!
66Nü bukakhiukkhi chingnü arü müshamang tüsho Atungpuh yinmibo khüpnü arü dükheakshang.
Currently Selected:
TÜZHOKHI 3: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
