JIHUSUA 6
6
Jirikho Lungkhi
1Kheakü Israelrü tremonü Jirikho kiuto ju tsüde rih. Shenü she ayüzahpü yungsho awukhiukpü mukukdebah. 2Atungpuhnü Jihusua ki tha, “ Kheahang kiulongthsüpuh tüsho athrungrü bonungrübo bebah, Jirikho nü khah ching jihdo. 3Nü tüsho nü yo thirithsürübonü nimung ching khülang kiki nimung thuruk kiuto mükamde tsahang. 4Amükeamrü thünenü namfimihnupung juhnü athsükhi hulipungpung shuhbah tangzüng sangdan müngüh yüshang. Nimung athüne nipü amükeamrübonü hulipungpung mütde, nüsanü kiuto thüne ki mükamde tsahang. 5Jushu arünü achangnü khülang ki mütbah, ju soakede, mihtsürü alalanü achangnü ahoang, tüsho kiuto ju alungbah. Ju yande bonungrü lüpdükhi kiuto ching buh mikhuhnü yüzahbah.”
6Jihusuanü amükeamrübo jibahle tha, “Atungpuh tangzüng sangdan hanang, tüsho nüsa thüne hulipungpung shuhbah ju müngüh yüang.” 7Apinü amihtsürübo ki tha, “ Tsahmusuang tüsho kiuto mükamde tsahang, thsühnuk shuhrü mihtsürübo Atungpuh sangdan müngüh yüshang.”
8Jihusuanü mihtsürübo ki thiyukhüm jihkhi yande, amükeamrü thünenü hulipungpung khungde arü dunglim Atungpuh tangzüng sangdan yanshihde Atungpuh müngüh yü. 9Thsühnuk shuhrübo ju hulipungpung mütrü müngüh yü, tüsho aheangrü ashurü ju mutukzhakde hulipungpung mütde ayüchoki tangzüng sangdan yande yü. 10Tüshe Jihusuanü mihtsürübo ki thiyukhüm jih, “Inü thiyukhüm jihkhi nimung mukhungyikia daho tüsho thiyubüm khülang she dakhiuk, jushu lang ahoang.” 11Jumonü Atungpuh tangzüng sangdan hanbah kiuto mükamde khülang ki yü, tüsho arübo binkheampung ching alodarübah ju re ju ching binkheam.
12Jihusuanü ashido yapsu mükikde asürü, tüsho amükeamrübonü Atungpuh sangdan shuh-a lu. 13Tüsho amükeamrü thünenü hulipungpung mutukzhakde mütde Atungpuh sangdan müngüh yü; tüsho thsühnuk shuhrü müngüh yü tüsho ashurü aheangrü Atungpuh sangdan dunglim yande kiuto mükamde tsah. 14Mahne nipü arünü kiuto mükamde khülang ki tsah tüsho khimyam ching alodarü. Ha ruk arünü nimung thuruk mükam.
15Athüne nipü arünü mükikde asürübah kiuto mükamde thüne ki ju ruk lang tsah: Ha nimung arünü thüne ki mükamde tsah. 16Tüsho thüne nipü, küyimki amükeamrübonü hulipungpung mütkhea, Jihusuanü mihtsürübo ki tha, “ Ahoang! Tümüde Atungpuhnü kiuto nüsa kilim jihdo. 17Kiuto tüsho ju ching lakhi kukruk lüpdükhi Atungpuh ki kingaün jihpü thsüde shahde thsümünima bahang. Müzammürambe Rahab tüsho ayamkhün lang aningshihbah, tümüde anihbenü isa yo thirirhurü jikshih. 18Tüshe thsümünima bahpü lakhi kukrukbo nüsanü dulu; jude thsüsho, nünü Israel binkheampung ching küpkhuk tüsho athsümünim handarübah. 19Shotoyinchi, suna, müwayinchi kukruk tüsho yinchi Atungpuh kilim atsangkhitkhi lah; jurübo Atungpuh rahpung-yam ching zobah.”
20Jumonü amükeamrübonü hulipungpung mütkhi soakede mihtsürübonü achangnü aho, tüsho chipi keamabah. Jushu bonungrü alala buh mikhuhnü kiuto ching yüzah tüsho yanabah. 21Tüsho arünü kiuto ching larü athrürü tüsho aliberü, azürü tüsho azorü alala, moshipungbo, namfimihnu tüsho donkibo nuknü laksahkham.
22Jihusuanü thirirhurü mahne ki tha, “Nükenü alibe ki thiyuchihchimkhi nangde müzammürambe yam ching yüang tüsho anihbe lung betsührü alala bekhitang.” 23Jumonü anenü Rahab yam ching yü tüsho anihbe lung abuh, abe, akhiungmungrü tüsho betsührü aningkhi alala bekhit. Anenü arübo khümkhitpü thsüde Israel binkheampung phünide bede yünü binshih. 24Arünü kiuto tüsho ju ching lakhi lüpdükhi takabah; arünü shotoyinchi, suna, müwayinchi kukruk tüsho yinchibo lang Atungpuh rahpung-yam ching zo. 25Tüshe Jihusuanü müzammürambe Rahab tüsho anihbe betsührübo khümkhit, tümüde anihbenü Jirikho lim yüshihkhi thirirhurü mahne jikshih. (Anihbe tsühsoniusobo khihni khiungde Israel ching lachoh.)
26Judüki Jihusuanü thiyuchihchim khülang jihde tha, “Shepünü Jirikho kiuto thsülopü mürangbanü Atungpuh muthrumünean khüp labah.
Shepünü khimtanbanü tsührü athrürü adüjibuh dükheakbah;
Shepünü chipimurungbo thsübanü tsührü athrürü akheambuh dükheakbah.”
27Junangde Atungpuh Jihusua lung lakheah, tüsho api mungshimungthu lomi athrünkhi ching soride yü.
Currently Selected:
JIHUSUA 6: YIMCBSI
Highlight
Copy
Compare
Share
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
