JUD 1

1 # Mt 13.55; Mk 6.3 Jisu Khrista tankihrü tüsho Jakob niurü Jud kilimnü,

Jia larü, Thrünpuh tüsho Abuh kheak amuzho tüsho Jisu Khrista mükühbah alarü kilim:

2Mihmüthsüm, mungtsü, tüsho amuzho nüsa kilim alü kamshang.

Arükchih Thsangyurübo

3Amuzho müyamrübo, isa rukhüh akhümkhit dünkheak nüsa kilim thrütpü khide mulungkhinü, khülangkinü lang amüsührü kilim jihkhi akin dünkheak shochihpü tuthsukde nüsa kilim thrütpü yihnüpü lakheah. 4Tümüde adüso ha abahyukkhi ching mütsana lakhi, amükinrü, Thrünpuh amüthsüm makhamaleak kamshihrü tüsho Atungpuh Thrünpuh tüsho Atungpuh Jisu Khrista reanglorü mihtsürü khürü mümükheahshihde azah-a lah.

5Nüsanü khülangki, shepünü Ijip lomi chingnü mihtsürü khümkhitbah, ju dunglim amükinrübo dükheakshihkheanü tsüde mükheah-a lalashe, inü nüsa ki lümkhitloshihpü mulonglah. 6Tüsho yunirübonü arü lapung dükde mülade amüthrikhi mahkhap ato nimung khiungde akheam müla wuhrünliunü rhüka amiting ching zo; 7junangde, Sodom le Gomorra tüsho ju mühi kiutobonü müzammüram tüsho amülim rhimo. Arünü akheam müla mo ching thsümüchinü amütsan thsü.

8Tütüshe hadürü yakli ching harü mihtsürübonü arü milimnü shihphü münean, thiyukhüm-sühmüh bahyuk, tüsho müretahkhibo azhih. 9#Ami 12.7Tüshe yunirü atobuh Maikelnü she Mosa pang dünkheak arimri ki rukachihchoki mükhemükimde abahyukpü mümürang, tüshe api ki tha, “Atungpuhnü nü thürühshang!” 10Tütüshe harü mihtsürübonü arünü manikhitkhi azhihde asukchoh; tüsho shiwüh lüm nangde arünü amükheahkhinü arü thsümünimchoh. 11Arü are! Tümüde arünü Kain limro ching tsahchoh, tüsho Balaamnü alakmihkhi alü thsüpü lim arü küdahnü bahyukchoh, tüsho Kora azhihkhi ching dükheakchoh. 12Harü ha nüsanü amuzhokhi thüniobo ching areak kihkhi, mütrede arü nihbuh lang ahiuhakhiprübo lah; arübo tsüng mübede apungnü yünde ayükhi amobo ah; aso masokhi mumükin sangdungbo, mahne ki shekhi, aying rukkhitkhi ah; 13keto müküpde abükkhi, arü nihbuh achihbe arhukrhukke thurukihchoh; arü khilim lün thsungkheak amiting akheah akhua zokhi tsahde alakhi chiningbo ah.

14Adam kheaknü lün thünepü Enoknü harü dünkheak müchitde tha, “Kheahang, Atungpuh api amüsüh yunirü chithürübo bebah arü, 15alala kheak mahkhappü, mükinde arhimokhibo dünkheak arü alala tüsho amükinrü aneakrübonü api azhihde amütsü yubo thakhi bahyukpü!” 16Harübo ju jijineahneahrü tüsho mührü müdamrü, nihbuh amütsü künkhi yanchoh, thiyu-tode kükheangchoh, alü thsüpü mihtsürü thsungyukchoh.

Atünadoyu tüsho Thsangdankhibo

17Tüshe amuzho müyamrübo, isa Atungpuh Jisu Khrista amüsüh-thsangyurübonü müchitkhibo nüsanü lümkhitang; 18#2 Pet 3.3arünü nüsa ki tha, “Akheam kim ching arü nihbuh mükinkhi shihkünkhi yande luhmünerübo labah.” 19Achamnakrü, alomi mihtsürü, Me mülakhi ju harü ah. 20Tüshe amuzho müyamrübo, nüsanü khide amüsüh nüsa akin kheak rünkihang; Amüsüh Me ching tamkhüntamnüang; 21nüsabo Thrünpuh amuzho ching lang; lün rhangdung lim isa Atungpuh Jisu Khrista mihmüthsüm thsungkheak aleangang. 22Dukiuhlokhi khürü ki mihmüthsüm huhang; 23mo chingnü züngkhitde khürü khümkhitang; tüsho khürü ki trezung thsüde mihmüthsüm huhang, tüshe arü yüliyürakhi neakbonü amüneankhi khimmihbo thraneanang.

Mungshi Tamkhüntamnü

24Kheakü nüsa mangakde akümpü tüsho areak mükihde api müretah miki asühachihde nüsa yüshihbuh kilim, 25Thrünpuh, isa Atungpuh Jisu Khrista hode isa khümkhitbuh kilim müretah, wüntre-müretah, yakzan shuhkhi, tüsho wu, kim alala müngüh, kheakü tüsho lünnü laang. Amen.

Currently Selected:

JUD 1: YIMCBSI

Highlight

Copy